តាកែវ៖ លិខិតរបស់ទីស្តីការគណៈរដ្ឋមន្ត្រី ដែលចុះហត្ថលេខាដោយលោក ខូយ ឃុនហ៊ួរ រដ្ឋលេខាធិការទីស្តីការគណៈរដ្ឋមន្ត្រី កាលពីថ្ងៃទី១៤ មករា ឆ្នាំ២០២២ បានឱ្យដឹងថា រាជរដ្ឋាភិបាល បានកាត់ដី ៨០០ហិកតា នៅតំបន់ភ្នំតាម៉ៅ ខេត្តតាកែវ ទៅឱ្យក្រុមហ៊ុនមួយឈ្មោះ ក្រុមហ៊ុនខ្មែរ ហ្រ្វេស មីល ឯ.ក (Khmer Fresh Milk) ដើម្បីអភិវឌ្ឍន៍ ដោយរាជរដ្ឋាភិបាល បានទទួលមកវិញនូវដី ១,១២២ហិកតា នៅតំបន់ផ្សេង។

បើតាមលិខិតខាងលើ បាន​ជម្រាប​ជូន​ក្រសួង​សេដ្ឋកិច្ច និង​ហិរញ្ញវត្ថុ​ ក្រសួង​រៀបចំ​ដែនដី នគរូបនីយកម្ម និង​សំណង់​ ក្រសួងកសិកម្ម រុក្ខា​ប្រមាញ់ និង​នេសាទ និង​អភិបាល​ខេត្តតាកែវ​ថា រាជរដ្ឋាភិបាល ​បាន​សម្រេច​ជា​គោលការណ៍​ដោះ​ដូរ​ដី​ចំនួន​ពីរ​ទីតាំង​នៅ​តំបន់​ភ្នំ​តា​ម៉ៅ ស្ថិតក្នុងឃុំកណ្តឹង ស្រុកបាទី ខេត្តតាកែវ ដែល​មាន​ទំហំ​សរុប ​៨០០ហិ​កតា ឱ្យទៅ​ក្រុមហ៊ុន ខ្មែរ ហ្វ្រេ​ស មី​ល។ តាម​រយៈ​ការ​ដោះ​ដូរ​នេះ រាជរដ្ឋាភិបាល​ទទួល​បាន​ដី​ ១​,​១២២​ហិ​កតា ​ជា​ថ្នូរ​ត្រឡប់​មក​វិញ។

ទីតាំង​ដោះ​ដូរ​ទី​១ ​មាន​ទំហំ ​៣០០​ហិ​កតា គឺជា​ទីតាំង​ដី​ស្ថានីយ​ចិញ្ចឹម​គោ​ពូ​ភ្នំ​តា​ម៉ៅ​ដែល​គ្រប់គ្រង​ដោយ​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ​នៃ​ក្រសួងកសិកម្ម​។ សម្រាប់​ការ​ដោះ​ដូរ​ទីតាំង​ទី​១​នេះ រាជរដ្ឋាភិបាល​ទទួល​បាន​ដី ​៤០០​ហិ​កតា ដែល​ស្ថិត​ក្នុងស្រុក​ទឹកផុស ខេត្តកំពង់ឆ្នាំង រួម​ទាំង​ទ្រព្យសម្បត្តិ​មួយ​ចំនួន​ទៀត ដូច​ជា​អគារ​រដ្ឋបាល អគារ​ស្នាក់​នៅ ក្រោលគោ ឃ្លាំង​ចំណី​សត្វ ឃ្លាំង​សម្ភារ កន្លែង​សម្លាប់​មេរោគ អគារស្នាក់នៅ ក្រោលគោ ឃ្លាំងចំណីសត្វ ឃ្លាំងសម្ភារ កន្លែងសម្លាប់មេរោគ គ្រឿងសង្ហារិម ប៉ុស្តិ៍យាម រថយន្ត​ Van ១គ្រឿង រថយន្ត​ Pick Up ៥គ្រឿង ត្រាក់ទ័រ ៤គ្រឿង និងទោចក្រយានយន្ត ៥០គ្រឿង ។ល។

