ភ្នំពេញ៖ នៅកិច្ចប្រជុំអន្តរក្រសួង​រៀបចំការងារចុះបញ្ជីដីរដ្ឋ ដីឯកជនរបស់ប្រជាពលរដ្ឋ និងដីសហគមន៍ជនជាតិដើមភាគតិច ការដោះស្រាយវិវាទដីធ្លី និងការងាររៀបចំផែនការប្រើប្រាស់ដីធ្លី ក្នុងខេត្តមណ្ឌលគិរី លោក វេង សាខុន រដ្ឋមន្រ្តីក្រសួងកសិកម្ម ស្នើ​សុំ​ឱ្យមានចំណាត់ការចំនួន ៤ចំណុច ដើម្បីការពារទប់ស្កាត់ការរាល​ដាល ការ​​ទន្ទ្រានកាន់កាប់ដីព្រៃឈើនៅបន្តកើតមានក្រោមហេតុផលកង្វះដីបង្កបង្កើនផល និងពង្រីកលំនៅដ្ឋានជាដើម។ល។

ការស្នើទាំង ៤ចំណុចរបស់ លោក វេង សាខុន នៅក្នុងកិច្ចប្រជុំខាងលើនាព្រឹកថ្ងៃទី២៨ ខែកក្កដា ឆ្នាំ២០២០ ដូចខាងក្រោម៖

ទី១. បញ្ជីដីរដ្ឋទាំងអស់ជាមុនសិន មុនការពិនិត្យចេញប័ណ្ណកម្មសិទ្ធិជូន​ប្រជាព​ល​​រ​ដ្ឋ ដើម្បីទប់ស្កាត់ការរាល​ដាល​បន្ថែមទៀត។

ទី២.ផ្ទៃដីព្រៃឈើសម្រាប់ផ្ទេរដើម្បីគោលបំណងអភិវឌ្ឍន៍ ត្រូវមាន​ការសម្រេចពីរាជ​រដ្ឋា​ភិបាល​។​ ក្នុង​នោះ​ក្រសួងកសិកម្ម «ស្នើសុំឱ្យមានការនិរាករណ៍ទៅលើលិខិតទិញ-លក់ និងប័ណ្ណ ប្លង់រឹងដែល​ចេញ​ទៅលើផ្ទៃដីស្រល់ដែលមានស្នាមព្រះហស្ថដោយព្រះមហាក្សត្រផងដែរ»។

ទី៣.ចំពោះដីសម្បទានដីសេដ្ឋកិច្ច សហគមន៍ព្រៃឈើ ស្ថានីយផ្សព្វផ្សាយ និងស្ដារព្រៃឈើ និងផ្ទៃដី​ចម្កា​រ​ឈើដាំ​ដែលច្រករបៀងអភិរក្សជីវៈចម្រុះបានត្រួតជាន់លើ ក្រសួងស្នើសុំចុះបញ្ជីដីទាំងនោះ ស្ថិតក្រោមការ​គ្រប់​គ្រង​​របស់​​ក្រសួងកសិកម្ម។

លោក រដ្ឋមន្រ្តីបញ្ជាក់ «ដោយឡែក នៅខេត្តមណ្ឌលគិរី ក៏មានការឈូសឆាយ បោះ​បង្គោលហ៊ុមព័ទ្ធដីចម្ការ​ស្រល់ ដើម្បីធ្វើជាកម្មសិទ្ធិដែលគ្រប់គ្រងដោយក្រុមហ៊ុនមួយចំនួន ហើយក្រសួងក៏បាន​សម្រេច​ឱ្យក្រុមហ៊ុនពាក់​ព័ន្ធទាំងនោះផ្អាកជាបណ្តោះអាសន្នការធ្វើអាជីវកម្មស្រល់ ដើម្បី​រក្សាទុកអត្ត​សញ្ញា​ណ​​​បញ្ជាក់ជាដីរបស់រដ្ឋ និងចូលរួមពេញលេញក្នុងដំណើរការចុះបញ្ជីដីរដ្ឋ។
និងទី៤. លោក បានសង្កត់ធ្ងន់ដូច្នេះថា ចាត់វិធានការទប់ស្កាត់ និងបង្រ្កាបបទល្មើសព្រៃឈើ និងការកាប់រាន ដុត ឈូសឆាយដី​ព្រៃ ឈើព្រៃលិចទឹកតាមគ្រប់រូបភាព ក្រោមយន្តការគណៈបញ្ជាការឯកភាពរដ្ឋបាលរាជធានី-ខេត្ត ស្របតាម​ស្មារតីអនុក្រឹត្យលេខ ១៥៦ អនក្រ.បក ចុះថ្ងៃទី៣១ ខែមីនា ឆ្នាំ២០១៤ និងសារាចរ ណែនាំលេខ ០៥ សរណន ចុះថ្ងៃទី២២ ខែកញ្ញា ឆ្នាំ២០១៦ របស់រាជរដ្ឋាភិបាលកម្ពុជាឱ្យទទួលបានប្រសិទ្ធភាពខ្ពស់។

