ភ្នំពេញ៖ ទំហំពាណិជ្ជកម្មកម្ពុជា-ចិន រយៈពេល ១០ខែ ឆ្នាំ២០២៣ សម្រេចបានជាង ១០ពាន់ដុល្លារ កើន៤,៦% បើធៀបនឹងគ្រាដូចឆ្នាំ២០២២ សម្រចបាន ៩,៦២ពាន់លានដុល្លារ។ បើតាមរបាយការណ៍ នាយកដ្ឋានគយ និងរដ្ឋាករកម្ពុជា។
បើតាម អគ្គនាយកដ្ឋានគយ និងរដ្ឋាករកម្ពុជា ទំនិញកម្ពុជានាំទៅប្រទេសចិន ១,១៨ពាន់លានដុល្លារ កើនឡើង ១៩,៣ % ធៀបនឹងឆ្នាំ២០២២ មានចំនួន ៩៨៧,៨៧លានដុល្លារ និងទំនិញ ចិននាំមកកម្ពុជា ៨,៨៩ពាន់លានដុល្លារ កើន ២,៩% ដែលមានចំនួន ៨,៦៤ពាន់លានដុល្លារ។
សូមរម្លឹកថា ក្នុងឆ្នាំ២០២២ ពាណិជ្ជកម្មប្រទេសទាំងពីរ មានទឹកប្រាក់សរុប ១១,៦៩ពាន់លានដុល្លារ កើនឡើង ៤,៤% បើធៀបនឹងឆ្នាំ២០២១ ក្នុងនោះ កម្ពុជានាំទំនិញទៅចិន ១,២៤ពាន់លានដុល្លារ ថយចុះ ១៧,៩% និងទំនិញចិននាំមកកម្ពុជាចំនួន ១០,៤៥ពាន់លានដុល្លារ កើន ៧,៩%។
លោកស្រី ចុង ជី ទីប្រឹក្សាសេដ្ឋកិច្ច និងពាណិជ្ជកម្មអមស្ថានទូតចិននៅកម្ពុជា បានសន្យានឹងខិតខំណែនាំឱ្យវិនិយោគិនចិនឱ្យមកបណ្តាក់ទុនកាន់តែច្រើនបន្ថែមទៀតនៅកម្ពុជា នៅក្នុងជំនួបជាមួយ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា កាលពីខែកញ្ញាកន្លងទៅនេះ។
លោកស្រី បានគូសបញ្ជាក់ថា នឹងខិតខំណែនាំឱ្យវិនិយោគិនចិនធ្វើការឱ្យបានស្អិតល្មួតជាមួយក្រុមប្រឹក្សាអភិវឌ្ឍន៍កម្ពុជា សំដៅបណ្តាក់ទុនវិនិយោគបន្ថែមទៀតលើគ្រប់វិស័យដើម្បីសម្រេចបានការអភិវឌ្ឍប្រកបដោយចីរភាព។
ជាការឆ្លើយតប លោក ជា វុទ្ធី សង្ឃឹមថា កិច្ចសហប្រតិបត្តិការវិនិយោគកម្ពុជា-ចិន នឹងសម្រេចបានផ្លែផ្កាល្អបន្ថែមទៀត ខណៈកន្លងមកក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្មចិន ក៏មាន MoU លើបង្កើតយន្តការពង្រឹងកិច្ចសហប្រតិបត្តិការវិនិយោគ និងសេដ្ឋកិច្ចផងដែរ៕
ដោយ៖ មឿន ឌីណា (Moeun Dyna)
