ភ្នំពេញ៖ គម្រោងធ្វើឱ្យប្រសើរឡើងផ្លូវជាតិលេខ៥ (ផ្លូវអាស៊ានហាយវេលេខ១) មានប្រវែងផ្លូវ ៣៦៦គីឡូម៉ែត្រ ដែលឆ្លងកាត់ខេត្តចំនួន៥ ចំណាយទឹកប្រាក់ប្រមាណ ៥០០លានដុល្លារ ដោយប្រើពេលសាងសង់ ៥៥ខែ គិតពីការបើកការដ្ឋាន ថ្ងៃទី២៦ ខែមីនា ឆ្នាំ២០១៨។
គម្រោងធ្វើឱ្យប្រសើរឡើងផ្លូវជាតិលេខ៥ មានប្រវែងផ្លូវ ៣៦៦គីឡូម៉ែត្រ ឆ្លងកាត់ខេត្ត កាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ដោយចាប់ផ្ដើម ពីព្រែកក្តាម និងបញ្ចប់ នៅក្រុងប៉ោយប៉ែត ខេត្តបន្ទាយមានជ័យ។
ផ្លូវនេះបែងចែកចេញជា ៣កំណាត់ រួមមាន៖ កំណាត់ទី១ ភាគខាងជើង (បាត់ដំបង-សិរីសោភ័ណ) កំណាត់ទី២ ភាគខាងត្បូង (ព្រែកក្តាម-ធ្លាម្អម) និងកំណាត់ទី៣ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត)។ បើកការដ្ឋានសាងសង់ ថ្ងៃទី២៦ ខែមីនា ឆ្នាំ២០១៨ បញ្ចប់ការសាងសង់ ថ្ងៃទី១០ ខែមករា ឆ្នាំ២០២២ រយៈពេលសាងសង់ ៥៥ខែ ប្រភេទផ្លូវ បេតុងកៅស៊ូ (AC) ទំហំទឹកប្រាក់គម្រោង ប្រមាណ ៥០០លានដុល្លារ។
គម្រោងផ្លូវនេះ សាងសង់ដោយ ក្រុមហ៊ុនសម្ព័ន្ធក្រុមហ៊ុន Tekken-Taiyo JV និងក្រុមហ៊ុនសម្ព័ន្ធក្រុមហ៊ុន Daiho-Asanuma JV និងត្រួតពិនិត្យដោយ ត្រួតពិនិត្យបច្ចេកទេសដោយ ក្រុមហ៊ុនទីប្រឹក្សាបច្ចេកទេស KEI-OCG-KCI Joint Venture in association with KCEC និង TANCONS។
គូសបញ្ជាក់ថា គម្រោងធ្វើឱ្យប្រសើរឡើងផ្លូវជាតិ៥នេះ ជាផ្លូវអាស៊ានហាយវេលេខ១ នឹងផ្តល់អត្ថប្រយោជន៍យ៉ាងធំធេង ដូចជា អាចបង្កើនការនាំចេញ-នាំចូល និងជាផ្លូវមួយប្រកបដោយសក្តានុពលខ្ពស់សម្រាប់បម្រើវិស័យសេដ្ឋកិច្ចកម្ពុជា ពិសេសអាចកាត់ បន្ថយគ្រោះថ្នាក់ និងការ កកស្ទះចរាចរណ៍បានយ៉ាងច្រើន។
លើសពីនេះទៅទៀត ប្រជាពលរដ្ឋតាមដង ផ្លូវនេះនឹងមានជីវភាពកាន់តែល្អប្រសើរតាមរយៈកំណើននៃការអភិវឌ្ឍ វិនិយោគ និងទេសចរណ៍៕
ដោយ៖ មឿន ឌីណា (Moeun Dyna)
