ភ្នំពេញ៖ ស្រូវមួយចំនួនក្នុងខេត្តព្រៃវែង និងខេត្តស្វាយរៀង ស្រុកស្វាយជ្រំ ក្នុងឃុំចំនួន៧ សរុបប្រមាណ ៣៤៣៧ហិកតា កំពុងជួបបញ្ហារាំងស្ងួត ហើយនិងប្រឈមស្ថានភាពខ្វះទឹក ប្រសិនបើមិនមានភ្លៀងធ្លាក់ក្នុងរយៈពេល ១សប្តាហ៍ទៀត។ តាមការបញ្ជាក់ លោក តន់ វ៉ាន់ថារ៉ា រដ្ឋលេខាធិការ និងជាប្រធានក្រុមសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តទាំងពីរ។
លោក តន់ វ៉ាន់ថារ៉ា រួមជាមួយប្រធានមន្ទីរធនធានទឹក និងឧតុនិយមខេត្តព្រៃវែង និងខេត្តស្វាយរៀង និងសហការី ព្រមទាំង លោក សរ សុដានី អភិបាលរងខេត្តស្វាយរៀង និងអាជ្ញាធរមូលដ្ឋាន បានចុះពិនិត្យស្ថានភាពប្រភពទឹកទន្លេតូច ស្ថិតក្នុងភូមិសាស្ត្រខេត្តកំពង់ចាម និងខេត្តព្រៃវែង នៅថ្ងៃទី១៥ ខែសីហា ឆ្នាំ២០២៤។
រដ្ឋលេខាធិការ បានឱ្យដឹងថា ការចុះពិនិត្យស្ថានភាពទឹកទន្លេតូចនៅពេលនេះ គឺដើម្បីបើកទ្វារទឹកឱ្យហូរកាត់តាមប្រព័ន្ធប្រឡាយវ៉ៃគោជំហាន១ មកជួយសង្គ្រោះស្រូវនៅប៉ែកខាងក្រោមក្នុងខេត្តព្រៃវែង និងបន្តហូរចូលតាមប្រព័ន្ធប្រឡាយកូនភ្លោះ និងអាងទឹកកំពង់ជ្រៃ ដើម្បីជួយសង្គ្រោះស្រូវក្នុងខេត្តស្វាយរៀង ស្រុកស្វាយជ្រំ ចំនួន ៧ឃុំ ស្មើនឹង៣១០២គ្រួសារ។
លោក បានបញ្ជាក់ថា ស្រូវមួយចំនួនក្នុងខេត្តព្រៃវែង និងខេត្តស្វាយរៀង ស្រុកស្វាយជ្រំ ក្នុងឃុំចំនួន៧ មានឃុំស្វាយយា ឃុំក្រោលគោ ឃុំស្វាយធំ ឃុំឈើទាល ឃុំគ្រួស ឃុំចំបក់ និងឃុំចំឡង សរុបប្រមាណ ៣៤៣៧ហិកតា កំពុងជួបបញ្ហារាំងស្ងួត ហើយនឹងប្រឈមស្ថានភាពខ្វះទឹក ប្រសិនបើមិនមានភ្លៀងធ្លាក់ក្នុងរយៈពេល ១សប្តាហ៍ទៀត។
ជាលទ្ធផល រដ្ឋលេខាធិការ បានឱ្យដឹងថា មន្ទីរធនធានទឹក និងឧតុនិយមខេត្តព្រៃវែងនឹងបើកទ្វារទឹកតាមប្រព័ន្ធប្រឡាយវ៉ៃគោជំហាន១ ជាបណ្ដើរៗ ដើម្បីបញ្ជូនទឹកទៅកាន់តំបន់ដែលជួបប្រទះភាពរាំងស្ងួតប្រឈមនឹងការខ្វះទឹក។
គួរបញ្ជាក់ផងដែរថា ស្ថានភាពការងារបង្កបង្កើនផលស្រូវវស្សារបស់ប្រជាកសិករនៅតាមបណ្ដាក្រុង ស្រុក នៅក្នុងខេត្តស្វាយរៀង សរុបបានចំនួន ១៤៣៦៨១ហិកតា ស្មើនឹង ៨៥,៧៨% នៃផែនការគ្រោងចំនួន ១៦៧៥០០ហិកតា៕
ដោយ៖ មឿន ឌីណា (Moeun Dyna)
