ភ្នំពេញ៖ អាកាសយានដ្ឋានអន្តរជាតិតេជោ បច្ចុប្បន្នបាននឹងកំពុង​សាងសង់​នៅលើទំហំប្រមាណ ២៦០០ហិកតា ​នៅក្នុងភូមិសាស្ត្រខេត្តកណ្តាល ​ជាប់ខេត្តតាកែវ និងមានចំងាយពីប្រមាណ ២០គីឡូម៉ែត្រ ពីរាជធានីភ្នំពេញ បានចំណាយថវិកា​អស់ប្រមាណ ៤៦១លានដុល្លា វឌ្ឍនភាពសម្រេចបាន ៣៥%។

លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានថ្លែងថា គម្រោងសាងសង់​ព្រលានសម្រាប់ចុះចត​យន្ត​ហោះខ្នាត​យក្ស 4F នឹងបញ្ចប់ការសាងសង់នៅ២០២៤ ហើយដាក់ឱ្យដំណើរការផ្លូវ​នៅ​ដើម​ឆ្នាំដើម២០២៥ ​ខណៈ បច្ចុប្បន្នអាកាសយានដ្ឋានអន្តរជាតិតេជោ សម្រេចការសាងសង់​បានជាង ៣៥ភាគរយហើយ។

អាកាសយានដ្ឋានអន្តរជាតិតេជោក្រុងតាខ្មៅ បានចាប់ផ្តើម​ដំណើរ​កសាងសង់កាលពីថ្ងៃទី៧ ​ខែមករា ឆ្នាំ២០២០ ​ហើយក្នុងរយៈពេលជាង ២ឆ្នាំនេះ បើទោះ​ជា​កម្ពុជាជួបវិបត្តិកូវីដ-១៩ យ៉ាងណាក៏ដោយ ក៏ដំណើរការការសាងសង់ព្រលាន​យន្តហោះ​អន្តរជាតិ​មួយនេះ ​នៅតែបន្តដំណើរការការសាងសង់យ៉ាងសកម្មភាព នៅលើប្លង់ព្រលានយន្តហោះលំដាប់​ផ្កាយ៥ និងមានរចនាបថទំនើបរបស់អន្តរជាតិ។ បើតាមការថ្លែងបន្តរបស់ លោក ម៉ៅ ហាវណ្ណាល់។

កាលពីពាក់កណ្ដាលខែមិថុនានេះ លោក ម៉ៅ ហាវណ្ណាល់ អ្នកវិនិយោគជាច្រើនរូបទៀត បានអញ្ជើញទស្សនាគម្រោងសាងសង់អាកាសយានដ្ឋានអន្តរជាតិតេជោក្រុងតាខ្មៅ នៅខេត្តកណ្តាល លោក បានថ្លែងបញ្ជាក់ថា ពេលដែលអាកាសយានដ្ឋានអន្តរជាតិតេជោ សាងសង់រួចហើយ គឺកម្ពុជា អាចនឹងទទួលប្រភេទយន្តហោះខ្នាតយក្ស ​ដឹកអ្នកដំណើរអន្តរជាតិ ​ឆ្លងទ្វីបមកពីប្រទេសឆ្ងាយៗ មកចុះចត​នៅរាជធានីភ្នំពេញនេះ ​ជាពិសេសនៅពេលដែលកម្ពុជាមានកំណើនអ្នកដំណើរអន្តរជាតិ និងភ្ញៀវទេសចរអន្តរជាតិនៅឆ្នាំបន្តបន្ទាប់ខាងមុខ។

លោក ឆារស៍ វ៉ាន់ អគ្គនាយករង ក្រុមហ៊ុន OCIC និងប្រធានក្រុមហ៊ុន ​Cambodia Airport Investment (CAIC) បានថ្លែងថា ​អាកាសយានដ្ឋានអន្តរជាតិតេជោ បច្ចុប្បន្នបាននឹងកំពុង​សាងសង់​នៅលើទំហំប្រមាណ ២៦០០ហិកតា ​នៅក្នុងភូមិសាស្ត្រខេត្តកណ្តាល ​ជាប់ខេត្តតាកែវ និងមានចំងាយពីប្រមាណ ២០គីឡូម៉ែត្រ ពីរាជធានីភ្នំពេញ ។

ការសាងសង់មាន ៣ដំណាក់កាល ​ក្នុងនោះដំណាក់កាលទី១ ក្រុមហ៊ុន​បាននឹងកំពុងសាងសង់ផ្លូវរត់ចំងាយ ៤គីឡូម៉ែត្រ សម្រាប់ចុះចតយន្តហោះខា្នតយក្ស 4F និងមាន​សមត្ថភាព​ទទួលអ្នកដំណើរបានជាង ១៥លាននាក់ក្នុង១ឆ្នាំ។​ បើតាមការថ្លែងបន្តរបស់ លោក ឆារស៍ វ៉ាន់។

លោក បានបន្តទៀតថា នៅឆ្នាំ២០៣០ ដំណាក់​កាលទី២​ ក្រុមហ៊ុននឹងពង្រីកសាងសាងអាចទទួលអ្នកដំណើររហូតដល់ ៣០លាននាក់ ក្នុង១ឆ្នាំនៅឆ្នាំ២០៥០ និងដំណាក់កាលទី៣​ បន្តពង្រីកសាងសង់​ ដើម្បីទទួលអ្នកដំណើរជាតិអន្តរជាតិ​ឱ្យបាន ៤៥លាននាក់​ក្នុង១ឆ្នាំ ​នៅឆ្នាំ២០៥០តទៅ។

សូមបញ្ជាក់ថា CAIC​ គឺជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា ដែលតំណាង​ដោយ​រដ្ឋលេខាធិការដ្ឋានអាកាសចរស៊ីវិល និងក្រុមហ៊ុន OCIC ។ ​រាជរដ្ឋាភិបាលកម្ពុជា បានផ្តល់សិទ្ធិឱ្យក្រុមហ៊ុន ​CAIC ក្នុងការកាន់កាប់ ​រចនា ប្លង់សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការ​គម្រោង អាកាសយានដ្ឋានអន្តរជាតិតេជោក្រុងតាខ្មៅ ខេត្តកណ្តាល៕

ដោយ៖ មឿន ឌីណា (Moeun Dyna)