ភ្នំពេញ៖ ការនាំចេញ នាំចូលទំនិញរវាងប្រទេសកម្ពុជា និងម៉ាឡេស៊ី ចាប់ពីខែមករា ដល់ខែមេសា មានតម្លៃសរុប ២០៥.១៧លានដុល្លារ កើនឡើងពីចំនួន ១៥២.៩២លានដុល្លារ កើន៣៤,៧ ភាគរយ ធៀបទៅនឹងឆ្នាំ២០២១។ បើតាមរបាយការណ៍ អគ្គនាយកដ្ឋានគយ និងរដ្ឋាករកម្ពុជា។
ការនាំចេញទំនិញពីកម្ពុជា ទៅម៉ាឡេស៊ី មានតម្លៃជាង ៣៥.១៦លានដុល្លារ ធ្លាក់ចុះ -១,៩% និងការនាំទំនិញពីម៉ាឡេស៊ីមកវិញ មានតម្លៃជាង ១៧០លានដុល្លារ កើនឡើង ៤៦%។ បើតាមរនបាយការណ៍ខាងលើ បានបន្តថា តាមរយៈតួលេខនេះបង្ហាញថា ជញ្ជីងពាណិជ្ជកម្មកម្ពុជា មានឱនភាពប្រមាណ -១៣៤.៨៤លានដុល្លារ ធៀបជាមួយប្រទេសម៉ាឡេស៊ី។
លោក ហុង វណ្ណៈ បានលើកឡើងថា ជាធម្មតានៅក្នុងការធ្វើពាណិជ្ជកម្មអន្តរជាតិរបស់ប្រទេសនីមួយៗ បញ្ហាឱនភាពនិងឧត្តមភាពនៃជញ្ជីងពាណិជ្ជកម្មតែងតែកើតមាន ដោយប្រទេសខ្លះមានតម្រូវការខ្ពស់ចំពោះផលិតផលអ្វីមួយដែលប្រទេសមួយផ្សេងទៀតផលិតបាន និងប្រទេសខ្លះត្រូវការនាំចូលធនធានធម្មជាតិ ឬផលិតផលពាក់កណ្តាលសម្រេច ដើម្បីមកផលិតសម្រាប់បំពេញតម្រូវការប្រើប្រាស់ក្នុងស្រុក និងនាំចេញ។
លោក ហុង វណ្ណៈ អ្នកសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងបន្តថា ចំពោះជញ្ជីងពាណិជ្ជកម្មនេះយើងឃើញមានឱនភានភាពខ្លាំង ប៉ុន្តែវាមិនមែនមានន័យថា កម្ពុជានាំទំនិញពីម៉ាឡេស៊ីមកសម្រាប់ប្រើប្រាស់ក្នុងស្រុកទាំងអស់នោះទេ ព្រោះការនាំចូលមួយចំនួន គឺសម្រាប់ជាធាតុផ្សំ ឬផ្នែកគ្រឿងម៉ាស៊ីន សម្រាប់បម្រើឱ្យការផលិតដើម្បីនាំចេញទៅលក់នៅទីផ្សារអន្តរជាតិ។
ប្រទេសម៉ាឡេស៊ី តែងទិញផលិតផលកសិកម្មមួយចំនួនពីកម្ពុជាមានដូចជា អង្ករ ដូងប្រេង និងម្រេច ជាដើម។ ក្រៅពីនោះក៏មាន ក្រណាត់ និងផលិតផលឧស្សាហកម្មមួយចំនួនទៀត។ បើតាមការលើកឡើងបន្ថែមរបស់ លោក ហុង វណ្ណៈចំណែកផលិតផលសំខាន់ៗដែលកម្ពុជានាំចូលពីប្រទេសម៉ាឡេស៊ីមានដូចជា គ្រឿងបន្លាស់រថយន្ត អាហារ និងភេសជ្ជៈ និងឧបករណ៍អេឡិចត្រូនិកមួយចំនួន។
គូសបញ្ជាក់ថា របាយការណ៍របស់ក្រុមប្រឹក្សាអភិវឌ្ឍន៍កម្ពុជា ក្នុងឆ្នាំ២០២១ ពាណិជ្ជកម្មទ្វេភាគីកម្ពុជា និងម៉ាឡេស៊ី មានទឹកប្រាក់ជាង ៥០០លានដុល្លារ កើនឡើង ១៣.១៤% បើធៀបទៅនឹងឆ្នាំ២០២០។ ក្នុងនោះការនាំចេញពីកម្ពុជា ទៅម៉ាឡេស៊ី មានតម្លៃជាង ១០១លានដុល្លារ កើន ២.៦២% និងការនាំទំនិញពីម៉ាឡេស៊ីមកកម្ពុជាមានតម្លៃជាង ៣៩៩លានដុល្លារ កើន ១៦.១៦%៕
ប្រភព៖ ភ្នំពេញប៉ុស្តិ៍
ដោយ៖ មឿន ឌីណា (Moeun Dyna)
