ភ្នំពេញ៖ គម្រោងសាងសង់អាកាសយានដ្ឋានអន្តរជាតិតេជោ (ភ្នំពេញថ្មី) ក្នុងដំណាក់កាលទី១ នៅខេត្តកណ្តាល និងខេត្តតាកែវ លើផ្ទៃដីទំហំ២៦០០ហិកតា គិតត្រឹមថ្ងៃទី៣០ ខែមិថុនា ឆ្នាំ២០២៣ វឌ្ឍនភាពសម្រេចបានជាង ៥០% ចំណាយទឹកប្រាក់សរុបចំនួន ៧១២លានដុល្លារ។ បើតាមការឱ្យដឹងពី លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យ រដ្ឋលេខាធិការដ្ឋានអាកាសចរស៊ីវិល។
ដំណាក់កាលទី១ គ្រោងនឹងបញ្ចប់នៅឆ្នាំ២០២៤ និងគ្រោងដាក់ឱ្យដំណើរការនៅឆ្នាំ២០២៥ ប្រសិនបើគ្មានអ្វីប្រែប្រួលទេ នេះបើយោងលើកម្មវិធីការងារមេ (Updated Master Schedule) ដែលបានធ្វើបច្ចុប្បន្នភាពចុងក្រោយដោយក្រុមហ៊ុនសាងសង់ CAIC។ បើតាមការបញ្ជាក់របស់ លោក ស៊ីន ចាន់សិរីវុត្ថា។
លោក ស៊ីន ចាន់សិរីវុត្ថា បានបន្តថា នៅពេលដំណាក់កាលទី១ ត្រូវបានបញ្ចប់ អាកាសយានដ្ឋានអន្តរជាតិតេជោនឹងមានសមត្ថភាពទទួលបានការចុះចតយន្តហោះរហូតដល់កូដអេហ្វ (Code E: A-340-300, A350-900 និង B777- 200/300ER, B747-300/400) ដែលមានចំណតយន្តហោះចំនួន ៣២ចំណត អាចទទួលអ្នកដំណើរបានពី ១៣លានទៅ១៥លាននាក់ក្នុង១ឆ្នាំ ពោលពឺឆ្នាំ២០២៤ ហើយនិងអាចទទួលទំនិញតាមផ្លូវអាកាសពី ១៧៥ ០០០តោនក្នុង១ឆ្នាំ(២០២៤) ទៅ៣០ ០០០តោនក្នុង១ឆ្នាំ(២០៣០-២០៤០)។
ការសាងសង់ផ្លូវតភ្ជាប់ពីមហាវិថីសម្តេច ហ៊ុនសែន ឆ្ពោះទៅកាន់អាកាសយានដ្ឋានអន្តរជាតិតេជោ ដែលមានទទឹងប្រវែង ៦០ម៉ែត្រ និងបណ្តោយប្រវែង ១៣,៥គីឡូម៉ែត្រ វឌ្ឍនភាពសម្រេចបាន ៤៦%។ បើតាមការបន្ថែមរបស់ លោក ស៊ីន ចាន់សិរីវុត្ថា បានបន្ថែមទៀតថា ផ្លូវនេះត្រូវបានតភ្ជាប់ពីមហាវិថីសម្ដេចហ៊ុនសែន កាត់ផ្លូវជាតិលេខ២ ឆ្ពោះត្រង់ទៅកាន់អាកាសយានដ្ឋានអន្តរជាតិតេជោ៕
ដោយ៖ មឿន ឌីណា (Moeun Dyna)
