ភ្នំពេញ៖ ៖គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាត ភូមិព្រែក ក្រុងភ្នំពេញ ដែលភាគីកម្ពុជាស្នើសុំជាហិរញ្ញប្បទានក្នុងទឹកប្រាក់ប្រមាណ ២០លានដុល្លារ ត្រូវបានរដ្ឋាភិបាលជប៉ុន សម្រេចផ្តល់ជាជំនួយឥតសំណងវិញ ដើម្បីជួយអភិវឌ្ឍន៍វិស័យទឹកស្អាតរាជធានីភំ្នពេញ ដែលកំពុងរីកលូតលាស់។ ជាពិសេស ស្របពេលដែលរាជធានីត្រូវបានពង្រីកវិសាលភាពផ្ទៃដីរដ្ឋបាលកាន់តែធំឡើង។ បើតាមការឱ្យដឹងពីក្រសួងឧស្សាហកម្ម និងសិប្បកម្ម។
រដ្ឋមន្ត្រីក្រសួងឧស្សាហកម្មនិងសិប្បកម្ម លោក ចម ប្រសិទ្ធ បានថ្លែងនូវអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនជប៉ុន ដែលតាំងពីដើមរៀងមក បានផ្តល់ជំនួយចូលរួមចំណកយ៉ាងសំខាន់ក្នុងដំណើរការអភិវឌ្ឍន៍សេដ្ឋកិច្ច សង្គមនៅកម្ពុជា។
លោក ចម ប្រសិទ្ធ នៅក្នុងជំនួបកិច្ចពិភាក្សាជាមួយ លោក MIKAMI Masahiro ឯកអគ្គរាជទូតជប៉ុនប្រចាំកម្ពុជា នៅទីស្តីការក្រសួង កាលពីថ្ងៃទី១០ ខែមីនា នេះ បានបន្តថា ដោយឡែកលើស័យទឹកស្អាតប្រទេសជប៉ុន បានដើរតួយ៉ាងសំខាន់ ដែលធ្វើឱ្យប្រជាពលរដ្ឋកម្ពុជា ដែលទទួលបានទឹកស្អាតប្រើប្រាស់តែងនឹកឃើញដល់មិត្តជប៉ុន ជាពិសេសនៅរាជធានីភ្នំពេញ និងនៅតាមបណ្តាខេត្តធំៗ សំខាន់ៗជាច្រើន ដូចជា៖ ខេត្តសៀមរាប បាត់ដំបង កំពង់ធំ ពោធិ៍សាត់ កំពង់ចាម កណ្តាល ជាដើម។
នៅក្នុងជំនួបនេះ លោក ឯកអគ្គរាជទូតជប៉ុន ក៏បានបង្ហាញនូវការចាប់អារម្មណ៌ការអភិវឌ្ឍន៍វិស័យទឹកស្អាតតាមទីប្រជុំជន និងតំបន់ជនបទស្របតាមទស្សន:វិស័យរបស់ក្រសួងឧស្សាហកម្ម និងសិប្បកម្មផងដែរ។
ជាមួយគ្នានេះ ភាគីទាំងពីរក៏បាន ពិភាក្សាគ្នាអំពីជំនួយអភិវឌ្ឍន៍វិស័យទឹកស្អាតនៅខេត្តស្វាយរៀងផងដែរ។ ប្រតាមការឱ្យដឹងពីក្រសួងខាងលើ។
កម្ពុជា ពិតជានៅត្រូវការការអភិវឌ្ឍន៍វិស័យទឹកស្អាតនេះ បន្ថែមទៀត និងរីករាយក្នុងការទទួលជំនួយឥតសំណង ជំនួយហិរញ្ញប្បទាន និងការវិនិយោគទ្រង់ទ្រាយធំ ដើម្បីផលិតលក់ដុំបន្តដល់អាជីវករលក់រាយ។ ជាការបន្ថែមរបស់ លោក រដ្ឋមន្រ្តី បានលើកឡើងថា ពីព្រោះទស្សន:វិស័យរបស់ក្រសួង បានគិតគូរមិនត្រឹមតំបន់រាជធានីភ្នំពេញដែលកំពុងរីកដែនដីរដ្ឋបាលរបស់ខ្លូន និងតំបន់ទីប្រជុំជនប៉ុណ្ណោះទេ។
លោក ចោម ប្រសិទ្ធ បញ្ជាក់ថា តែយើងក៏ត្រូវគិតដល់ការអភិវឌ្ឍវិស័យទឹកស្អាតដល់ទីជនបទ តាមគ្រប់លទ្ធភាព ដើម្បីសម្រេចបាននូវគោលនយោបាយស្តីពីទឹកស្អាតរបស់រាជរដ្ឋាភិបាលផង និងគោលដៅអភិវឌ្ឍប្រកបដោយនរន្តរភាពរបស់អង្គការសហប្រជាជាតិដែលកំណត់យកឆ្នាំ២០៣០ ប្រជាពលរដ្ឋសាកលនឹងទទួលបានទឹកស្អាតប្រើប្រាស់គ្រប់គ្នា៕
ដោយ៖ឌីណា
