ភ្នំពេញ៖ រយៈពេល ៥ខែ ដើមឆ្នាំ២០២២ គម្រោងដែលទទួលបានការអនុញ្ញាតឱ្យសាងសង់ មានចំនួនសរុប ១,៦៧៩គម្រោង បានធ្លាក់ចុះ ៨,២% បើធៀបទៅនឹងឆ្នាំ២០២១ មានចំនួន ១៨២៩គម្រោង។ បើតាមរបាយការណ៍និន្នាការសេដ្ឋកិច្ច-សង្គម របស់ក្រសួងសេដ្ឋកិច្ច និងហិរញ្ញវត្ថុ។
នៅក្នុងរបាយការណ៍បានឱ្យដឹងបន្តថា ក្នុងនោះប្រភេទសំណង់លំនៅឋានមាន ១,៥២៤គម្រោង ស្មើនឹង ៩០,៨% នៃសំណើសុំសាងសង់សរុប បានធ្លាក់ចុះ ៨៣គម្រោង បើធៀបទៅនឹងរយៈពេលដូចគ្នាឆ្នាំ២០២១។ ចំណែកទុនវិនិយោគមានចំនួនសរុប ៩៥២លានដុល្លារ បានធ្លាក់ចុះ ៥៩,៥%។
បើតាមរបាយការរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងឆ្នាំ២០២១ ក្រសួងបានអនុម័តលើគម្រោងសាងសង់ទូទាំងប្រទេសចំនួន ៤,៣០៣គម្រោង និងមានទុនវិនិយោគជាង ៥,៣៣ពាន់លានដុល្លារ។ ទុនវិនិយោគនេះបើធៀបនឹងឆ្នាំ២០២០ បានថយចុះ ៣១,២១%។
គូសបញ្ជាក់ថា ទោះបីរាជរដ្ឋាភិបាល បានប្រកាសបើកប្រទេសឡើងវិញតាំងពីខែវិច្ឆិកា ឆ្នាំ២០២១ សកម្មភាពនៃការផ្លាស់ប្តូរពាណិជ្ជកម្មជាអន្តរជាតិរបស់កម្ពុជាចាប់ផ្តើមមានសម្ទុះឡើងវិញជាបន្តបន្ទាប់ ក៏វិស័យសំណង់មិនទាន់មានសញ្ញាវិជ្ជមាននោះទេ។
លោក ហ៊ុយ វណ្ណា អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា ដែលបានផ្ដល់បទសម្ភាសទៅកាសែតភ្នំពេញប៉ុស្តិ៍ ទាក់ទងនឹងវិស័យសំណង់នេះ បានលើកឡើងថា មិនត្រឹមតែធ្វើឱ្យគម្រោងសាងសង់ធំៗ ពិសេសគម្រោងដែលមានម្ចាស់ជាអ្នកវិនិយោគបរទេសត្រូវជាប់គាំង ឬថយល្បឿនសាងសង់ប៉ុណ្ណោះទេ ប៉ុន្តែវាក៏ធ្វើឱ្យអ្នកមានបំណងវិនិយោគនៅក្នុងវិស័យសំណង់ជាច្រើនសម្រេចពន្យារពេលដែរ។
ការវិនិយោគលើវិស័យសំណង់ គឺត្រូវការពេលវេលាយូរ និងទុនវិនិយោគច្រើន ដូច្នេះវិស័យនេះនឹងមិនមានសម្ទុះឡើងលឿនដូចវិស័យមួយចំនួនទៀតទេ។ បើតាមការលើកឡើងរបស់ លោក ហ៊ុយ វណ្ណា បានបន្ថែមថា វិបត្តិបណ្តាលពីកូវីដ- ១៩ ដែលពិភពលោកនៅមិនទាន់អាចគ្រប់គ្រងបានក្នុងពេលបច្ចុប្បន្ន នឹងបន្តជះឥទ្ធិពលអវិជ្ជមានបន្តទៀតក្នុងវិស័យសំណង់នៅគ្រប់ប្រទេសលើពិភពលោក រួមទាំងកម្ពុជាផងដែរ។
សម្រាប់រយៈពេលខ្លីវិស័យសំណង់នៅកម្ពុជា នឹងមិនអាចមានសម្ទុះឡើងវិញទេ ពិសេសសំណង់ធំៗដែលមានម្ចាស់ជាអ្នកវិនិយោគបរទេស។ សម្រាប់សំណង់លំនៅឋានដែលវិនិយោគដោយអ្នកនៅក្នុងស្រុក គឺមានដំណើរទៅមុខជាធម្មតា ព្រោះតម្រូវការនេះ គឺនៅតែមានជាប្រចាំ។ បើតាមគូសបញ្ជាក់ របស់ ហ៊ុយ វណ្ណា បានបន្ថែមទៀតថា វិស័យសំណង់នៅកម្ពុជា ពិសេសសំណង់ធំៗ នឹងមានសម្ទុះឡើងវិញនៅពេលដែលការធ្វើដំណើររបស់អ្នកវិនិយោគ និងភ្ញៀវទេសចរមានចំនួនច្រើនដូចមុនពេលមានវត្តមានរបស់ជំងឺកូវីដ -១៩៕
ដោយ៖ មឿន ឌីណា (Moeun Dyna)
