ភ្នំពេញ៖ នៅក្នុងសប្តាហ៍ទី២ ចន្លោះពីថ្ងៃទី៩-១៥ ខែមីនានេះ ប្រជាពលរដ្ឋ និងទេសចរបរទេសផ្ទៃក្នុងប្រមាណ ១៩ម៉ឺននាក់ នៅតែបន្តដើរទស្សនាកម្សាន្តនៅតាមរមណីយដ្ឋាន និងតំបន់ទេសចរណ៍នានានៅក្នុងប្រទេសកម្ពុជា។ បើតាមរបាយការណ៍របស់មន្ទីទេសចរណ៍រាជធានី-ខេត្ត ដែល លោក ថោង ខុន រដ្ឋមន្រ្តីក្រសួងទេសចរណ៍បានទទួល។
រដ្ឋមន្រ្តីក្រសួងទេចរណ៍ បានឱ្យដឹងថា រាល់ថ្ងៃពិសេសនៅចុងសប្តាហ៍ ប្រជាពលរដ្ឋ និងទេសចរបរទេសផ្ទៃក្នុងនៅតែធ្វើដំណើរកម្សាន្តជាលក្ខណៈគ្រួសារ ក្រុមតូចៗ និងលក្ខណៈបុគ្គលពិសេសសយុវជន ក៏នៅតែបន្តដំណើរកម្សាន្តទៅកាន់តំបន់អេកូទេសចរណ៍ សហគមន៍ទេសចរណ៍ តំបន់ទេសចរណ៍ផ្សងព្រេង តំបន់ឆ្នេរសមុទ្រ-កោះ និងគោលដៅទេសចរណ៍នានានៅក្នុងខេត្តរបស់ខ្លួនជាធម្មតា។ លោក បន្ថែមថា ដោយអនុវត្តន៍តាមការណែនាំរបស់រាជរដ្ឋាភិបាល គ្រប់រាជធានី-ខេត្តមិនមានការរៀបចំព្រឹត្តិការណ៍ទេសចរណ៍ ព្រឹត្តិការណ៍សាសនា ឬការប្រគុំតន្ត្រីទេសចរណ៍អ្វីទៀតឡើយ។
លោក ថោង ខុន បានបន្ថែមទៀតថា យោងតាមសភាពការណ៍នេះ ក្រសួង ក្រើនរំលឹកណែនាំដល់មន្ទីរទេសចរណ៍រាជធានី-ខេត្ត ត្រូវបន្តបង្កើនការយកចិត្តទុកដាក់ចំពោះទេសចរផ្ទៃក្នុង ដោយត្រូវបន្តពង្រឹងគុណភាពសេវាកម្ម ផលិតផលទេសចរណ៍ អនាម័យ ម្ហូបអាហារ និងសុវត្ថិភាពភ្ញៀវទេសចរនៅតាមគោលដៅទេសចរណ៍ទាំងអស់ឱ្យបានល្អប្រសើរ ជាពិសេសនៅតាមរមណីយដ្ឋានទេសចរណ៍ និងសហគមន៍ទេសចរណ៍នានា។
ក្រៅពីនោះក៏ត្រូវបន្តជំរុញការការបណ្តុះបណ្តាលបុគ្គលិក និងប្រជាសហគមន៍នៅតាមទីតាំងផ្ទាល់ ដោយបំបែកជាក្រុមតូចៗ និងអាចរៀននៅក្នុងបរិវេណរមណីយដ្ឋាន និងសហគមន៍ និងត្រូវអង្គុយឃ្លាតគ្នាយ៉ាងតិច២ម៉ែត្រ ដោយផ្តោតលើជំនាញចាំបាច់នានា ដូចជា ផ្នែកម្ហូបអាហារ និងភេសជ្ជៈ ការទទួលបដិសណ្ឋារកិច្ចភ្ញៀវទេសចរ ការផ្តល់សេវាប្រកបដោយគុណភាព ព្រមជាមួយការអប់រំអំពីវិធានការបង្ការជំងឺខូវីដ-១៩ ដែលក្រសួងសុខាភិបាល និងក្រសួងទេសចរណ៍បានដាក់ចេញ សំដៅធ្វើយ៉ាងណាប្រែក្លាយវិបត្តិជាឱកាស និងសម្រាប់ត្រៀមខ្លួនទទួលភ្ញៀវទេសចរនៅពេលវិបត្តិនេះកន្លងផុតទៅ។ ជាការណែនាំរបស់ លោក រដ្ឋមន្រ្តីក្រសួងទេសចរណ៍។
លោក រដ្ឋមន្រ្តី ក៏បានក្រើនរំលឹកទៅមន្ត្រីក្រោមឱវាទគ្រប់ផ្នែក ដែលចំណុះក្រោមក្រសួងទេសចរណ៍ ព្រមទាំងភាគីពាក់ព័ន្ធនានាក្នុងវិស័យទេសចរណ៍ ត្រូវបន្តយកចិត្តទុកដាក់លើការទទួលបដិសណ្ឋារកិច្ច ការផ្ដល់សេវាកម្មនានាដល់ភ្ញៀវទេសចរ ក៏ដូចជាការងារដទៃទៀតក្នុងវិស័យនេះឱ្យបានល្អថែមទៀត ខណៈចលនាទេសចរផ្ទៃក្នុងប្រទេសនៅតែបន្តមានរៀងរាល់ថ្ងៃ៕
ដោយ៖ឌីណា
