សៀមរាប៖ កម្ពុជា ទទួលបានចំណូលពីការលក់សំបុត្រចូលទស្សនារមណីយដ្ឋានអង្គរចំនួន ២៧,៨៨២,៤៣៥ដុល្លារ ដែលមានភ្ញៀវទេសចរបរទេសចំនួនសរុប ៦០២,៥៧០នាក់ រយៈពេល ១០ខែ ឆ្នាំ២០២៣។ តាមសេចក្ដីប្រកាសព័ត៌មាន របស់គ្រឹះស្ថានអង្គរ។
ក្រៅពីចំណូលខាងលើគ្រឹះស្ថានអង្គរ ក៏ទទួលបានចំណូល ៥៩០ ៩៤៨ដុល្លារផងដែរ ពីការលក់សំបុត្រឱ្យភ្ញៀវបរទេសចូលទស្សនាប្រាសាទកោះកេរ និងសំបុត្រទូកនៅចុងឃ្នៀស។
សូមបញ្ជាក់ថា ការប្រមូលចំណូលរបស់គ្រឹះស្ថានអង្គរ គឺរួមមាន៖ នៅរមណីយដ្ឋានអង្គរ, ប្រាសាទកោះកេរ, និងសំបុត្រទូកនៅក្នុងកំពង់ផែចុងឃ្នៀស។
សម្រាប់តម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ គឺសំបុត្រចូលទស្សនា ១ថ្ងៃមានតម្លៃ ៣៧ដុល្លារ, រយៈពេល ៣ថ្ងៃ តម្លៃ ៦២ដុល្លារ និង ៧ថ្ងៃ តម្លៃ ៧២ដុល្លារ។
គួរបញ្ជាក់ផងដែរថា បើធៀបរយៈពេលដូចគ្នាកាលពីឆ្នាំ២០២២ គឺចំនួនភ្ញៀវទិញសំបុត្រឆ្នាំ២០២៣ បានកើនឡើង ២៥៥,៨២% និងចំនួនប្រាក់កើនឡើង ៣១២,៣៥%៕
ដោយ៖ មឿន ឌីណា (Moeun Dyna)
