ភ្នំពេញ៖ អគ្គនាយកដ្ឋានពន្ធដារ បានរកចំណូលបានជាង ១០០លានដុល្លារ ពីពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ នៅក្នុងឆ្នាំ២០២២ ស្មើនឹង ១២៣% នៃផែនការ ឆ្លុះបញ្ចាំងអំពីការប្រសិទ្ធភាពនៃការធ្វើទំនើបកម្មតាមប្រព័ន្ធបច្ចេកវិទ្យា ដែលបង្កភាពងាយស្រួលដល់អ្នកបង់ពន្ធ។ បើតាមការបញ្ជាក់របស់ លោក គង់ វិបុល រដ្ឋមន្ដ្រីអមនាយករដ្ឋមន្ដ្រី និងជាអគ្គនាយកនៃអគ្គនាយកដ្ឋានពន្ធដារ។
នៅក្នុងកម្មវិធីស្តីពី វឌ្ឍនភាពនៃប្រព័ន្ធគ្រប់គ្រងទិន្នន័យ សម្រាប់ផ្តល់សេវាតាម អនឡាញ (e-Tax Services) របស់អគ្គនាយកដ្ឋានពន្ធដារ លោក គង់ វិបុល បានថ្លែងថា ការប្រមូលចំណូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ នៅក្នុងឆ្នាំ២០២២ បើប្រៀបធៀបនឹងឆ្នាំ២០២១ មានការកើនឡើង ហើយនៅក្នុងឆ្នាំនេះ ដោយសម្រេចបាន១២៣% នៃផែនការស្មើប្រហែលជាង ១០០លានដុល្លារ។
ចំណូលពន្ធមធ្យោបាយនេះមានការកើនឡើង និងប្រមូលបានលើសផែនការ ដោយសារវិធានការប្រមូល តាមរយៈប្រព័ន្ធព័ត៌មានវិទ្យា ជាពិសេសអគ្គនាយកដ្ឋាន បានបង្កើតនូវកម្មវិធី GDT Taxpayer App សម្រាប់បង់ពន្ធ។ បើតាមការបញ្ជាក់បន្តរបស់ លោក គង់ វិបុល បានបន្តថា កម្មវិធី GDT Taxpayer App គឺសម្រួលដល់ម្ចាស់យានយន្ត ដែលត្រូវបង់ពន្ធប្រចាំឆ្នាំ មិនចាំបាច់ទៅធនាគារ និងអង្គភាពពន្ធដារ ដើម្បីបង់ពន្ធនោះទេ គឺអាចបង់តាមរយៈពេល App នេះ និងមានការដឹកជញ្ជូនសាលកបត្រពន្ធ ដល់ផ្ទះតែម្តង។
GDT Taxpayer App នេះ មានភាពងាយស្រួល ចំពោះអ្នកជាប់ពន្ធ ដូច្នេះគ្មានមូលហេតុណាមួយ ដែលអ្នកជាប់ពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ ចង់គេចវេះនោះទេ លើកលែងតែអ្នកមិនបានដឹង ឬក៏ភ្លេច។ កម្មវិធី GDT Taxpayer App មានការកើនឡើងជាលំដាប់ ដោយសារតែមានកំណើនប្រើប្រាស់ នៃការបង់ពន្ធ តាមរយៈពេល App នេះ មានជាង៥០% បើធៀបនឹងឆ្នាំកន្លងទៅ។ បើតាមការបន្តរបស់ លោក គង់ វិបុល។
លោក បន្តទៀតថា ចាប់ពីខែមករា ឆ្នាំ២០២៣ គឺមានការត្រួតពិនិត្យនៅតាមដងផ្លូវ គ្រប់រាជធានី-ខេត្តទាំងអស់ ចំពោះអ្នកដែលមិនបានបង់ពន្ធ លើមធ្យោបាយធ្វើដំណើរ ខណៈការប្រមូលពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ បានបញ្ចប់នៅចុងខែវិច្ឆិកា ឆ្នាំ២០២២។
គិតត្រឹមដំណាច់ខែតុលា ឆ្នាំ ២០២២ កន្លងទៅនេះ GDT បានធ្វើការកៀរគរចំណូលពន្ធជាង២ ៩០០ លានដុល្លារកើន២៦ភាគរយបើធៀបទៅនឹងរយៈពេលដូចគ្នា ដោយការប្រមូលពន្ធនេះសម្រេចបានជាង១០៤ភាគរយនៃផែនការដែលរដ្ឋាភិបាលបានកំណត់សម្រាប់ឆ្នាំ២០២២។ បើតាមការបន្ថែមរនរបស់ លោក គង់ វិបុល៕
ដោយ៖ មឿន ឌីណា (Moeun Dyna)
