ភ្នំពេញ៖ កម្ពុជា បាននាំចេញទំនិញទៅកាន់ប្រទេសសំខាន់ចំនួន២០ សម្រេចបានទឹកប្រាក់ ១៨,៥ពាន់លានដុល្លរ រយៈពេល ១០ខែ ឆ្នាំ២០២៣។ បើតាមទិន្នន័យ អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា អាមេរិកជាទីផ្សារធំ ដែលការនាំចេញសម្រេចបានប្រមាណ ៧,៤ពាន់លានដុល្លារ មានការថយចុះ ១,៥% បើធៀបឆ្នាំ២០២២ មានចំនួន ៧,ពាន់លានដុល្លារ។
នៅក្នុងទិន្នន័យ អគ្គនាយកដ្ឋានគយ និងរដ្ឋាករកម្ពុជាបានបន្តថា ការនាំចេញរបស់កម្ពុជា ទៅវៀតណាម បានឈរនៅ លេខរៀងទី២ សម្រេចប្រមាណ ២,២ពាន់លានដុល្លារ កើនជិត ៤០% បើធៀបនឹងឆ្នាំ២០២២ មានចំនួន ១,៦ពាន់លានដុល្លារ។ ខណៈ ចិនឈរលេខរៀងទី៣ ដែលកម្ពុជានាំចូលទំនិញសម្រេចបាន ១,១៧ពាន់លានដុល្លារ កើនជិត ២០% ធៀបនឹងឆ្នាំ២០២២ មានចំនួន ៩៩៧លានដុល្លារ។
ទំនិញដែលកម្ពុជា នាំចេញមានដូចជា៖ សម្លៀកបំពាក់ ម៉ាស៊ីន ឧបករណ៍អគ្គិសនី ធុញ្ញជាតិ វត្ថុធ្វើអំពីស្បែក បរិក្ខារធ្វើអំពីរោមសត្វ កៅស៊ូ និងផលិតផលធ្វើពីកៅស៊ូ គ្រឿងសង្ហារឹម វត្ថុធាតុប្លាស្ទិក និងវត្ថុធាតុធ្វើពីប្លាស្ទិក អាលុយមីញ៉ូម និងវត្ថុធាតុធ្វើពីអាលុយមីញ៉ូម។ បើតាមការឱ្យដឹងនៅក្នុងទិន្នន័យដដែល។
គូសបញ្ជាក់ថា តាមរយៈការអនុវត្តកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) បានធ្វើឱ្យកំណើននៃការនាំចេញរបស់កម្ពុជា កើនឡើងគួរឱ្យកត់សម្គាល់ ខណៈកិច្ចព្រមព្រៀងសេរីពាណិជ្ជកម្មរវាងកម្ពជា-កូរ៉េ ក៏បានជំរុញទំហំនៃការនាំចេញ របស់កម្ពុជាទៅកូរ៉េ នូវទំនិញដូចជាសម្លៀកបំពាក់ ស្បែកជើង កង់ ផលិតផលសម្រាប់ធ្វើដំណើរជាដើម ត្រូវបាននាំចេញក្នុងអត្រាពន្ធសូន្យ។
សូមរម្លឹកផងដែថា កាលពីឆ្នាំ២០២២ កម្ពុជានាំទំនិញទៅទីផ្សារអន្តរជាតិ មានចំនួនទឹកប្រាក់ ២២,៤៨២,៩៣៧លានដុល្លារ កើនឡើង ១៦,៤% និងទំនិញដែលកម្ពុជានាំចូល ពីទីផ្សារអន្តរជាតិមានចំនួន ២៩,៩៤១,៦០លានដុល្លារ កើន ៤,៣%៕
ដោយ៖ មឿន ឌីណា (Moeun Dyna)
