ភ្នំពេញ៖ គម្រោងសាងសង់អគារពហុមុខងារ ស្ដារ អូហ្សិន បេ វិយូរ លើផ្ទៃដីទំហំ ៧២.១១៥ម៉ែត្រការ៉េ ដែលស្ថិតនៅនៅភូមិ១ សង្កាត់លេខ៣ ក្រុង/ខេត្តព្រះសីហនុ របស់ក្រុមហ៊ុន ថៃ ប៊ុន រ៉ុង ដែលសិក្សាវាយតម្លៃហេតុប៉ះពាល់បរិស្ថាន និងសង្គមពេញលេញ ដោយក្រុមហ៊ុនទីប្រឹក្សា អ៊ី&អេ ខនសាល់ធេន ត្រូវបានអន្តរក្រសួងគាំទ្រពេញលេញ។
ការគាំទ្រគម្រោងខាងលើ នៅក្នុងកិច្ចប្រជុំអន្តរក្រសួងស្តីពី ការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) ដែលដឹកនាំដោយ លោក សូ ខន ឬទ្ធីគុណ រដ្ឋលេខាធិការក្រសួងបរិស្ថាន ព្រមទាំងមានការចូលរួមពី លោក និងលោកស្រី តំណាងអគ្គនាយកដ្ឋានពាក់ព័ន្ធនៃក្រសួងបរិស្ថាន អគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព អគ្គាធិការដ្ឋាន ជំនួយការអមក្រសួង និងតំណាងអន្តរក្រសួងពាក់ព័ន្ធ ក្រុមប្រឹក្សាអភិវឌ្ឍន៍កម្ពុជា (CDC) រដ្ឋបាលខេត្ដ/មន្ទីរបរិស្ថានខេត្ដព្រះសីហនុ និងតំណាងនាយកដ្ឋានវាយតម្លៃហេតុប៉ះពាល់បរិស្ថាន តំណាងម្ចាស់គម្រោង និងក្រុមហ៊ុនទីប្រឹក្សា។
ជារួមអង្គប្រជុំ បានទទួលលទ្ធផល ដូចខាងក្រោម៖ អង្គប្រជុំ បានគាំទ្រលើគម្រោងខាងលើ ក្នុងនោះ ម្ចាស់គម្រោង គួររំលេចរចនាបទខ្មែរខ្លះនៅក្នុងសំណង់អគារ ព្រមទាំង ត្រូវចូលរួមប្រើប្រាស់ថាមពលពន្លឺព្រះអាទិត្យ។ ជាមួយគ្នានេះដែរ ត្រូវគ្រប់គ្រងសំណល់រឹង-រាវ ឱ្យបានត្រឹមត្រូវដោយគោរពទៅតាមបទដ្ឋានបច្ចេកទេស។ ហើយអ្វីដែលសំខាន់ ត្រូវញែកឱ្យដាច់រវាងប្រព័ន្ធរំដោះទឹកភ្លៀង និងប្រព័ន្ធលូទឹកកខ្វក់។ ម្យ៉ាងវិញទៀត ម្ចាស់គម្រោង ត្រូវបញ្ចូលបន្ថែមច្បាប់សំណង់ថ្មីៗ និងគោរពឱ្យបានខ្ជាប់ខ្ជួន ថែមទាំងត្រូវ ត្រូវគោរពតាមលក្ខខណ្ឌដែលក្រសួងរៀបចំដែនដី នគរូបនីយកម្ម និងសំណង់ បានកំណត់សម្រាប់ចំណតរថយន្ដ ដោយភ្ជាប់គ្នានេះផងដែរ ត្រូវរៀបចំប្រព័ន្ធការពារសុវត្ថិភាពឱ្យស្របតាមបទដ្ឋានបច្ចេកទេស។
ទាក់ទងទៅនឹងសាងសង់សំណង់ ម្ចាស់គម្រោង ត្រូវមានវគ្គបណ្ដុះបណ្ដាលបុគ្គលិក-កម្មករឱ្យបានយល់ដឹងពីគ្រប់គ្រងសំណល់ និងពីការថែរក្សាបរិស្ថាន ហើយត្រូវប្រកាន់ភ្ជាប់នូវ ការពិនិត្យផ្ទៀងផ្ទាត់ចំពោះការបង់មូលនិធិបរិស្ថាន និងសង្គម ហើយអ្វីដែលជាធាតុសំខាន់ ម្ចាស់គម្រោង និងក្រុមហ៊ុនទីប្រឹក្សាត្រូវកែសម្រួលរបាយការណ៍នេះ ស្របតាមស្មារតីអង្គប្រជុំ៕
ដោយ៖ឌីណា
