ភ្នំពេញ៖ ការដោះដូរទំនិញទ្វេភាគីកម្ពុជា-ថៃ មានទឹកប្រាក់ជាង ៣,៦ពាន់លានដុល្លារ រយៈពេល ៩ខែដើមឆ្នាំ២០២២ កើនជាង ២៧% បើធៀបនឹងរយៈពេលដូចគ្នាឆ្នាំ២០២១ មានទឹកប្រាក់ជាង ២,៨ពាន់លានដុល្លារ។ បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា
នៅរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបន្តឱ្យដឹងថា ក្នុងនោះទឹកប្រាក់ដែលកម្ពុជានាំចេញមានចំនួនជាង ៦៥៥លានដុល្លារ កើនឡើងពីជាង ៤៧៦លានដុល្លារ ឬស្មើ ៣៧,៦% ខណៈការនាំចូលមានទឹកប្រាក់ជិត ៣ពាន់លានដុល្លារ កើនពីជិត ២,៤ពាន់លានដុល្លារ ស្មើនឹងកំណើន ២៥%។
ចាប់តាំងពីស្ថានភាពជំងឺកូវីដ-១៩ មានភាពធូរស្រាល សកម្មភាពដោះដូរទំនិញរវាងប្រទេសទាំងពីរ មានសម្ទុះគួរឱ្យកត់សម្គាល់។ បើតាម ការថ្លែងរបស់ លោក អ៊ូក សោភ័ណ្ឌ ឯកអគ្គរាជទូតកម្ពុជាប្រចាំនៅប្រទេសថៃ ដែលបានប្រាប់ភ្នំពេញប៉ុស្តិ៍ បានបន្តថា កន្លងមកការបង្កើតមជ្ឈមណ្ឌលប្រឹក្សាធុរកិច្ចកម្ពុជា (CCB) ក៏ជួយបង្កើនការធ្វើពាណិជ្ជកម្មរវាងប្រទេសទាំងពីរ សំដៅធ្វើយ៉ាងណាឱ្យផលិតផលក្នុងស្រុកយើងចូលទីផ្សារថៃកាន់តែច្រើនដើម្បី កាត់បន្ថយការហូរចូលពីថៃ។
បន្ទាប់ពីកូវីដ-១៩ បានធូរស្បើយចាប់ពីដើមឆ្នាំ២០២២ រហូតមកដល់ពេលនេះយើងសង្កេតឃើញសម្ទុះពាណិជ្ជកម្មរវាងប្រទេសទាំងពី កើនឡើងខ្លាំង។ យើងក៏កំពុងជំរុញឱ្យក្រុមហ៊ុនធំៗរបស់ថៃដូចជា៖ 7Eleven និង Big C ជួយដាក់លក់ផលិតផលយើង ដើម្បីលើកស្ទួយផលិតផលយើងនៅទីផ្សារអន្តរជាតិ។ បើតាមការថ្លែងបន្តរបស់ លោក អ៊ូក សោភ័ណ្ឌ។
សូមរម្លឹកថា ក្នុងកិច្ចប្រជុំជាមួយវិនិយោគិនថៃ កាលពីខែសីហា ឆ្នាំ២០២២ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានលើកទឹកចិត្ត និងស្វាគមន៍វិនិយោគិនថៃដែលមានសក្តានុពលក្នុងការចូលមកវិនិយោគនៅកម្ពុជា ដើម្បីពង្រឹង និងពង្រីកទំនាក់ទំនងពាណិជ្ជកម្មទ្វេភាគី ខណៈពាណិជ្ជកម្មរវាងប្រទេសទាំងពី បានកើនឡើងពី ៣,៤៩ពាន់លានដុល្លារ ក្នុងឆ្នាំ២០២០ ដល់ ៣,៨៥ពាន់លានដុល្លារ ក្នុងឆ្នាំ២០២១៕
ដោយ៖ មឿន ឌីណា (Moeun Dyna)
