ភ្នំពេញ៖ ប្រទេសកម្ពុជា ជាកន្លែងវិនិយោគដ៏ពេញនិយមសម្រាប់វិនិយោគិនបរទេស មានកត្តាចំនួន៧ ដែលអំណោយផល និងទាក់ទាញវិនិយោគិនបរទេស។ ជាការថ្លែង លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ក្នុងកម្មវិធីមួយនាសណ្ឋាគារ ឡឺរ៉ូយ៉ាល់ រាជធានីភ្នំពេញក្នុងសប្ដាហ៍នេះ។
លោក សាយ សំអាល់ បានគូសរំលេចជូនភ្ញៀវជាតិ និងអន្តរជាតិដែលចូលរួម មានកត្តាចំនួន៧ ដែលអំណោយផល និងទាក់ទាញចំណាប់អារម្មណ៍អ្នកវិនិយោគឱ្យមកវិនិយោគនៅកម្ពុជា ក្នុងនោះរួមមាន៖
១-សន្តិភាព ស្ថេរភាពនយោបាយ ២-ច្បាប់នៃការវិនិយោគ និងបរិយាកាសនៃការវិនិយោគមានអំណោយផល ៣-រាជរដ្ឋាភិបាលជំរុញការវិនិយោគ ៤-ការផ្សារភ្ជាប់នៃហេដ្ឋារចនាសម្ព័ន្ធ មានដូចជាទឹក ភ្លើង ព្រលានយន្តហោះ ផ្លូវដឹកជញ្ជូនកាន់តែមានភាពប្រសើរឡើង ៥-ប្រព័ន្ធហិរញ្ញវត្ថុមានស្ថិរភាពទាំងប្រាក់រៀល និងដំណើរការរបស់ប្រព័ន្ធធនាគារ និងប្រព័ន្ធទាំងមូល ៦-ការបង់ពន្ធមានភាពអនុគ្រោះ និងធូរស្រាលជាង បើធៀបនឹងប្រទេសដទៃទៀត និងទី៧-អ្នកវិនិយោគដែលមិនមានសញ្ជាតិកម្ពុជា អាចធ្វើការជួលរយៈពេលវែង។
កាលពីពេលថ្មីៗនេះ ក្រុមហ៊ុនបរទេសទាំងជិត ១០០ក្រុមហ៊ុនបានមកបំពេញទស្សនកិច្ចនិងសិក្សាស្វែងយល់ពីសក្ដានុពលវិនិយោគ នៅកម្ពុជារួមមានក្រុមហ៊ុនចិន ជប៉ុនថៃ និងវៀតណាមជាដើម ហើយក៏បានចូលជួបជាមួយ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដើម្បីពិភាក្សាការងារបន្ថែម។
តាមការបញ្ជាក់របស់ លោក ចាន់ថុល បានឱ្យដឹងថាក្នុងកំណត់ត្រាគម្រោងវិនិយោគដែលបានអនុម័តនៃប្រវត្តិប្រតិបត្តិការការងាររបស់ ក.អ.ក. កន្លងមក រួមមាន៖ គម្រោងវិនិយោគដែលបានអនុម័តក្នុងឆ្នាំ២០២៤ សរុបចំនួន ៤១៤គម្រោង(តួលេខខ្ពស់បំផុតក្នុងកំណត់ត្រា៣០ឆ្នាំ) និងគម្រោងវិនិយោគដែលបានអនុម័តក្នុងរយៈពេល ២ខែ ដើមឆ្នាំ២០២៥ សរុបចំនួនជាង ១១០គម្រោង។
តួលេខទាំងនេះ ជាសក្ខីភាពជាក់ស្តែងបង្ហាញពីប្រសិទ្ធភាពនៃច្បាប់ស្តីពីការវិនិយោគ ក៏ដូចជាគោលនយោបាយនានារបស់រាជរដ្ឋាភិបាល ក្នុងថែទាំគាំទ្រកិច្ចការវិនិយោគនៅកម្ពុជា ដែលបានបង្ហាញពីការយកចិត្តដាក់ខ្ពស់របស់រាជរដ្ឋាភិបាលចំពោះវិស័យឯកជន ដោយបានចាត់ទុកវិស័យនេះជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ។ ជាការលើកឡើងបន្ត លោក លោក ចាន់ថុល៕
ដោយ៖ មឿន ឌីណា (Moeun Dyna)
