ភ្នំពេញ៖ ក្នុងឆមាសទី១ ឆ្នាំ២០២២ កម្ពុជាបានបាត់បង់ចំណូលពន្ធគយ ប្រមាណ ១៨៧លានដុល្លារ ដោយការអនុវត្តកិច្ចព្រមព្រៀងពាណិជ្ជកម្មសេរី ឡើងប្រមាណ ៧,៣៤% ធៀបនឹងឆមាសទី១ ឆ្នាំ២០២១។ របាយការណ៍សង្ខេបស្តីពី «សកម្មភាពការងារប្រចាំឆមាសទី ១ ឆ្នាំ ២០២២» របស់ក្រសួងសេដ្ឋកិច្ច និងហិរញ្ញវត្ថុ។
ការប្រមូលចំណូលពន្ធគយក្នុងផ្នែកមួយចំនួនមិនមានភាពវិជ្ជមានទេ ដោយសារតែកំណើននៃចង្វាក់ផ្គត់ផ្គង់ក្នុងស្រុកចាប់ផ្តើមបំពេញតួនាទីជំនួសឱ្យការនាំចូល។ បើតាមរបាយការណ៍របស់ ក្រសួងសេដ្ឋកិច្ច បានបន្តទៀតថា កំណើននៃផលិតកម្មក្នុងស្រុកទាំងនោះមានដូចជា ស្រាបៀរ ស៊ីម៉ងត៍ ភេសជ្ជៈ បារី និងយានយន្តដែលបានធ្វើឱ្យកម្ពុជាបាត់ចំណូលពន្ធនាំចូលប្រមាណ ៥២៦.៧៣លានដុល្លារក្នុងឆមាសទី១ ឆ្នាំ២០២២ ធៀបនឹងឆ្នាំ២០២១។
នៅក្នុងរបាយការណ៍ដដែលបានបន្ថែមថា ផលប៉ះពាល់ចំណូលទាំងនោះមានទឹកប្រាក់សរុបចំនួន ៥២៦.៧៣លានដុល្លារ ដោយក្នុងនោះពីស្រាបៀរមានចំនួន ២៣៨លានដុល្លារ ស៊ីម៉ងត៍ ១០១.៨៥លានដុល្លារ ភេសជ្ជៈគ្មានជាតិសុរា ៨៤.៦២លានដុល្លារ បារី ១៧.៤២លានដុល្លារ ការដំឡើងរថយន្ដ ៧.៤៥លានដុល្លារ ការដំឡើងទោចក្រយានយន្ដ ៧៤.៤៧លានដុល្លារ និងការដំឡើងត្រីចក្រយានយន្ដ ៣.៣៦លានដុល្លារ។
បើតាមភ្នំពេញប៉ុស្តិ៍ ដែលបានស្រង់សំដី លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច និងហិរញ្ញវត្ថុថា ការអនុវត្តកិច្ចព្រមព្រៀងពាណិជ្ជកម្មសេរីរវាងកម្ពុជា និងប្រទេសដៃគូគឺពិតជាបានធ្វើឱ្យរដ្ឋាភិបាលបាត់បង់នូវចំណូលពន្ធគយ ប៉ុន្តែ វាបានផ្តល់នូវឱកាសដល់កម្ពុជាក្នុងការពង្រីកទីផ្សារប្រកួតប្រជែង ការបង្កើតការងារនិងការទាក់ទាញវិនិយោគលើវិស័យផលិតកម្មច្រើនជាងមុន។
លោក បានលើកឡើងបន្តថា ជាធម្មតានៅពេលដែលយើងអនុវត្តពាណិជ្ជកម្មសេរីទៅវិញទៅមកមានន័យថា យើងកាត់បន្ថយពន្ធខាងយើង ខាងគេក៏កាត់បន្ថយពន្ធ ដូច្នេះយើងបានចំណេញទីផ្សារ យើងអាចបង្កើនទីផ្សារប្រកួតប្រជែង ដោយសារតែយើងបើករបាំងនាំចូល ខាងគេក៏បើករបាំងនាំចូល ហេតុនេះការប្រកួតប្រជែងមានទៅវិញទៅមក អ៊ីចឹងយើងបានចំណេញទីផ្សារ យើងបង្កើនការនាំចេញ ហើយចង្វាក់ផលិតកម្មនៅក្នុងស្រុកយើងក៏កើនទៅតាមនោះដែរ។
ការបាត់ចំណូលនេះ ទោះបីវាហាក់ដូចជាធំពិតមែន ប៉ុន្តែ យើងត្រូវមើលថាការបង្កើនចង្វាក់ផលិតកម្មនៅក្នុងស្រុកវាជាការបង្កើតឱ្យមានការផ្តល់ឱកាសការងារដល់ប្រជាពលរដ្ឋយើងនៅក្នុងស្រុក ហើយពន្ធក្នុងស្រុកក៏នឹងកើនឡើងផងដែរ។ បើតាមការបញ្ជាក់របស់ លោក មាស សុខសេនសាន្ត។
បើតាមភ្នំពេញប៉ុស្តិ៍ដដែល ក៏បានស្រង់សំដី លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាថា ចំពោះការបាត់បង់ចំណូលពន្ធគយ ដោយសារតែកិច្ចព្រមព្រៀងពាណិជ្ជកម្មសេរីនេះ ដោយសារតែមានផលិតផលជាច្រើនបាននាំចូលពីប្រទេសចិន ដែលកម្ពុជាបានអនុវត្តកិច្ចព្រមព្រៀងពាណិជ្ជកម្មសេរីកម្ពុជា-ចិន។
លោក បានលើកឡើងដូច្នេះថា ទោះបីជាអតុល្យភាពនៃការនាំចូល និងការនាំចេញក៏ដោយ ក៏ការនាំចេញរបស់កម្ពុជាទៅកាន់ប្រទេសចិនមានកំណើនខ្ពស់ជាងមុន ដែលធ្វើឱ្យចំណូលបានមកពីផលិតកម្មនៅក្នុងស្រុក និងអាចបង្កើតការងារជូនប្រជាពលរដ្ឋ និងជំរុញផលិតផលក្នុងស្រុកប្រសើរជាងមុន។
ការបាត់បង់ចំណូលពីពន្ធគយ ១៨៧លានដុល្លារនោះ វាគឺជាកត្តារួមចំណែកមួយនៃការកាត់បន្ថយចំណូលរបស់រដ្ឋាភិបាល ក៏ប៉ុន្តែ ការជំនួសមកវិញនៃចំណូលពន្ធដារនឹងការបង្កើតការងារជូនប្រជាពលរដ្ឋពិតជាមានសារៈសំខាន់ និងភាពប្រសើរជាជាងការនាំចូល។ បើតាមការបញ្ជាក់របស់ លោក គី សេរីវឌ្ឍន៍៕
ដោយ៖ មឿន ឌីណា (Moeun Dyna)