ចំណែក​ទីតាំង​ទី២ ដែល​មាន​ទំហំ ​៥០០​ហិ​កតា គឺជា​ទីតាំង​ឧទ្យាន​សួនសត្វ និង​មជ្ឈមណ្ឌល​សង្គ្រោះ​សត្វ​ភ្នំ​តា​ម៉ៅ​។ ការប្រគល់តំបន់ដី ៥០០ហិកតានេះ ទៅឱ្យក្រុមហ៊ុនខ្មែរ ហ្វ្រេស មីល ធ្វើឱ្យរាជរដ្ឋាភិបាល ទទួលបានមកវិញនូវតំបន់ដី ២ន្លែង ដោយតំបន់ដី ១កន្លែង មានទំហំ ២៥០ហិកតា ស្ថិតក្នុងស្ថានីយ៍អភិវឌ្ឍន៍ព្រៃឈើបន្ទាយស្រី នៃស្រុកបន្ទាយស្រី ខេត្តសៀមរាប ហើយតំបន់ដី ១កន្លែងទៀត មានទំហំជាង ៤៧២ហិកតា (៤៧២,៨០៩ហិកតា) ស្ថិតក្នុងស្រុកអូររាំង ខេត្តមណ្ឌលគិរី។

ដី ​២៥០​ហិ​កតា​ នៅ​ខេត្តសៀមរាប រាជរដ្ឋាភិបាល​នឹង​បង្កើត​សួនសត្វ Safari Angkor ខណៈ ​ដី​នៅ​ខេត្តមណ្ឌលគិរី រាជរដ្ឋាភិបាល​នឹង​បង្កើត​សួន​ភូតគាម មណ្ឌលគិរី​។ បន្ថែម​លើ​ដី​ទាំង​ពីរ​ទីតាំង​នេះ រដ្ឋាភិបាល​ក៏​ទទួល​បាន​យានយន្ដ​រាប់​សិប​គ្រឿង​បន្ថែម​ទៀត​ផង​ដែរ​។

គូសបញ្ជាក់ថា លិខិតពីទីស្តីការគណៈរដ្ឋមន្រ្តីខាងលើ ពុំបានបញ្ជាក់ថា តំបន់ដីសរុប ១,១២២ហិកតា ដែលរដ្ឋាភិបាលទទួលបាននោះ គឺជាតំបន់ដីរបស់ក្រុមហ៊ុនខ្មែរ ហ្វ្រេស មីល នោះទេ។

លោក វេ​ង សា​ខុន រដ្ឋមន្ត្រី​ក្រសួងកសិកម្ម រុក្ខា​ប្រមាញ់ និង​នេសាទ​ បាន​អះអាង​ថា ការ​ដោះ​ដូរ​ដី​នៅ​តំបន់​ភ្នំ​តា​ម៉ៅ​ជាមួយខាងលើនេះ​មិន​បាន​ប៉ះ​ជាន់​លើ​ផ្ទៃដី​ឧទ្យាន​សួនសត្វ និង​មជ្ឈមណ្ឌល​សង្គ្រោះ​សត្វព្រៃ​ភ្នំ​តា​ម៉ៅ​ដែល​មាន​ទំហំ​ជាង ​៤០០​ហិ​កតា និង​មាន​របង​ព័ទ្ធ​ជុំវិញ​ជាង​ ៨​គីឡូម៉ែត្រ​ និង​មាន​ហេដ្ឋារចនាសម្ព័ន្ធ​នានា​ដែល​បាន​អភិវឌ្ឍ​កន្លង​មក​នោះ​ទេ​។

លោក បានបញ្ជាក់ ការ​ដោះ​ដូរ​ផ្ទៃដី​តំបន់​ភ្នំ​តា​ម៉ៅ ជា​ការ​ចាំបាច់​របស់​រាជរដ្ឋាភិបាល​កម្ពុជា​ សម្រាប់​ការ​អភិវឌ្ឍ​ដើម្បី​ជំរុញ​កំណើនសេដ្ឋកិច្ច និង​ប្រាក់​ចំណូល​របស់​ប្រជាពលរដ្ឋ​មូលដ្ឋាន ព្រមទាំង​ផ្តល់​បន្ថែម​ទៀត​នូវ​ទុន​សម្រាប់​ការ​អភិវឌ្ឍគម្រោង​យុទ្ធសាស្ត្រ​នានា ជំរុញនិង​កែ​ល​ម្ផ​ឧទ្យាន​សួនសត្វ និង​មជ្ឈមណ្ឌល​សង្គ្រោះ​សត្វព្រៃ​ភ្នំ​តា​ម៉ៅឱ្យ​មានការ​ប្រកួតប្រជែង​ក្នុង​បរិបទ​សេដ្ឋកិច្ច​បច្ចុប្បន្ន ព្រមទាំង​ជំរុញ​កំណើន​ចំណូល​ធានា​និរន្តរភាព​ផង​ដែរ៕

ដោយ៖ មឿន ឌីណា (Moeun Dyna)