សៀមរាប៖ កសិដ្ឋានចិញ្ចឹមត្រី លោក លី ហាំងសេង ស្ថិតនៅភូមិស្វាយព្រៃ សង្កាត់ស្វាយដង្គុំ ក្រុងសៀមរាបអាចរកចំណូលពី ១,៥ ទៅ២លានដុល្លារក្នុងឆ្នាំ និងលោក តូ លៀងធឹង នៅភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាបអាចរកចំណូលបាន ១៨ម៉ឺនដុល្លារក្នុង១ឆ្នាំ។ បើតាមការឱ្យពីក្រសួងកសិកម្ម។

ក្រសួងបានបន្តថា លោក លី ហាំងសេង បានចាប់យករបរចិញ្ចឹមត្រីតាំងពីឆ្នាំ២០១៧ មកទល់បច្ចុប្បន្នកសិដ្ឋានពង្រីកផ្ទៃដីបាន ៥០ហ.ត មានស្រះចិញ្ចឹម១៩ ស្រះនីមួយៗ មានទំហំ ៧ ០០០ម៉ែត្រការេ ប្រើពលកម្មសរុប ៣០នាក់។

អនុវត្តតាមគោលការណ៍បច្ចេកទេសចិញ្ចឹមត្រីដូចជាការផ្តល់ចំណី ការសម្អាតស្រះត្រី ការដាក់កូនត្រី ការគ្រប់គ្រង ប្រើប្រាស់ និងសម្អាតទឹក។ល។ ដែលទទួលបានពីមន្រ្តីជំនាញរបស់មន្ទីរ និងរដ្ឋបាលជលផល។ បច្ចុប្បន្ន ជាមធ្យមអាចប្រមូលផលបានពី ១ ៥០០ទៅ២០០០តោនក្នុង១ឆ្នាំ ទទួលបានចំណូលសរុប ១,៥ទៅ២លានដុល្លារក្នុង១ឆ្នាំ (មិនទាន់ទូទាត់ចំណាយ)។

ក្រសួងបានបន្តទៀតថា លោក តូ លៀងធឹង ចិញ្ចឹមត្រីឆ្តោជាលក្ខណ:គ្រសារ ក្នុងស្រះទំហំ ៨ ៦០០ ម៉ែត្រការេ ប្រើប្រាស់ពលកម្មក្នុងគ្រួសារ និងជួលពីខាងក្រៅ។ ជាមធ្យមត្រីឆ្តោចិញ្ចឹមរយ:ពេល ៨ខែ មានទម្ងន់ ២,៥គីឡូក្រាម អាចប្រមូលផលបានជាង ៦០តោនក្នុង១ឆ្នាំ ហើយក្នុង១ឆ្នាំ គាត់អាចរកចំណូលបាន ១៨ម៉ឺនដុល្លារ (មិនទាន់ទូទាត់ថ្លៃដើម)។

ក្នុងឆ្នាំ២០១៩ ត្រីទាំងពីរប្រភេទមានទីផ្សារ និងតម្លៃល្អប្រសើរ ដែលធ្វើឱ្យពួកគាត់មានកម្លាំងចិត្តចង់ពង្រីកផលិតកម្មដើម្បីធានាបរិមាណផ្គត់ផ្គង់ក្នុងខេត្ត និងនាំចេញ ប៉ុន្តែបញ្ហានៅត្រង់ថាទុនវិនិយោគដែលខ្ចីពីធនាគារ ឬមីក្រូហិរញ្ញវត្ថុឯកជនមានការប្រាក់ខ្ពស់ពេក នេះបើតាមម្ចាស់កសិដ្ឋានបានលើកឡើង។

ក្រសួងបានបន្ថែមថា សំខាន់ជាងនេះ ខេត្តសៀមរាបជាតំបន់ទេសចរណ៍ សេចក្តីត្រូវការស្បៀង (អង្ករ ត្រី សាច់ បន្លែ ផ្លែឈើ) គឺមានការកើនឡើងជាលំដាប់ពីមួយឆ្នាំទៅមួយឆ្នាំ ប៉ុន្តែដោយសារស្ថានការណ៍ជំងឺឆ្លងសកលកូវីដ-១៩ ធ្វើឱ្យតម្រូវការទីផ្សារ និងតម្លៃត្រីមានការធ្លាក់ចុះពី ១ ២០០០រៀលក្នុង១គីឡូក្រាម មកនៅត្រឹម ១០០០០រៀលក្នុង១គីឡូក្រាម ។ ពួកគាត់ទាំងពីរនាក់ សង្ឃឹម និងជឿជាក់អនាគតដ៏ខ្លី បន្ទាប់ពីស្ថានភាពជំងឺឆ្លងត្រឡប់ទៅរកស្ថានភាពប្រក្រតី ទាំងទីផ្សារនិងតម្លៃនឹងបានល្អប្រសើរជាបន្តបន្ទាប់ឡើងវិញ។

