ភ្នំពេញ៖ រយៈពេល ៥ខែ ចាប់ពីខែមករា ដល់ឧសភា ឆ្នាំ២០២២ ចំណូលពីការនាំចេញជ័រកៅស៊ូ និងឈើកៅស៊ូ មានចំនួន ១៧០,២៨២,០៣១ដុល្លារ ក្នុងនោះ ជ័រកៅស៊ូមានចំនួន ១៦៨,៤៦៨,៦៤០ដុល្លារ និងឈើកៅស៊ូមានចំនួន ១,៨១៣,៣៩១ដុល្លារ។ នេះបើតាមរបាយការណ៍ របស់អគ្គនាយកដ្ឋានកៅស៊ូ។
ការនាំចេញជ័រកៅស៊ូក្នុងបរិមាណ ១០៥,០៤៨តោន ៥ខែឆ្នាំ២០២២ មានការកើនឡើង ៣% ខណៈដែលតម្លៃបានថយចុះ ៧១ដុល្លារ ក្នុង១តោន បើធៀបនឹងរយៈពេលដូចគ្នាក្នុងឆ្នាំ២០២១។ បើតាមរបាយការណ៍ខាងលើ បានបន្តថា គិតត្រឹមខែឧសភា ឆ្នាំ២០២២ តម្លៃ ១,៦០៤ដុល្លារ ក្នុង១តោន បានថយចុះចំនួន ៧១ដុល្លារ ក្នុង១តោន ស្មើនឹង ៤% ធៀបនឹងរយៈពេលដូចគ្នាឆ្នាំ២០២១។
លោក ហ៊ឹម អូន អគ្គនាយកនៃអគ្គនាយកដ្ឋានកៅស៊ូ បានមានប្រសាសន៍ឱ្យដឹងថា ក្នុងខែឧសភា តម្លៃមធ្យមនៃប្រភេទកៅស៊ូធម្មជាតិបានបង្ហាញការធ្លាក់ចុះរបស់ទីផ្សារអរន្តជាតិ បើធៀបខែមេសា។
លោក បានមានប្រសាសន៍បន្តទៀតថា ចំពោះកម្ពុជាទីផ្សារកៅស៊ូ គឺអាស្រ័យទីផ្សារអន្តរជាតិ ព្រោះជាផលិតផលនាំចេញស្ទើរតែ ១០០% ការធ្លាក់នេះបណ្តាលមកពី ការភ័យខ្លាចនៃអតិផរណា ការដំឡើងអត្រាការប្រាក់នៅក្នុងអាមេរិក តម្លៃរូបិយប័ណ្ណធ្លាក់ចុះក្នុងបណ្តាប្រទេសនាំចេញកៅស៊ូសំខាន់ៗ និងការបន្តបិទខ្ទប់ក្នុងផ្នែកខ្លះនៃប្រទេសចិន។
សូមរម្លឹកថា គិតត្រឹមឆ្នាំ២០២១ ផ្ទៃដីកៅស៊ូសរុបមានចំនួន ៤០៤,០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០, ១៩៣ហិកតា កើនឡើងជាង ៦% ធៀបនឹងគ្រាដូចគ្នាក្នុងឆ្នាំ២០២០។
តាមរយៈកំណើននេះ អគ្គនាយកដ្ឋានកៅស៊ូបានព្យាករថា ចាប់ពីឆ្នាំ២០២២ កម្ពុជានឹងអាចនាំចេញកៅស៊ូបានជាមធ្យម ៤០ម៉ឺនតោន ក្នុង១ឆ្នាំៗ ដោយនឹងអាចនាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី ក៏ដូចជាអាចផ្គត់ផ្គង់ទីផ្សារក្នុងស្រុកបានផងដែរ៕
ដោយ៖ មឿន ឌីណា (Moeun Dyna)
