ភ្នំពេញ៖ រយៈពេល ៥ខែ ចាប់ពីខែមករា ដល់ឧសភា ឆ្នាំ២០២២ កម្ពុជានាំចេញកសិផលក្រៅពីស្រូវ-អង្ករ ប្រមាណ ៣,២៣៣,៩៩៨.៨៣តោន គិតជាទឹកប្រាក់ជាង ១៣៩៨លានដុល្លារ។ តាមរបាយការណ៍ពីអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានបន្តថា ៥ខែឆ្នាំនេះកើន ១៣៤,៤៧៥.៩៥តោន ស្មើនឹង ៤,៣៤% បើធៀបនឹងគ្រាដូចគ្នាក្នុងឆ្នាំ២០២១។
នៅក្នុងរបាយការណ៍អគ្គនាយកដ្ឋានកសិកម្ម បានបញ្ជាក់ថា គេសង្កេតឃើញថា មានតែផលិតផលដំឡូងមី ថ្នាំជក់ សណ្តែកសៀង និងបន្លែចម្រុះប៉ុណ្ណោះ ដែលកើនឡើង ក្រៅពីនេះគឺសុទ្ធតែថយចុះ ជាពិសេសការនាំចេញទៅកាន់ប្រទេសចិន។
ការនាំចេញកសិផលភាគច្រើន ជាពិសេសទៅចិនធ្លាក់ចុះ ដោយសារកត្តាមួយចំនួនដូចជា កង្វះទូត្រជាក់សម្រាប់ផ្ទុកកសិផល ការរឹតបន្តឹងការត្រួតពិនិត្យទំនិញដើម្បីទប់ស្កាត់ការឆ្លងរាលដាលជំងឺកូវីដ-១៩ ស្របតាមយុទ្ធសាស្ត្រគ្មានការរាលដាលឆ្លងជំងឺកូវីដ-១៩ ពីប្រទេសខាងក្រៅនៅតាមបណ្តាច្រកទ្វារនាំចូលប្រទេសចិន-វៀតណាម និងការរឹតបន្តឹងលក្ខខណ្ឌអនាម័យ និងភូតគាមអនាម័យ ដែលមកពីការរកឃើញវត្តមានកូវីដ-១៩ នៅលើសម្បកកេសវេចខ្ចប់ផ្លែចេកពីសំណាក់អាជ្ញាធរគយប្រទេសចិន។ បើតាមការលើកឡើងរបស់ លោក វេងសាខុន រដ្ឋមន្រ្តីក្រសួងកសិកម្ម រិក្ខាប្រមាញ់និងនេសាទ។
លោក វេង សាខុន បានលើកឡើងបន្តថា ការខ្វះខាតទូត្រជាក់សម្រាប់ផ្ទុកកសិផល បណ្តាលឱ្យទូត្រជាក់ឡើងថ្លៃជាខ្លាំង បើធៀបទៅនឹងមុនវិបតិ្តកូវីដ-១៩ បច្ចុប្បន្នតម្លៃបានកើនរហូតដល់ជាង ៣ដង។ លោក បានបន្ថែមថា ជាមួយគ្នានេះការនាំចេញទៅប្រទេសវៀតណាមក៏មានការថយចុះ ដោយសារការនាំចេញពីប្រទេសវៀតណាម ទៅប្រទេសចិន អាចដំណើរការទៅបានតិចតួចដោយសារវិបត្តិកូវីដ-១៩ ជាហេតុធ្វើឱ្យក្រុមហ៊ុនមួយចំនួនត្រូវអាក់ខាននាំចេញមួយរយៈ និងក្រុមហ៊ុនខ្លះទុកចោលមិនប្រមូលផល។
គូសបញ្ជាក់ថា ការប៉ាន់ស្មានតម្លៃគិតជាទឹកប្រាក់ក្នុងរយៈពេល៥ខែ ដើមឆ្នាំ២០២២ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន ១,៩៥០.៦៩លានដុល្លារ ក្នុងនោះការនាំចេញអង្ករមានទឹកប្រាក់ ២៤២.៥៤លានដុល្លារ, ការនាំចេញស្រូវមានចំនួន ៣០៩.២០ លានដុល្លារ និងការនាំចេញកសិផលក្រៅពីស្រូវ-អង្ករមានចំនួនជាង ១៣៩៨ លានដុល្លារ៕
ដោយ៖ មឿន ឌីណា (Moeun Dyna)
