ភ្នំពេញ៖ កម្ពុជាការធ្វើពាណិជ្ជកម្មជាមួយទីផ្សារអន្តរជាតិ ចាប់ពីខែមករា ដល់ខែសីហា ឆ្នាំ២០២៣ មានទឹកប្រាក់ ៣១,៩៧២លានដុល្លារ ធ្លាក់ចុះ១៤.៥% បើធៀបនឹងគ្រាដូចគ្នាឆ្នាំ២០២២ មានជាង ៣៧ពាន់លានដុល្លារ។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
ទិន្នន័យខាងលើ បានបន្តថា ក្នុងនោះការនាំចេញពីកម្ពុជាទៅទីផ្សារអន្តរជាតិមានចំនួន ១៥,៦៩ពាន់លានដុល្លារ កើន ០,៣២% ចំណែកការនាំចូលមានជាង ១៦ពាន់លានដុល្លារ ធ្លាក់ចុះ ២៥,២%។
ទំនិញ កម្ពុជាបាននាំចេញរួមមាន៖ សម្លៀកបំពាក់ និងគ្រឿងបន្ទាប់បន្សំ ដែលធ្វើឡើងពីក្រណាត់ ៤.៥ពាន់លានដុល្លារ ថយចុះ ២០.៩%, ម៉ាស៊ីន និងឧបករណ៍អគ្គិសនីជាង ១ពាន់លានដុល្លារ កើនឡើង៩៨.៥%, សម្លៀកបំពាក់ និងគ្រឿងបន្ទាប់បន្សំ នៃសម្លៀកបំពាក់មិនធ្វើឡើង ពីការចាក់ដោយម្ជុលពីរឬមួយ មានតម្លៃជាង ១.៨ពាន់លានដុល្លារ, កៅស៊ូ និងផលិតធ្វើអំពីកៅស៊ូមាន ៣០៨លានដុល្លារ កើនឡើង ៥៥.៣% និងបន្លែដែលអាចបរិភោគបាន និងនឹងមើមមួយចំនួនមាន ៣៣២លានដុល្លារ កើនឡើង ២២.៣%។
ភ្នំពេញប៉ុស្តិ៍ បានស្រង់សំដី លោក ហុង វណ្ណៈ អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា ថា ការធ្លាក់ចុះទំហំពាណិជ្ជកម្មអន្តរជាតិ គឺជាបញ្ហាសកល ប៉ុន្តែអ្វីដែលលោកចាប់អារម្មណ៍ គឺកំណើនការនាំចេញរបស់កម្ពុជាក្នុងដំណាក់កាលដែលសេដ្ឋកិច្ចពិភពលោកកំពុងតែជួបវិបត្តិ។
លោក បានគូសបញ្ជាក់ថា មូលហេតុដែលជួយឱ្យការនាំចេញរបស់កម្ពុជាកើនឡើង គឺដោយសារគុណភាពទំនិញកម្ពុជាល្អ និងមានតម្លៃសមត្ថភាពប្រកួតប្រជែង។ កំណើនទឹកប្រាក់នាំចេញពីកម្ពុជា គឺបានមួយចំណែកពីការនាំចេញផលិតផលកសិកម្ម ដែលកំពុងមានតម្រូវការខ្ពស់នៅទីផ្សារអន្តរជាតិ។
សូមរម្លឹកថា នៅឆ្នាំ២០២២ ទឹកប្រាក់ពាណិជ្ជកម្មអន្តរជាតិរបស់កម្ពុជា មានចំនួនសរុបជាង ៥២,៤ពាន់លានដុល្លារ កើនឡើង ៩,២% បើធៀបទៅនឹងឆ្នាំ២០២១ ដែលមានចំនួនជាង ៤៨ពាន់លានដុល្លារ។
ទឹកប្រាក់ដែលកម្ពុជាប្រមូលបានពីការនាំទំនិញទៅទីផ្សារអន្តរជាតិ មានជាង ២២,៤ពាន់លានដុល្លារ កើនឡើង ១៦,៤% និងទំនិញកម្ពុជានាំចូលពីទីផ្សារអន្តរជាតិជិត ៣០ពាន់លានដុល្លារ កើនឡើង ៤,៣%៕
ដោយ៖ មឿន ឌីណា (Moeun Dyna)
