ភ្នំពេញ៖ កម្ពុជា បានទទួលហិរញ្ញប្បទានឥតសំណងប្រមាណ ៦២លានដុល្លារ សម្រាប់ឆ្នាំទី១ ដោយក្នុងនោះហិរញ្ញប្បទានប្រមាណ ៤១.៦លានដុល្លារ សម្រាប់វិស័យសុខាភិបាលនិងអប់រំ និង២០.៥លានដុល្លារ សម្រាប់វិស័យកសិកម្ម និងបរិស្ថាន ដែលអនុវត្តដោយភ្នាក់ងារអនុវត្តគម្រោងនានានៅកម្ពុជា។
ជំនួយទឹកប្រាក់ជាង ៦០លានដុល្លារនេះ រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា និងរដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍(USAID) បានចុះហត្ថលេខា កាលពីថ្ងៃទី២៥ ខែមេសា ឆ្នាំ២០២២ លើកិច្ចព្រមព្រៀងស្តីពីកិច្ចសហប្រតិបត្តិការអភិវឌ្ឍន៍ (DOAG) រយៈពេល ៥ឆ្នាំ ចាប់ពីឆ្នាំ២០២១-២០២៥។
តាមរយៈ កិច្ចព្រមព្រៀងស្តីពីកិច្ចសហប្រតិបត្តិការអភិវឌ្ឍន៍ (DOAG) រយៈពេល ៥ឆ្នាំ ចាប់ពីឆ្នាំ២០២១-២០២៥ មានទឹកប្រាក់សរុប ៣៣៨លានដុល្លារ ដើម្បីជំរុញកំណើនសេដ្ឋកិច្ចប្រកបដោយបយាប័ន្ន និងចីរភាព ក្នុងការអនុវត្តគម្រោងក្នុងវិស័យខាងលើ និងគាំពារកុមារផងដែរ។
តាមសេចក្តីប្រកាសព័ត៌មានដែលផ្សព្វផ្សាយដោយក្រុមប្រឹក្សាអភិវឌ្ឍន៍កម្ពុជានៅថ្ងៃទី២៧ ខែមេសា ឆ្នាំ២០២២ ឱ្យដឹងថា គិតចាប់តាំងពីឆ្នាំ១៩៩២ រហូតដល់ឆ្នាំ២០២១ រដ្ឋាភិបាលសហរដ្ឋអាមេរិកបានផ្តល់ហិរញ្ញប្បទានគាំទ្រដល់ប្រទេសកម្ពុជាប្រមាណ ១,៧ពាន់លានដុល្លារ សម្រាប់គាំទ្រដល់វិស័យអាទិភាពដូចជា៖ វិស័យសុខាភិបាល អប់រំ បរិស្ថាន កសិកម្ម អភិបាលកិច្ច ការអភិវឌ្ឍបែបប្រជាធិបតេយ្យ និងកម្មវិធីដោះមីន និងយុទ្ធភណ្ឌមិនទាន់ផ្ទុះដែលឆ្លើយតបទៅនឹងអាទិភាពរបស់រាជរដ្ឋាភិបាលកម្ពុជាដូចដែលមានចែងនៅក្នុងយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣។
ក្នុងនាមរាជរដ្ឋាភិបាលកម្ពុជា ក្រុមប្រឹក្សាអភិវឌ្ឍន៍កម្ពុជាសូមថ្លែងអំណរគុណចំពោះ រដ្ឋាភិបាល និងប្រជាជនអាមេរិកដែលបន្តការគាំទ្រ និងប្តេជ្ញារួមចំណែកក្នុងកិច្ចអភិវឌ្ឍន៍សង្គម សេដ្ឋកិច្ចកម្ពុជា ប្រកបដោយបរិយាប័ន្ន និងចីរភាព ជាពិសេសសម្រាប់ការរួមចំណែកក្នុងការទប់ស្កាត់ការរីករាលដាលនៃជំងឺកូវីដ-១៩ នៅកម្ពុជា។ ទន្ទឹមនេះ រដ្ឋាភិបាលសហរដ្ឋអាមេរិក ក៏បានកោតសរសើរចំពោះការបន្តកិច្ចសហការជាមួយរាជរដ្ឋាភិបាលកម្ពុជា ដើម្បីជាប្រយោជន៍រួមដល់ប្រទេសទាំង២៕
ដោយ៖ មឿន ឌីណា (Moeun Dyna)