រដ្ឋមន្រ្តីក្រសួងកសិកម្ម លោក វេង សាខុន ដែលបានចុះមកពិនិត្យសកម្មភាពចិញ្ចឹមត្រីឆ្តោ ត្រីប្រា និងត្រីពោ នៅកន្លែងកសិដ្ឋានទាំងពីរខាងលើបាន វាយតម្លៃខ្ពស់ចំពោះការខិតខំប្រឹងប្រែងប្រកាន់យករបរចិញ្ចឹមត្រីដើម្បីចូលរួមចំណែកបំពេញសេចក្តីត្រូវការទីផ្សារក្នុងខេត្ត និងកាត់បន្ថយការនាំចូល ។

បើទោះជាតម្រូវការទីផ្សារ និងតម្លៃមានការធ្លាក់ចុះបន្តិចក្តី លោក វេង សាខុន បានលើកទឹកចិត្តឱ្យពួកគាត់បន្តរក្សាមុខរបរនេះ រង់ចាំស្ថានភាពល្អប្រសើរឡើងវិញ ពីព្រោះនេះគឺជាអាជីពយ៉ាងរឹងមាំ និងជាប្រភពចំណូលក្នុងគ្រួសារ មានបទពិសោធន៍ និងចុះទុនវិនិយោគជាច្រើន ដូច្នេះត្រូវអត់ធ្មត់ តស៊ូរង់ចាំឱកាសល្អវិញ។

លោក រដ្ឋមន្រ្តីដែលបានចុះពិនិត្យសកសិដ្ឋានខាងលើ កាលពីថ្ងៃទី២ ខែមេសា ឆ្នាំ២០២០ បានណែនាំឱ្យរដ្ឋបាលជលផល និងមន្ទីរកសិកម្ម រុក្ខាប្រមាញ់ និងនេសាទខេត្ត ជួយទំនាក់ទំនងរកឈ្មួញនៅទីក្រុងភ្នំពេញ និងទីផ្សារក្រៅពីខេត្តសៀមរាប ដើម្បីជួយរំដោះផលត្រីដែលមានក្នុងស្តុក។ នៅក្នុងស្ថានភាពល្អប្រសើរគួរជួយរៀបចំផែនការផលិតកម្ម និងអនុវត្តបច្ចេកទេសបានត្រឹមត្រូវដើម្បីធានានិរន្តរភាពនៃការផ្គត់ផ្គង់ និងឈានទៅធ្វើការកែច្នៃសាច់ត្រីហ្វីឡេដើម្បីនាំចេញ។

បើតាក្រសួងកសិកម្មបានឱ្យដឹងថា នៅទូទាំងខេត្តសៀមរាប ក្នុងឆ្នាំ២០១៩ មានលទ្ធភាពផ្គត់ផ្គង់ត្រីឱ្យទីផ្សារក្នុងស្រុកទាំងផលត្រីចាប់ពីប្រភពទឹកធម្មជាតិ និងពីវារីវប្បកម្ម (ចិញ្ចឹមក្នុងស្រះ ១១៥០ បែ ៨១០ និងចិញ្ចឹមក្នុងតង់ប្លាស្ទីក ៦៣) មានបរិមាណសរុប ១៧ ១៤៤តោន។

ទីផ្សារក្នុងខេត្តត្រូវការផលត្រីស្រស់ ១៣ ១៨៥តោន សល់ពីនេះសម្រាប់កែច្នៃជាប្រហុក ផ្អក មាំ ត្រីងៀត ចំណីសត្វ ទឹកត្រី និងនាំចេញទៅទីផ្សារក្រៅខេត្ត។ បើតាមក្រសួងដដែល បន្ថែមទៀតថា ដោយឡែក ៤ខែដើមឆ្នាំ២០២០ ផលចាប់សរុបបានចំនួន ៤ ៦៩៤តោន ក្នុងនោះចាប់ពីបែបាន ២ ៧១០តោន (ត្រីរ៉ស់ ត្រីឆ្តោ ត្រីប្រា ត្រីអណ្តែង) ចាប់ពីស្រះបាន ១ ៩៨៤តោន (ត្រីប្រា ត្រីអណ្តែង ត្រីក្រាញ់ កង្កែប ត្រីឆ្ពិន ទីឡាព្យា)៕

ដោយ៖ឌីណា