ភ្នំពេញ៖ ការប្តូរឈ្មោះក្រសួង «ឧស្សាហកម្ម និងសិប្បកម្ម» ទៅជាក្រសួង«ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍» ក្នុងឆន្ទ:គិតគូខ្ពស់ និងផ្តល់សារ:សំខាន់ ដើម្បីឱ្យស្របតាមនិន្នាកាសាកលលើការអភិវឌ្ឍន៍វិស័យវិទ្យាសាស្ត្រ បច្ចេកវិទ្យា និងនវានុវត្តន៍ ជាពិសេសបរិបទនៃបដិវត្តន៍ឧស្សាហកម្មជំនាន់ទី ៤.០ និងក្នុងន័យប្រមូលធុនធានខួរក្បាលកូនខ្មែ ដែលមានជំនាញខ្ពស់ផ្នែកវិទ្យាសាស្ត្របច្ចេកវិទ្យា និងការបង្កើតថ្មីឱ្យទទួលបាននូវឱកាសស្រាវជ្រាវនិងអភិវឌ្ឍន៍ ចំណេះជំនាញរបស់ខ្លូនសម្រាប់បម្រើកិច្ចការប្រទេសជាតិឱ្យកាន់តែរីកចម្រើនទៅមុខជាលំដាប់។ ជាការបញ្ជាក់របស់ លោក ចម ប្រសិទ្ធ រដ្ឋមន្រ្តីឧស្សាហកម្ម និងសិប្បកម្ម នៅក្នុងកិច្ចប្រជុំបន្ទាន់មួយដើម្បីពិនិត្យពិភាក្សាលើច្បាប់ស្តីពីការប្តូរឈ្មោះថ្មី និងអនុក្រឹត្យស្តីពីការរៀបចំក្រសួង កាលពីថ្ងៃទី៣១ ខែមករា ឆ្នាំ២០២០ នៅទីស្ដីការក្រសួង។
យោងតាមការសម្រេចឯកភាព សម្តេច ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២២ ខែមករា ឆ្នាំ២០២០ និងលិខិតជម្រាបជូនរបស់ទីស្តីការគណ:រដ្ឋមន្ត្រី ចុះថ្ងៃទី២៤ ខែមករា ឆ្នាំ២០២០ ឱ្យប្តូរឈ្មោះក្រសួង «ឧស្សាហកម្ម និងសិប្បកម្ម» ទៅជាក្រសួង«ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍»។ បើតាមក្រសួងឧស្សាហកម្ម។
បើតាមលិខិតរបស់ទីស្តីការគណ:រដ្ឋមន្ត្រី ចុះថ្ងៃទី២៤ ខែមករា ឆ្នាំ២០២០ ដែលអនុញ្ញាឱ្យប្តូរឈ្មោះថ្មី ឱ្យក្រសួង ធ្វើវិសោធនកម្មច្បាប់ទាំងឡាយ និងឯកសារកតិយុត្តផ្សេងៗ ដែលមានការពាក់ព័ន្ធដល់រចនាសម្ព័ន្ធ និងការប្រព្រឹត្តទៅនៃក្រសួងថ្មី។ ឱ្យបង្កើតអង្គភាពពីរ គឺអគ្កនាយកដ្ឋានវិទ្យាសាស្រ្តបច្ចេកវិទ្យា និងនវានុវត្តន៍ និងវិទ្យាស្ថានជាតិ វិទ្យាសាស្រ្ត បច្ចេកទេស និងនវានុវត្តន៍ ដែលមានថ្នាក់ស្មើអគ្គនាយកដ្ឋាន។ ការបង្កើតអង្គភាពទាំងពីរនេះ គឺពុំមានការតម្រូវឱ្យបន្ថែមនូវក្របខណ្ឌរដ្ឋនោះទេ ពោលគឺប្រើប្រាស់ក្របខណ្ឌទាំងឡាយដែលកំពុងមាន ហើយពាក់ព័ន្ធដលើការងារវិទ្យាសាស្រ្ត និងនវានុវត្តន៍។ ជាការបញ្ជាក់ក្នុងលិខិតខាងលើ។
