ភ្នំពេញ៖ ស្ថានភាពជារួម សគមន៍អឺរ៉ុប នៅតែបន្តឈានមុខគេសម្រាប់ទីផ្សារអង្ករកម្ពុជា ដែលកាន់កាប់ចំណែកដល់ទៅ ៣៧ភាគរយ ខណៈដែលចិនមានចំនួន ៣០ភាគរយ អាស៊ានចំនួន ១១ភាគរយនិងបណ្ដាប្រទេសផ្សេងៗទៀតចំនួន ២២ភាគរយ។ នេះបើតាមរបាយការណ៍ របស់សហព័ន្ធស្រូវអង្ករកម្ពុជា (ស.អ.ក) ដែលចេញថ្ងៃទី៦ ខែកុម្ភៈ ឆ្នាំ២០២០។
ការនាំចេញអង្ករនេះមានការថយចុះទៅកាន់ អឺរ៉ុប មានចំនួន ២២ភាគរយ ស្មើនឹងបរិមាណចំនួន ៥,២៦៩តោន បើធៀបទៅនឹងរយៈពេលដូចគ្នានៅ ខែមករា ឆ្នាំ២០១៩។ របាយការណ៍ខាងលើបានបន្ត ហើយតាមការសង្កេតជារួម មូលហេតុនៃការថយចុះនេះ បណ្ដាលមកពីការយកពន្ធអង្ករកម្ពុជានាំចូលសគមន៍អឺរ៉ុបនៅឆ្នាំដំបូង ក្នុងអង្ករ១តោនចំនួន ១៧៥អឺរ៉ូ ដោយគិតចាប់ពីថ្ងៃទី១៩ ខែមករា ឆ្នាំ២០១៩ មក។
បើទោះបីជាមានការយកពន្ធលើការនាំចូលលើការនាំចូលអង្ករកម្ពុជាក៏ដោយ ក៏ទីផ្សារកម្ពុជាមានស្ថានភាពប្រែប្រួល ដោយប្តូរពីការនាំអង្ករសគ្រាប់វែង អង្ករចំហុយនិងអង្ករក្រអូប ទៅជាអង្ករក្រអូបវិញស្ទើរទាំងស្រុងទៅកាន់ទីផ្សារសហគន៍អឺរ៉ុប ដែលអាចប៉ាន់ប្រមាណថា បរិមាណទឹកប្រាក់ដែលបានពីការនាំអង្ករទៅអឺរ៉ុបមានបរិមាណប្រហាក់ប្រហែលទៅនឹងឆ្នាំ២០១៩។ ជាការបញ្ជាក់របស់ សហព័ន្ធស្រូវអង្ករកម្ពុជា បានបន្ថែមថា ការនាំចេញអង្កររបស់កម្ពុជា ក្នុងខែមករា ឆ្នាំ២០២០ បានចំនួន ៥០,៤៥០តោន ដែលក្នុងនោះ អង្ករក្រអូប ៩១ភាគរយ ស្មើនឹង ៤៦,០០៦តោន ហើយអង្ករសគ្រាប់វែងមានចំនួន ១៥.៣៩ភាគរយ ស្មើនឹងចំនួន ៩,១៧៥តោន។
របាយការណ៍របស់ ស.អ.ក បានឱ្យដឹងទៀតថា ចំពោះការនាំអង្ករចេញទៅកាន់ប្រទេសចិនក្នុង ខែមករា ឆ្នាំ២០២០បានថយចំនួនចុះផងដែរ ប្រមាណ ២០ភាគរយ ឬ ៣,៦៦៤តោន។ បើសង្កេតជារួមលើមូលដ្ឋាននៃការថយចុះនេះ បណ្ដាលមកពីការប្រារព្ធពិធីចូលឆ្នាំនៅប្រទេសចិនធ្វើ ដែលធ្វើនៅខែមករា ខែមុននេះ ដែលលឿនជាងកាលចូលឆ្នាំចិន នៅឆ្នាំ២០១៩ ដើមខែកុម្ភៈ។ ហេតុនេះហើយបានជាការបញ្ជាទិញ និងដំណើរដឹកជញ្ជូនត្រូវឈប់សម្រាកក្នុងរយៈពេលជាមធ្យមប្រមាណ ១៤ថ្ងៃ។
ចំណែកឯទីផ្សារអាស៊ានវិញ ឃើញថាមានការប្រែប្រួលខ្លះ អាស្រ័យលើប្រទេសជិតខាង ដូចជា ថៃ និងវៀតណាម។ ទន្ទឹមនឹងនេះ ទីផ្សារចម្បងរបស់កម្ពុជា គឺប្រទេសម៉ាឡេស៊ី និងព្រុយណេ ដែលមិនមានការប្រែប្រួលខ្លាំងនោះទេ គឺនៅរក្សាបានស្ថានភាពល្អមានលំនឹងនៅឡើយ។ ជាការបញ្ជាក់បន្ថែមរបស់របាយការណ៍ ស.អ.ក និងបានបន្តទៀតថា រីឯទីផ្សារផ្សេងៗទៀត បានកើនឡើងប្រមាណ ៤០ភាគរយ ក្នុងនោះប្រទេសកាប៉ុង នៅតែបន្តនាំមុខដដែល ខណៈនោះដែរ អូស្រ្តាលីបានបង្កើនល្បឿននាំចូលអង្ករច្រើនពីកម្ពុជាគួរឱ្យកត់សម្គាល់ផងដែរ។
របស់របាយការណ៍ ស.អ.ក ដដែលបានឱ្យដឹងថាទឹកប្រាក់ពីការនាំចេញអង្ករកម្ពុជា ក្នុងខែមករា ឆ្នាំ២០២០ មានប្រមាណ ៣៩លានដុល្លារ៕
ដោយ៖ឌីណា
