ភ្នំពេញ៖ ការនាំចេញ-នាំចូលទំនិញរវាងកម្ពុជា-ជប៉ុន មានទឹកប្រាក់សរុប ១,៩៤៨.០១៩លានដុល្លារ កើន ១២,៣% បើធៀបនឹងឆ្នាំ២០២១ មានចំនួន ១,៧៣៤.១៤១លានដុល្លារ។ ក្នុងនោះកម្ពុជានាំទំនិញទៅជប៉ុន ចំនួន ១,១៧៣.០៣ លានដុល្លារ កើន ៧,៣% និងទំនិញនាំពីជប៉ុនមកកម្ពុជា ៧៧៤.៩៨៩លានដុល្លារ កើនឡើង ២១%។ បើតាមទិន្នន័យជញ្ជីងពាណិជ្ជកម្មអគ្គនាយកដ្ឋានគយ និងរដ្ឋាករកម្ពុជា។
លោក ហុង វណ្ណៈ អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា បានលើកឡើងថា ទោះបីឆ្នាំ២០២២ សេដ្ឋកិច្ចពិភពលោកជួបបញ្ហាជាច្រើនបណ្តាលមកពីវិបត្តិជំងឺកូវីដ-១៩ សង្គ្រាមរវាងប្រទេសរុស្ស៊ី-អ៊ុយក្រែន និងការកើនឡើងតម្លៃប្រេងឥន្ធនៈ ក៏ពាណិជ្ជកម្មកម្ពុជា-ជប៉ុនមិនបានធ្លាក់ចុះឡើយ។
ការរក្សាបានកំណើនទំហំពាណិជ្ជកម្មទ្វេភាគី ពិសេសការនាំចេញរបស់កម្ពុជា គឺដោយសារកម្ពុជាអាចរក្សាបាននូវស្ថិរភាពដំណើរការផលិតកម្មបានពេញលេញ និងអាចបង្កើនចំនួនមុខទំនិញកាន់តែច្រើនក្នុងទីផ្សារជប៉ុន។ បើតាមការលើកឡើងបន្តរបស់ លោក ហុង វណ្ណៈ បានបន្ថែមថា ការចូលជាធរមាននៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ក៏រួមចំណែកយ៉ាងច្រើនសម្រាប់ការផ្លាស់ប្តូរទំនិញរវាងកម្ពុជាជប៉ុន និងប្រទេសជាសមាជិកផ្សេងៗផងដែរ។
បើតាមភ្នំពេញប៉ុស្តិ៍ បានស្រង់សំដី លោក លឹម ហេង អនុប្រធានសភាពាណិជ្ជកម្មកម្ពុជា ការធ្វើពាណិជ្ជកម្មរវាងកម្ពុជា និងជប៉ុន បានកើនជាលំដាប់ដោយសាររដ្ឋាភិបាលប្រទេសទាំងពីរមានទំនាក់ទំនងល្អ ហើយចំនួនក្រុមហ៊ុនជប៉ុនវិនិយោគនៅកម្ពុជាដើម្បីផលិតទំនិញនាំទៅទីផ្សារអន្តរជាតិ រួមទាំងទីផ្សារជប៉ុនក៏មានកាន់តែច្រើនផងដែរ។
ជប៉ុនជាប្រទេសមានឧស្សាហកម្មរីកចម្រើន និងជីវិតរស់នៅមានកម្រិតខ្ពស់ ដូច្នេះកម្ពុជាអាចមានឱកាសច្រើននៅក្នុងការនាំទំនិញដែលជប៉ុនមិនសូវផលិត ពិសេសផលិតផលកសិកម្មដែលជាប្រភេទមុខទំនិញត្រូវប្រើប្រាស់កម្លាំងពលកម្មច្រើន។ បើតាមការបញ្ជាក់របស់ លោក លឹម ហេង។
គូសបញ្ជាក់ថា វិនិយោគិនជប៉ុន ភាគច្រើនវិនិយោគក្នុងវិស័យឧស្សាហកម្ម ធនាគារ សណ្ឋាគារ ទេសចរណ៍ សំណង់ និងអចលនទ្រព្យ ទីផ្សារលក់រាយ ផ្សារទំនើប វិស័យសេវាកម្ម និងភោជនីយដ្ឋាន ជាដើម។
របាយការណ៍របស់ធនាគារជាតិនៃកម្ពុជាបានឱ្យដឹងថា គិតត្រឹមចុងឆ្នាំ២០២១ ជប៉ុន គឺជាប្រទេសដែលមកវិនិយោគនៅកម្ពុជាច្រើនជាងគេលំដាប់ទី៥ ដោយមានទឹកប្រាក់ចំនួន ២,៤ពាន់លានដុល្លារ, តាមពីក្រោយប្រទេសចិន មានទឹកប្រាក់ ១៨ពាន់លានដុល្លារ, កូរ៉េ ៤,៩ពាន់លានដុល្លារ, សិង្ហបុរី ២,៧ពាន់លានដុល្លារ និងវៀតណាម ២,៥ពាន់លានដុល្លារ៕
ដោយ៖ មឿន ឌីណា (Moeun Dyna)
