Register Already an agent ? Login

ក្រសួងរៀបចំដែនដី បានចេញប្លង់គោលប្រើប្រាស់ដីក្រុងព្រះសីហនុឆ្នាំ២០៣៨ ជាផ្លូវការហើយ

ភ្នំពេញ៖ យោងតាមសេចក្តីសម្រេចលេខ០៤៥ សសរ ចុះថ្ងៃទី៨ ខែកញ្ញា ឆ្នាំ២០២១ របស់ក្រសួងរៀបចំដែនដី នគរូបនីយកម្ម និងសំណង់ បានដាក់ឱ្យប្រើប្រាស់ប្លង់គោលប្រើប្រាស់ដីក្រុងព្រះសីហនុ ដែលមានចក្ខុវិស័យដល់ឆ្នាំ២០៣៨ ដើម្បីជាទិសដីសម្រាប់ការគ្រប់គ្រង អភិរក្ស និងអភិវឌ្ឍក្រុងព្រះសីហនុ ប្រកបដោយប្រសិទ្ធភាព។

បើតាមប្លង់គោលនេះ បានបង្ហាញអោយដឹងថា វិសាលភាពនៃសិក្សាប្លង់គោលប្រើប្រាស់ដី ក្រុងព្រះសីហនុមានផ្ទៃដី ៨៣គីឡូម៉ែត្រក្រឡា គ្របដណ្តប់លើស្រុកព្រៃនប់ មានផ្ទៃដី ១០០.៨២គីឡូក្រឡា  និងគ្របណ្ដប់លើ ស្រុកស្ទឹងហាវមានផ្ទៃដី៩៥.១២គីឡូម៉ែត្រក្រឡា។ ប្លង់គោលនេះ នឹងជួយលើកកម្ពស់ការប្រើប្រាស់ដីក្នុងក្រុងឱ្យមានប្រសិទ្ធិភាព និងលើកកម្ពស់វិស័យទេសចរណ៍ ឧស្សាហកម្ម ភស្តុភាកម្ម និងពាណិជ្ជកម្មជាតិ និងអន្តរជាតិផងដែរ។

ប្លង់គោលប្រើប្រាស់ដីធ្លីនេះ ត្រូវបានរៀបចំឡើងដោយប្រមូលសិក្សា និងវិភាគទិន្នន័យរូបវន្ត ទិន្នន័យសេដ្ឋកិច្ច ទិន្នន័យសង្គម និងទិន្នន័យបរិស្ថាន ទិន្នន័យប្រជាសាស្រ្ត និងការស្រង់មតិ សមស្របតាមគោលនយោបាយជាតិស្តីពី ការរៀបចំដែនដីនៃព្រះរាជាណាចក្រកម្ពុជា គោលនយោបាយដីធ្លី សៀវភៅដីធ្លី អនុក្រឹតស្តីពីនគរូបនីយកម្ម រាជធានីភ្នំពេញ ក្រុង និងទីប្រជុំជន និងសេចក្តីសម្រេចស្តីពីនីតិលម្អិត នៃការរៀបចំប្លង់គោលប្រើប្រាស់ដី និងផែនការប្រើប្រាសដីថ្នាក់ក្រុង  ស្រុក ខណ្ឌ។

ប្លង់គោលនេះ បានដាក់ចេញនូវផែនការអទិភាពជាច្រើនទៀត ទាក់ទាន់នឹងការអភិវឌ្ឍក្រុង រួមមាន៖

-ការអភិរក្ស និងការអភិវឌ្ឍតំបន់នគរូបនីយកម្ម -ការគ្រប់គ្រង និងប្រើប្រាស់ដីប្រកបដោយចីរភាព -ការអភិវឌ្ឍហេដ្ឋារចនសម្ព័ន្ធ -ការអភិវឌ្ឍសេដ្ឋកិច្ច -ការអភិវឌ្ឍសង្គមកិច្ច -ការការពារបរិស្ថាន និងការគ្រប់គ្រងសំណល់ -ការបង្ការទប់ស្កាត់គ្រោះមហន្តរាយ។

សូចនាករសំខាន់ៗ សម្រាប់អភិវឌ្ឍក្រុងព្រះសីហនុ និងតំបន់ជុំវិញដែលបានព្យាករ និងគ្រោងសម្រេចបានត្រឹមឆ្នាំ ២០៣៨រួមមាន៖

ប្រជាជន សម្រាប់ក្រុងព្រះសីហនុ និងតំបន់ជុំវិញនៅឆ្នាំ២០១៩ មានចំនួន ១៧៨,​២៩១១នាក់ នឹងកើនឡើងដលចំនួនកើនឡើង ២៣២,១២១នាក់ នៅឆ្នាំ២០៣៨។ ភ្ញៀវទេសចរអន្តរជាតិនៅឆ្នាំ២០១៨ មានចំនួន ៤៨១,០០០នាក់ នឹងកើនឡើងទៅដល់ ២,៥លាន នាក់នៅឆ្នាំ២០៣៨។ ភ្ញៀវទេសចរជាតិនៅឆ្នាំ២០១៨ មានចំនួនប្រមាណ ១លាននាក់ នឹងកើនឡើងដល់ចំនួនប្រមាណ ៥លាននាក់នៅឆ្នាំ ២០៣៨។ ហេដ្ឋារចនាសម្ពន្ធក្នុងក្រុងព្រះសីហនុ និងតំបន់ជុំវិញ។

បើតាមការបញ្ជាក់នៅក្នុងប្លង់គោលនេះ ឆ្នាំ២០៣៨ ផ្លូវក្រាលកៅស៊ូបេតុឆ្នាំ២០១៨ មានចំនួន ២០.៥ភាគរយនឹងកើនឡើងដល់ ១០០ភាគរយ។ ការផ្គត់ផ្គង់ទឹកស្អាតនៅឆ្នាំ២០១៨ មានចំនួន ៣២ភាគរយ នឹងកើនឡើងដល់ ១០០ ភាគរយ។ ភស្តុភារម្មឆ្នាំ២០១៨ មានចំនួន ៤,៩លានតោន នឹងកើនឡើងដល់ចំនួន ៣៧លា​ន​តោន។

តំបន់លំនៅដ្ឋាននៅឆ្នាំ២០១៩ មានផ្ទៃដី ១៦៣១ហិចតា នឹងកើនឡើងដល់ ៦០២ហិកតា។ តំបន់ឧស្សាហកកម្មនៅឆ្នាំ ២០១៩ មានផ្ទៃដី ៨២៩ហិចតា នឹងកើនឡើងដល់ផ្ទៃដី ១៦០២ហិចតា។ តំបន់លម្ហសាធារណៈ និងផ្ទៃបៃតងសម្រាប់មនុស្សម្នាក់នៅឆ្នាំ២០១៩ មានផ្ទៃដី ០.៥១គីឡូម៉ែត្រក្រឡា សម្រាប់មនុស្សម្នាក់នឹងកើនឡើងដល់ផ្ទៃដី ១០ម៉ែត្រក្រឡា៕

ដោយ៖ មឿន ឌីណា (Moeun Dyna)