ភ្នំពេញ៖ រយៈពេល ៥ឆ្នាំ ក្នុងវិស័យសំណង់ ក្រសួងរៀបចំដែនដី នគរូបនីយកម្មនិងសំណង់ បានអនុម័ត ១៩,៣២២ គម្រោង មានទុនវិនិយោគ ៣១,៤៨៤លានដុល្លារ។ យោងតាមរបាយការណ៍ស្ដីពីសមិទ្ធផលសម្រេចបានរយៈពេល ៥ឆ្នាំកន្លងមករបស់ក្រសួងរៀបចំដែនដី បានបញ្ជាក់ថា ការវិនិយោគវិស័យសំណង់ទាំងក្នុងស្រុក និងពីក្រៅប្រទេសមានសម្ទុះខ្លាំងក្លា និងបានរួមចំណែកដ៏សំខាន់ក្នុងការជំរុញកំណើនសេដ្ឋកិច្ចជាតិ។
នៅក្នុងរបាយការណ៍របស់ក្រសួងរៀបចំដែនដីបានបន្តថា ក្នុងរយៈពេល ៦ខែ ឆ្នាំ២០២២ ការវិនិយោគក្នុងវិស័យសំណង់មានចំនួន ២,០០០គម្រោង និងមានទុនវិនិយោគ ១,២០៦លានដុល្លារ។
លោក លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងនៅក្នុងសន្និសីទសារព័ត៌មាន ស្ដីពី«សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងរៀបចំដែនដី» ថា ប្រទេសដែលនាំមុខគេក្នុងការវិនិយោគក្នុងវិស័យសំណង់ និងអចលនទ្រព្យនៅកម្ពុជា រួមមានប្រទេសចិន កូរ៉េខាងត្បូង ជប៉ុន និងប្រទេសថៃ។
វិស័យសំណង់ គឺជាផ្នែកមួយដែលមានសារៈសំខាន់ ដែលបានរួមចំណែកក្នុងការអភិវឌ្ឍសេដ្ឋកិច្ចជាតិ ដោយបំពេញនូវគោលបំណងជាមូលដ្ឋាន និងបង្កើតនូវឱកាសការងារជាច្រើន ព្រមទាំងបង្កើនប្រាក់ចំណូលខ្ពស់ដល់សង្គម និងបានចូលរួមដ៏សកម្មក្នុងកំណើននៃសេដ្ឋកិច្ចជាតិ ពិសេសពាក់ព័ន្ធទៅនឹងការវិនិយោគលើវិស័យនេះដោយផ្ទាល់។ បើតាមការបញ្ជាក់របស់ លោក លី រស្មី។
ក្រៅពីចិន និងជប៉ុន ដែលបានចូលរួមវិនិយោគច្រើនក្នុងវិស័យសំណង់នៅកម្ពុជា វិនិយោគិននៅតំបន់អឺរ៉ុប ក៏មានការវិនិយោគច្រើនគួរឱ្យកត់សម្គាល់ដែរ។ បើតាមការថ្លែងរបស់ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបន្តថា ទុនវិនិយោគដែលហូរចូលមកប្រទេសកម្ពុជា តាមរយៈវិស័យសំណង់បានចូលរួមចំណែកយ៉ាងច្រើនក្នុងការពង្រីកសក្តានុពលសេដ្ឋកិច្ចជាតិ ព្រោះអ្នកវិនិយោគទាំងនេះបាននាំយកទុនពីបរទេសមកចាក់ចូលនៅក្នុងចរន្តសេដ្ឋកិច្ចកម្ពុជា។
ប្រទេសដែលជាប់លំដាប់ថ្នាក់មានការវិនិយោគវិស័យសំណង់ច្រើនជាងគេទាំងនេះ ភាគច្រើនវិនិយោគលើខុនដូ អាផាតមិន និងតំបន់ប្រមូលផ្តុំការិយាល័យសម្រាប់ជួល។ បើតាមការលើកឡើងបន្តរបស់ លោក ច្រឹក សុខនីម បានបន្ថែមថា ទោះយ៉ាងណាយើងឃើញថាវិបត្តិកូវីដ -១៩ នៅតែបន្តជះឥទ្ធិពលមិនល្អលើវិស័យនេះ។
ក្នុងរយៈពេលជិត ២២ឆ្នាំកន្លងមកនេះ ក្រសួងរៀបចំដែនដី បានចេញលិខិតអនុញ្ញាតសាងសង់នៅទូទាំងប្រទេសចំនួន ៥៧,៥៩០គម្រោង និងទុនវិនិយោគ ៦៦,២០៥លានដុល្លារ ក្នុងនោះគម្រោងអគារខ្ពស់ៗចាប់ពី ៥ជាន់ឡើងនៅទូទាំងប្រទេសមាន ២,៤៧២អគារ គម្រោងបុរីលំនៅឋាន និងលំនៅឋានមានលក្ខណៈជាបុរីមានចំនួន ៤៨២គម្រោង។ បើតាមរបាការណ៍របស់ក្រសួងរៀបចំដែនដី នគរូបនីយកម្ម និងសំណង់៕
ដោយ៖ មឿន ឌីណា (Moeun Dyna)
