កណ្ដាល៖ ផ្លូវក្រាលល្បាយថ្មភ្នំចំនួន ២ខ្សែមានប្រវែងសរុប ៨,៦២០ម៉ែត្រ ស្ថិតក្នុងស្រុកល្វាឯក ខេត្តកណ្ដាល ស្ថាបនាដោយ នាយកដ្ឋានវិស្វកម្មក្រសួងការពារជាតិ ជិតរួចរាល់ហើយ។ បើតាមគណៈកម្មការអន្ដរក្រសួងបានចុះពិនិត្យដឹកនាំដោយ លោក ហួត សារឹម អនុរដ្ឋលេខាធិការក្រសួងអភិវឌ្ឍន៍ជនបទ កាលពីថ្ងៃទី២៤ ខែមីនា ឆ្នាំ២០២២។

គណៈកម្មការអន្ដរក្រសួង ដែលមានក្រសួងសេដ្ឋកិច្ច និងហិរញ្ញវត្ថុ បានឱ្យដឹងថាគម្រោងស្ថាបនាផ្លូវទាំងពីរខ្សែរូម៖

-គម្រោងទី១ ការស្ថាបនាផ្លូវក្រាលល្បាយថ្មភ្នំចំនួន ១ខ្សែ ប្រវែង ៥,៦០០ម៉ែត្រ ទទឹងប្រវែង ៧ម៉ែត្រ កម្រាស់ ០.២ ម៉ែត្រ ទទឹងដីស ប្រវែង ៨ម៉ែត្រ សាងសង់ស្ពានបេតុងចំនួន ១កន្លែង​ ប្រវែង ២៤ ម៉ែត្រ ទទឹង ៨ម៉ែត្រ ការងារចាក់ដីនៅតាមក្បាលស្ពានទាំងសងខាងដោយម្ខាងៗ មានប្រវែង ៥០ម៉ែត្រ និងសាងសង់ផ្លាកឈ្មោះផ្លូវចំនួន ២កន្លែង។ ផ្លូវនេះមានទីតាំងតភ្ជាប់ពីឃុំល្វាស ទៅឃុំព្រែកឬស្សី ស្រុកល្វាឯម ខេត្តកណ្តាល ។

-គម្រោងទី២ ការស្ថាបនាផ្លូវក្រាលល្បាយថ្មភ្នំចំនួន ១ខ្សែ ប្រវែង ៣,០៥០ម៉ែត្រ ទទឹងក្រាលល្បាយថ្មប្រវែង ៧ម៉ែត្រ កម្រាស់ ០.២ម៉ែត្រ ទទឹងដីសមានប្រវែង ៨ម៉ែត្រ ជួសជុលប្រព័ន្ធការពារក្បាលស្ពានបេតុងចំនួន ៣កន្លែង និងផ្លាកឈ្មោះផ្លូវចំនួន ២កន្លែង ស្ថិតនៅភូមិព្រែកឬស្សី ឃុំព្រែកឬស្សី ស្រុកល្វាឯម ខេត្តកណ្តាល។

បន្ទាប់ពីបានពិនិត្យលើលក្ខណៈបច្ចេកទេសផ្លូវ និងស្ពានរួចមក គណៈកម្មការបានសម្រេចទទួលយក ៩៣% ចំពោះគម្រោងទី១ និង ១០០% ចំពោះគម្រោងទី២៕

ដោយ៖ មឿន ឌីណា (Moeun Dyna)