បាត់ដំបង៖ រាជរដ្ឋាភិនបាល បានផ្ដល់ដីសម្បទានសង្គមកិច្ច ១០៤ហិកតា ដល់អតីយុទ្ធជន ១០៤គ្រួសារ ស្ថិតនៅក្នុងភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។
មន្ទីររៀបចំដែនដីនគរូបនីយកម្មសំណង់ និងសុរិយោដីខេត្តបាត់ដំបង បានសហការជាមួយក្រុមជំនួយការអគ្គលេខាធិការសមាគមអតីតយុទ្ធជនកម្ពុជា ចុះវាស់វែងកំណត់ទីតាំងដី និងសាងសង់ផ្ទះ ជូនគ្រួសារអតីតយុទ្ធ។ បើតាមការថ្លែងរបស់ លោក គន់ រ័ត្នមុនី អនុប្រធានក្រុមជំនួយការអគ្គលេខាធិការសមាគមអតីតយុទ្ធជនកម្ពុជា។
លោក បានបញ្ជាក់ថា ដីដែលបានវាស់វែង ត្រូវផ្តល់ឱ្យតែអតីតយុទ្ធជននៅក្នុងខេត្តបាត់ដំបងប៉ុណ្ណោះ។ តាមគម្រោងដែលបានចាប់ឆ្នោតរួចហើយ គឺមានចំនួន ១០៤គ្រួសារ ក្នុង១គ្រួសារ ទទួលបានដី ១ហិកតា ផ្ទះ១ខ្នង និងបន្ទប់ទឹក១។
នៅក្នុងពិធីបើកសម្ពោធសាងសង់ផ្ទះជូនអតីតយុទ្ធជន កាលពីដើមខែកក្កដា ឆ្នាំ២០២២ លោក គន់ គីម ទេសរដ្ឋមន្ត្រីទទួលបន្ទុកកិច្ចការអតីតយុទ្ធជន និងជនពិការ បានថ្លែងថា ក្នុង ១ខ្នងផ្ទះ រួមជាមួយនឹងបន្ទប់ទឹក ចំណាយប្រមាណ ៤ ៥០០ដុល្លារ គម្រោងសាងសង់យ៉ាងយូរ ៣ខែ នឹងបញ្ចប់ការសាងសង់ជាស្ថាពរ។
ដីសម្បទានសង្គមកិច្ចត្រូវបានរាជរដ្ឋាភិបាល សម្រេចផ្តល់ជូនដល់អតីតយុទ្ធជននៅក្នុងខេត្តបាត់ដំបង ដែលកំពុងទទួលរងនូវផលលំបាកជីវភាពរស់នៅសម្រាប់ធ្វើការសាងសង់ផ្ទះ និងធ្វើកសិកម្ម ដើម្បីធ្វើឱ្យជីវភាពរបស់ពួកគាត់កាន់តែល្អប្រសើរ។ បើតាមការលើកឡើងរបស់ លោក សុខ លូ អភិបាលខេត្តបាត់ដំបង។
គូររម្លឹកថា កាលពីថ្ងៃទី ៣០ ខែ មិថុនា ឆ្នាំ ២០២២ លោក គន់ គីម បានចាប់ឆ្នោតប្រគល់ដីសម្បទានសង្គមកិច្ច (ដីលំនៅឋាន និងដីកសិកម្ម) ព្រមទាំងបើកការដ្ឋានសាងសង់ផ្ទះជូនអតីតយុទ្ធជននៅស្រុកគាស់ក្រឡ ខេត្តបាត់ដំបង ចំនួន ១០៤ គ្រួសាររួចរាល់ហើយ។ ក្នុង ១គ្រួសារ ទទួលបានផ្ទះទំហំ ៥ម៉ែត្រគុណនឹង ៧ម៉ែត្រ និងដី ១ហិកតា ដែលជាអំណោយរបស់សម្ដេចតេជោ នាយករដ្ឋមន្ត្រី ហ៊ុន សែន ប្រធានសមាគមអតីតយុទ្ធជនកម្ពុជា៕
ដោយ៖ មឿន ឌីណា (Moeun Dyna)