លិខិតដដែលនេះបានបន្តថា ឱ្យមានការដឹកនាំកិច្ចប្រជុំអន្តរក្រសួង ជាមួយបណ្ដាក្រសួងពាក់ព័ន្ធជុំវិញការរៀបចំសេចក្ដីព្រាង ស្ដីពីរចនាសម្ព័ន្ធ អង្គការលេខ និងការប្រព្រឹត្តទៅរបស់ «ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍» ដើម្បីឆ្លងដាក់គណៈរដ្ឋមន្រ្តី។ និងបានបញ្ជាក់ថា បើកទូលាយឱ្យមានឥស្សរជនសំខាន់ៗបញ្ញាវន្ត ដែលមានសញ្ញាបត្រផ្នែកវិទ្យាសាស្រ្ត និងបច្ចេកវិទ្យា ក៏ដូចជាគំនិតផ្ដួចផ្ដើមទាំងឡាយ ដែលមានលក្ខណៈនវានុវត្តន៍ និងមន្រ្តីបច្ចេកវិទ្យាវិទ្យាសាស្រ្ត ចូលរួមបម្រើការ ឬផ្ទេរក្របខណ្ឌមានបមណងស្ម័គ្រចិត្ត ពីបណ្ដាក្រសួងនានាដែលបាក់ព័ន្ធការងារវិទ្យាសាស្រ្ត បច្ចេកវិទ្យាមកបម្រើការងារក្នុងអង្គភាពថ្មីទាំងពីរនឹងត្រូវបានបង្កើតឡើង។
ក្នុងលិខិតខាងលើដដែលបានបន្ថែមថា ផ្តល់ការយកចិត្តទុកដាក់ គាំទ្រ និងបង្កលទ្ធភាពទៅតាមសភាពជាក់ស្ដែងនៃតម្រូវការរបស់អង្គភាពទាំងពីរថ្មីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ពីស្ថាប័នពាក់ព័ន្ធទាំងឡាយដើម្បីធ្វើឱ្យផ្នែកស្រាវជ្រាវលើវិទ្យាសាស្រ្ត បច្ចេកវិទ្យា និងរបកគំហើញផ្សេងៗ (នវានុវត្តន៍) របស់កម្ពុជាឱ្យទទួលបានប្រសិទ្ធិភាព និងទូលំទូលាយ ក្នុងប្រយោជន៍ជំរុញឱ្យវិស័យវិទ្យាសាស្រ្តមានការរីកចម្រើន និងផ្ទេរបច្ចេកវិទ្យាស្រមតាមបរិបថនៃបដិវត្តន៍ឧស្សាហកម្មជំនាន់ទី ៤.០។
អគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ ដែលមាននាយកដ្ឋានក្រោមឱវាទចំនួន០៥ និងវិទ្យាស្ថានថ្មីមានឈ្មោះថា៖វិទ្យាស្ថានជាតិ វិទ្យាសាស្ត្រ បច្ចេកវិទ្យា និងនវានុវត្តន៍ ដែលមាននាយកដ្ឋានក្រោមឱវាទចំនួន៣និងមន្ទីរពិសោធន៍មួយមានឋានស្មើនាយកដ្ឋាន គឺមន្ទីរពិសោធន៍ វិទ្យាសាស្ត្រ បច្ចេកវិទ្យា និងនវានុវត្តន៍។ តាមការឱ្យដឹងពីក្រសួងឧស្សាហកម្ម បានបន្ថែមថា សេចក្ដីព្រាងច្បាប់ស្ដីពីការបង្កើតក្រសួងឧស្សាហកម្ម វិទ្យាសាស្ត បច្ចេកវិទ្យា និងនវានុវត្តន៍ មាន៩មាត្រា ចំណែកឯសេចក្ដីព្រាងអនុក្រឹត្យស្ដីពីការរៀបចំ និងការប្រព្រឹត្តទៅរបស់ក្រសួង បានច្របាច់ខ្លឹមសារអនុក្រឹត្យពីរកន្លងមក បញ្ចូលគ្នាតែមួយវិញ ព្រមទាំងមានបង្កើតនូវជំពូកថ្មី ដែលចែងអំពីអគ្គនាយកដ្ឋានវិទ្យាសាស្ត បច្ចេកវិទ្យា និងនវានុវត្តន៍ និងវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវាវត្តន៍ឱ្យស្របទៅនិងបេសកកម្មរបស់ក្រសួងថ្មី៕
ដោយ៖ឌីណា
