ភ្នំពេញ៖ រយៈពេល៧ខែ ឆ្នាំ២០២២នេះ កម្ពុជាទទួលបានចំណូលពីការនាំចេញអង្ករនិងស្រូវ ចំនួន ៧០៥.១៤លានដុល្លារ។ បើតាមរបាយការណ៍ របស់សហព័ន្ធស្រូវអង្ករកម្ពុជា។

នៅក្នុងរបាយការណ៍ របស់សហព័ន្ធស្រូវអង្ករកម្ពុជា បានបន្តឱ្យដឹងបន្តថា ការនាំចេញអង្ករចេញចំនួន ៣៥០,៩០២តោន គិតជាទឹកប្រាក់ចំនួន ២១៨.១៧លានដុល្លារ។

ការនាំអង្ករទៅទីផ្សារអន្តរជាតិ មានចំនួន ៥៣ក្រុមហ៊ុន ទៅកាន់គោលដៅចំនួន ៥៦ប្រទេស រួមមាន៖

ប្រទេសចិន ម៉ាកាវ និងហុងកុង បានចំនួន ១៦៩,៧៦៦តោន ស្មើនឹង ៤៨.៣៨% នៃការនាំចេញសរុបដែលគិតជាទឹកប្រាក់ចំនួន ៨៩.០៩លានដុល្លារ។ នាំចេញទៅកាន់ប្រទេស នៅក្នុងតំបន់សហគមន៍អឺរ៉ុបចំនួន ២៥ប្រទេស បានបរិមាណចំនួន ១២២,៨៤២តោន ស្មើនឹង៣២% នៃការនាំចេញសរុប ដែលគិតជាទឹកប្រាក់ ចំនួន ៨៦.០៨លានដុល្លារ។

ជាមួយគ្នានោះ នាំចេញទៅកាន់ប្រទេសអាស៊ានចំនួន ៤ប្រទេស ចំនួន ២៩,៩៥៧តោន ស្មើនឹង ៩% នៃការនាំចេញសរុប ដែលគិតជាទឹកប្រាក់ចំនួន ២០.០៨លានដុល្លារ និងបណ្តាលគោលដៅផ្សេងៗទៀត ចំនួន ២៤ប្រទេស ចំនួន២៨,៣៣៧តោន ស្មើនឹង ១០.៦២% គិតជាទឹកប្រាក់ ២២.៩២លានដុល្លារ។

ការនាំចេញសរុបមានកំណើន ១៣.២៤% បើប្រៀបធៀបទៅនឹងការនាំចេញ ក្នុងរយៈពេលដូចគ្នាក្នុងឆ្នាំ២០២១។ បើតាមការបញ្ជាក់ នៅក្នុងរបាយការណ៍ខាងលើ បានបន្តថា ៧ខែកន្លងមកនេះ អង្ករក្រអូបគ្រប់ប្រភេទបាននាំចេញចំនួន ៦៣.៦៤% អង្ករស ចំនួន ៣២.៤២% អង្ករចំហុយចំនួន ២.២៣% អង្ករសរីរាង្គចំនួន ១.៧% និងអង្ករដំណើបបានចំនួន ២៣តោន។

បើតាមការរបាយការណ៍ដដែលបានបន្ថែមថា ក្នុងរយៈពេល៧ខែ កម្ពុជា បាននាំចេញស្រូវទៅប្រទេសវៀតណាម បានចំនួន ១,៩៥០,៩៨៦តោន ដែលគិតជាទឹកប្រាក់ប្រមាណ ៤៨៧.២៤លានដុល្លារ៕

ដោយ៖ មឿន ឌីណា (Moeun Dyna)