នាឱកាសនោះដែរ លោក រដ្ឋមន្រ្តីក្រសួងកសិកម្មបានថ្លែងឱ្យដឹងថា តាមការសិក្សាស្រាវជ្រាវជាបន្តបន្ទាប់របស់រដ្ឋបាលព្រៃឈើបានបង្ហាញឱ្យឃើញថាការ​​ទន្ទ្រានកាន់កាប់ដីព្រៃឈើនៅបន្តកើតមានក្រោមហេតុផលកង្វះដីបង្កបង្កើនផល និងពង្រីកលំនៅដ្ឋានជាដើម។ល។

លោក បញ្ជាក់ថា «កត្តា​ទាំងខាងលើបានជះឥទ្ធិពលដល់ដីព្រៃឈើរបស់រដ្ឋ ហើយចលនានៃការរំលោភដីព្រៃឈើរួមមាន៖ កខ្វះ​ខាត ដីពិតប្រាកដបានកាប់រានដីព្រៃឈើ, អ្នកកាប់រានដីព្រៃឈើហើយលក់រួចកាប់រានបន្តទៀត, ការបញ្ជាក់​លើលិខិតទិញលក់ដីព្រៃឈើ និងការឃុបឃិតគ្នាកាប់រាន និងហ៊ុំព័ទ្ធដីព្រៃឈើ»។

មន្ត្រីក៏បានសំណូមពរទៅដល់អាជ្ញាធរគ្រប់គ្រងដីរដ្ឋថ្នាក់ខេត្ត បន្តចាត់វិធានការផ្លូវ ច្បាប់ឱ្យបាន​តឹង​​រ៉ឹង ម៉ឺងម៉ាត់ ដោយមិនគួរអនុញ្ញាតឱ្យការស្នាក់នៅ ឬអាស្រ័យផលទៅលើដីរដ្ឋដោយខុសច្បាប់នោះឡើយ។ លោក ថា ក្នុងករណី​ចាំ​បាច់ ត្រូវស្នើសុំយោបល់ពីក្រសួង ស្ថាប័នពាក់ព័ន្ធ និងស្នើសុំការសម្រេចពីរដ្ឋាភិបាល។

លោក ក៏បានស្នើសុំទៅក្រសួង​រៀប​ចំ​​ដែនដី ចូលរួមទប់ស្កាត់ការចេញបណ្ណកម្មសិទ្ធិ ដែលមិន​បាន​​សួរ​នាំពីក្រសួង​ទទួល​បន្ទុកលើការគ្រប់គ្រងដីធ្លី ក្នុងដែនសមត្ថកិច្ចរបស់ខ្លួន ដើម្បីបញ្ចៀសពីហានិភ័យ​នៃ​ការ​គ្រប់​គ្រងដីព្រៃឈើរបស់រដ្ឋ។

គួសរម្លឹកថា កាលពីថ្ងៃទី៣ ខែកក្កដា ឆ្នាំ២០២0 នៅក្នុងកិច្ចប្រជុំពេញអង្គគណៈរដ្ឋមន្រ្តី សម្តេច ហ៊ុន សែន បានបញ្ជាទៅក្រសួង ក្រសួងបរិស្ថាន ក្រសួងកសិកម្ម និងក្រសួងរៀបចំដែនដី ឱ្យកាត់ឆ្វៀលដីជូនប្រជាពលរដ្ឋដែលកំពុងរស់នៅអាស្រ័យផលក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ៕

ដោយ៖ឌីណា