ភ្នំពេញ៖ អនុលោមតាមច្បាប់ស្តីពីសារពើពន្ធ ជំពូកទី៤ អាករលើតម្លៃបន្ថែម ត្រូវអនុវត្តលើការផ្គត់ផ្គង់ជាប់អាករនូវទំនិញឬសេវានៅក្នុងព្រះរាជាណាចក្រកម្ពុជា។ ទំនិញ សំដៅដល់ទ្រព្យរូបីក្រៅពីដីធ្លីនិងប្រាក់កាស ដោយឡែក សេវាសំដៅដល់ការផ្គត់ផ្គង់អ្វីមួយដែលមានតម្លៃក្រៅពីទំនិញ ដីធ្លី និងប្រាក់កាស។

ជាមួយគ្នានេះ ត្រង់ មាត្រា៦៣ នៃច្បាប់នេះ ក៏បានកំណត់ពីការផ្គត់ផ្គង់មិនជាប់អាករលើទំនិញឬសេវាមួយចំនួន រួមមាន៖

១- សេវាសិក្សាអប់រំ

២- សេវាប្រៃសណីយ៍សាធារណៈ

៣- សេវារបស់មន្ទីរពេទ្យនិងគ្លីនិក សេវាខាងវេជ្ជសាស្ត្រនិងទន្តសាស្ត្រ និងការលក់ទំនិញបន្ទាប់បន្សំខាង វេជ្ជសាស្ត្រនិងទន្តសាស្ត្រដែលទាក់ទិននឹងការបំពេញសេវាទាំងនេះ

៤- សេវាដឹកជញ្ជូនអ្នកដំណើរដោយប្រព័ន្ធដឹកជញ្ជូនសាធារណៈ ដែលជាកម្មសិទ្ធិទាំងស្រុងរបស់រដ្ឋ

៥- សេវាធានារ៉ាប់រង

៦- ការផ្គត់ផ្គង់ថាមពលអគ្គិសនីនិងការផ្គត់ផ្គង់ទឹកស្អាត

៧- ផលិតផលកសិកម្មមិនទាន់កែច្នៃផលិតក្នុងស្រុក

៨- សេវាប្រមូលសំរាមនិងកាកសំណល់រឹងឬរាវ

៩- សេវាជាមូលដ្ឋានខាងហិរញ្ញវត្ថុ

១០- ការនាំចូលសម្ភារៈប្រើប្រាស់ផ្ទាល់ខ្លួនដែលរួចពន្ធគយ និង

១១- សកម្មភាពមិនស្វែងរកប្រាក់ចំណេញដើម្បីបម្រើផលប្រយោជន៍សាធារណៈ៕

ដោយ៖ មឿន ឌីណា (Moeun Dyna)