កណ្ដាល់៖ មន្ទីរពេទ្យតេជោសែន កោះធំ ដែលជាមន្ទីរពេទ្យធំ និងទំនើបជាងបណ្តាមន្ទីរពេទ្យស្រុកទាំងអស់នៅក្នុងប្រទេស ដោយគិតមកទល់បច្ចុប្បន្ន សម្រេចវឌ្ឍនភាពសាងសង់បានប្រមាណ ២២.៩៦ភាគរយ ហើយ។ បើតាមការថ្លែងរបស់ លោក ស៊ុន ចាន់ ថុល រដ្ឋមន្រ្តីក្រសួងសាធារណការ និងដឹកនជញ្ជូន។
ការថ្លែងខាងលើរបស់ លោក ស៊ុន ចាន់ ថុល នៅក្នុងពិធីបុណ្យបញ្ចុះខណ្ឌសីមាព្រះវិហារថ្មីនៃវត្តពុទ្ធពរត្រៃនិគម ស្ថិតនៅក្នុងឃុំកោះធំ ស្រុកកោះធំ ខេត្តកណ្តាលកាលពីថ្ងៃទី១៧ ខែមីនា ឆ្នាំ២០២២ បានបន្តឱ្យដឹងថា គម្រោងនេះចំណាយការសង់ ១០លានដុល្លារ រយៈពេលសាងសង់ចំនួន ១២ខែដោយគិតចាប់ផ្តើមពីខែមករាឆ្នាំ២០២២ គ្រោងបញ្ចប់ការសាង់នៅខែធ្នូ ឆ្នាំ២០២២ ខាងមុខនេះ។
នៅក្នុងពិធីខាងលើ លោក ស៊ុន ចាន់ថុល បានថ្លែងបានបញ្ជាក់ថា មន្ទីរពេទ្យនេះអាចផ្តល់សេវាសាធារណជូនដល់ បងប្អូនប្រជាពលរដ្ឋប្រមាណ ៦០ម៉ឺននាក់ មកពីស្រុកកោះធំ ស្រុកស្អាង ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ ដោយសហការជាមួយមន្ទីរពេទ្យកាល់ម៉ែត។
គូសបញ្ជាក់ គម្រោងសាងសង់នេះត្រូវបានរៀបចំឡើងក្រោមគំនិតផ្តួចផ្តើមរបស់ លោករដ្ឋមន្ត្រី ស៊ុន ចាន់ថុល ដើម្បីឆ្លើយតបទៅនឹងតម្រូវការជាក់ស្តែង និងសមស្របតាមកម្មវិធីនយោបាយរបស់រាជរដ្ឋាភិបាល និងចក្ខុវិស័យសម្រាប់អភិវឌ្ឍជាតិរបស់ប្រមុខរដ្ឋាភិបាល សម្ដចេ នាយករដ្ឋមន្ត្រី ហ៊ុន សែន ដែលបានគិតគូរ យកចិត្តទុកដាក់លើសុខទុក្ខ សុខភាព និងសុខុមាលភាពរបស់ប្រជាពលរដ្ឋ។
គម្រោងសាងសង់មន្ទីរពេទ្យនេះរួមមាន៖ ការសាងសង់អគារថ្មីចំនួន ៣ខ្នង មានដូចជា អគារមន្ទីរពេទ្យចំនួន ១ខ្នង មាន ៣ជាន់ ដែលជាន់ផ្ទាល់ដីមានទំហំ ៣៥១៤.៨ម៉ែត្រការ៉េ, អគារខាងឆ្វេងចំនួន ១ខ្នង មាន ២ជាន់ ជាន់ផ្ទាល់ដីមានទំហំ ៥០០ម៉ែត្រការ៉េ និងជាន់ទី១ មានទំហំ ៥០០ម៉ែត្រការ៉េ និងអគារខាងស្តាំចំនួន ១ខ្នងមាន ២ជាន់។
អគារទាំង៣ ខាងលើមានទំហំសរុបស្មើនឹង ១២,៥៤៤ម៉ែត្រការ៉េ ដែលអាចផ្ទុកគ្រែអ្នកជំងឺបានចំនួន ១៥០គ្រែ បំពាក់ដោយម៉ាស៊ីនត្រជាក់ សម្ភារបរិក្ខារពេទ្យ និងឧបករណ៍បច្ចេកទេសទំនើបៗបម្រើឱ្យការព្យាបាល៕
ដោយ៖ មឿន ឌីណា (Moeun Dyna)
