សៀមរាប៖ វឌ្ឍនភាព គម្រោងសាងសង់អាកាសយានដ្ឋានសៀមរាប-អង្គរ លើផ្ទៃដី ៧០០,០៦ហិកតា ក្រោមទុនវិនិយោគប្រមាណ ៨៨០លានដុល្លារ សម្រេចបាន ៤៤%។ បើតាមការថ្លែងឱ្យដឹងពី លោក ស៊ីន ចាន់សេរីវុត្ថា អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានបន្តថា រំពឹងកើនឡើងដល់ ៧០% នៅត្រឹមដំណាច់ឆ្នាំ២០២២នេះ។
លោក ស៊ីន ចាន់សេរីវុត្ថា បានថ្លែងបន្តទៀតថា តាមគម្រោងអាកាសយានដ្ឋានអន្តរជាតិនេះគ្រោងនឹងបញ្ចប់ការសាងសង់នៅថ្ងៃទី៣០ ខែមីនា ឆ្នាំ២០២៣ និងគ្រោងដាក់ឱ្យដំណើរការសាកល្បងលើកដំបូងនៅខែតុលា ឆ្នាំ២០២៣ ប្រសិនបើពុំមានផលប៉ះពាល់អ្វីជាយថាហេតុកើតឡើង។
ការសាងសង់យឺតជាងផែនការបន្តិចបន្តួចនេះ គឺបណ្តាលមកពីការរីករាលដាលជំងឺកូវីដ-១៩ ដែលធ្វើឱ្យរាំងស្ទះដល់ការធ្វើដំណើររបស់ក្រុមវិស្វករមកពីប្រទេសចិន ភាពយឺតយ៉ាវក្នុងការផ្គត់ផ្គង់សម្ភារបរិក្ខារសម្រាប់សាងសង់ និងតម្លៃដឹកជញ្ជូនកើនឡើងខ្ពស់ជាងពេលធម្មតា។ បើតាមការលើកឡើងរបស់ លោក ស៊ីន ចាន់សេរីវុត្ថា។
អាកាសយានដ្ឋានអន្តរជាតិសៀមរាប-អង្គរ អាចនឹងក្លាយជា Hub Airport មួយនៅក្នុងតំបន់ ដោយសារអាកាសយានដ្ឋានថ្មីនេះមានទំហំធំជាងអាកាសយានដ្ឋានចាស់ច្រើនដង ដែលជាកិត្យានុភាពមួយក្នុងការទាក់ទាញស្ទើរគ្រប់វិស័យ ពិសេសវិស័យទេសចរណ៍។ បើតាម លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានប្រាប់ភ្នំពេញប៉ុស្តិ៍។
លោក ធួន ស៊ីណាន បានលើកឡើងបន្តថា នៅពេលអាកាសយានដ្ឋានទៅដល់តំបន់ណា វានឹងនាំភាពទាក់ទាញបន្ថែមទៅដល់តំបន់នោះ ដោយការសាងសង់អាកាសយានដ្ឋានអន្តរជាតិសៀមរាប-អង្គរនេះ គឺជាការបង្កើតទីក្រុងថ្មីមួយទៀត សម្រាប់ខេត្តសៀមរាប។ លោក បានបន្តទៀតថា អាកាសយានដ្ឋានអន្តរជាតិសៀមរាប-អង្គរ គឺនៅឆ្ងាយពីតំបន់បេតិកភណ្ឌ ដែលជួយបានច្រើនទៅដល់បេតិកភណ្ឌរបស់យើង ខណៈព្រលានយន្តហោះចាស់អាចបង្កហានិភ័យរយៈពេលវែងដល់សំណង់បេតិកភណ្ឌនេះ។
សូមរម្លឹកថា អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមសាងសង់កាលពីថ្ងៃទី១៥ ខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia)Co.,Ltd(AIAI)។
អាកាសយានដ្ឋាននេះ មានសមត្ថភាពទទួលអ្នកដំណើរប្រចាំឆ្នាំរយៈពេលខ្លី-មធ្យម ៧លាននាក់ ក្នុង១ឆ្នាំ ដែលត្រូវចំណាយទុនជាង ៥០០លានដុល្លារ និងរយៈពេលវែងទទួលបាន ២០លាន នាក់ក្នុង ១ឆ្នាំដែលត្រូវចំណាយទុនជាង ៣០០លានដុល្លារ បន្ថែមទៀត។
សម្រាប់សមត្ថភាពទទួលទំនិញប្រចាំឆ្នាំវិញគឺក្នុងរយៈពេលខ្លី-មធ្យម ១០,០០០តោន ក្នុង១ឆ្នាំ និងរយៈពេលវែង ៦០,០០០តោន៕
ដោយ៖ មឿន ឌីណា (Moeun Dyna)
