ភ្នំពេញ៖ ធនាគារ ABA បានប្រកាសការវិនិយោគនូវទឹកប្រាក់ ៣០លានដុល្លារ លើសញ្ញាបណ្ណសាជីវកម្ម ដើម្បីចូលរួម ក្នុងការអភិវឌ្ឍអាកាសយានដ្ឋានអន្តរជាតិតេជោ (ពីមុនត្រូវបានស្គាល់ថាជា អាកាសយានដ្ឋានអន្តរជាតិភ្នំពេញថ្មី)។
ពិធីចុះហត្ថលេខាលើការវិនិយោគត្រូវបានធ្វើឡើងនៅថ្ងៃទី១៤ ខែធ្នូ រវាងធនាគារ ABA និងក្រុមហ៊ុនអូវើស៊ី ខេមបូឌានអ៊ិនវេសមិន ឯ.ក (OCIC) រួមជាមួយក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC)។ ដោយមានការគាំទ្រដ៏ខ្ពង់ខ្ពស់ពីសម្តេចតេជោ ហ៊ុន សែន អាកាសយានដ្ឋាននេះ នឹងក្លាយជាមជ្ឈមណ្ឌលដឹកជញ្ជូនដ៏ធំដែលនឹងជួយបង្កើនការវិនិយោគរបស់ប្រទេស និងការទាក់ទាញផ្នែកទេសចរណ៍។
លោក Askhat Azhikhanov នាយកប្រតិបត្តិធនាគារ ABA បានមានប្រសាសន៍ពាក់ព័ន្ធនឹងការវិនិយោគនេះថា យើងមានមោទនភាពក្នុងការចូលរួមដល់ការកសាងសមិទ្ធផលដ៏លេចធ្លោមួយនេះរបស់កម្ពុជា គឺអាកាសយានដ្ឋានអន្តរជាតិតេជោ។ យើងខ្ញុំនៅធនាគារ ABA ជឿជាក់ថា គម្រោងដ៏ធំនេះ នឹងមិនត្រឹមតែជួយជំរុញដល់វិសាលភាព សេដ្ឋកិច្ចកម្ពុជានៅទូទាំងតំបន់ប៉ុណ្ណោះទេ ប៉ុន្តែក៏នឹងជួយដល់កំណើនបន្ថែមទៀតនៃវិស័យទេសចរណ៍ និងវិស័យភ័ស្តុភារកម្មនៃសេដ្ឋកិច្ចកម្ពុជាផងដែរ។
លោក បានបញ្ជាក់ ការវិនិយោគនេះ ធ្វើឡើងស្របតាមបេសកកម្មរបស់ ABA ដែលប្រតិបត្តិការក្នុងនាមជាដៃគូជាមួយធុរកិច្ចកម្ពុជានិងប្រជាជនកម្ពុជា។ ធនាគារបាននឹងកំពុងបន្តចូលរួមក្នុងការអភិវឌ្ឍប្រកបដោយចីរភាពរបស់ប្រទេសជាតិ។
លោក បានបន្តថា ជាក់ស្ដែងភាគហ៊ុនិក ABA បានវិនិយោគទឹកប្រាក់ ១.២ប៊ីលានដុល្លារ ដល់ដើមទុនរបស់ធនាគារ ដែលរួមមានមូលធនភាគហ៊ុនិកជិត ១.១ប៊ីលានដុល្លារ និង ១០០លានដុល្លារ នៅក្នុងបំណុលបន្ទាប់បន្សំ។ ភាគហ៊ុនិក ABA ជឿជាក់លើសក្តានុពលនៃសេដ្ឋកិច្ចកម្ពុជា និងបានរក្សាប្រាក់ចំណេញទាំងអស់នៅក្នុងធនាគារជាការវិនិយោគ ដើម្បីជំរុញការអភិវឌ្ឍបន្ថែមទៀតរបស់ ABA និងបុគ្គលិករបស់ខ្លួន។
ដើម្បីចូលរួមគាំទ្រដល់ការអភិវឌ្ឍសេដ្ឋកិច្ចសង្គម និងហេដ្ឋារចនាសម្ពន្ធ ធនាគារ ABA ក្នុងរយៈពេលប្រាំឆ្នាំចុង ក្រោយ បានចូលរួមបង់ពន្ធជូនរដ្ឋចំនួន ២០០លានដុល្លារ។ ធនាគារ ក៏មានកិត្តិយសដោយទទួល បានលិខិតសរសើរ ពីសម្តេច តេជោ ហ៊ុន សែន សម្រាប់ការចូលរួមចំណែកដល់ការអភិវឌ្ឍ និងភាពរីកលូតលាស់នៃសេដ្ឋកិច្ចជាតិ ក្នុងនាមជាសហគ្រាសដែលបានបង់ពន្ធច្រើនជាងគេលំដាប់ទី១២ ក្នុងចំណោមអ្នកបង់ពន្ធទាំងអស់ក្នុងឆ្នាំ២០២០។
ធនាគារ ABA ក៏បានរួមចំណែកជួយដល់វិស័យជាក់ស្ដែងនៃសេដ្ឋកិច្ច តាមរយៈការផ្ដល់ហិរញ្ញវត្ថុដល់អាជីវកម្ម ដែលមានស្ថិរភាព និងផលិតភាពតូចធំនានា និងបានផ្ដល់កម្ចីក្នុងទឹកប្រាក់ ៥.២ប៊ីលានដុល្លារ រួចហើយ។ ដោយបច្ចុប្បន្នកំពុងបម្រើអតិថិជនប្រមាណជិត ២លាននាក់ ធនាគារក៏បានរួមចំណែកដល់ការអភិវឌ្ឍហេដ្ឋារចនាសម្ពន្ធឌីជីថលរបស់កម្ពុជា ដែលសម្រួលដល់សេដ្ឋកិច្ចជាតិឱ្យកាន់តែមានប្រសិទ្ធភាព។
ការប្ដេជ្ញាចិត្តដ៏រឹងមាំរបស់ ABA ចំពោះការអភិវឌ្ឍប្រទេសជាតិ អាចត្រូវបានឆ្លុះបញ្ចាំងតាមរយៈការផ្ដល់ការងារដល់ បុគ្គលិកក្នុងស្រុកប្រមាណជិត ៧,០០០នាក់ នៅតាមបណ្ដា ៨០សាខានិងបណ្ដាញរបស់ខ្លួន ដោយបន្តវិនិយោគដល់ ការបណ្ដុះបណ្ដាល និងអភិវឌ្ឍបុគ្គលិកជាប្រចាំផងដែរ។
ស្របតាមគោលការណ៍ទំនួលខុសត្រូវសង្គមរបស់ខ្លួន ធនាគារ ABA បានចូលរួមជាទៀងទាត់ក្នុងកម្មវិធីបរិច្ចាគ និង សប្បុរសធម៌ក្នុងអំឡុងពេលដែលខ្លួនប្រតិបត្តិការធុរកិច្ច។ ក្នុងរយៈពេលបីឆ្នាំចុងក្រោយ ធនាគារបានផ្ដល់ជំនួយ ប្រមាណ ១.៥លានដុល្លារ ដោយបានគាំទ្រដល់វិស័យសុខាភិបាល កីឡា អប់រំ សកម្មភាពបរិយាបន្នហិរញ្ញវត្ថុ និងកិច្ចខិតខំប្រឹងប្រែងរបស់រាជរដ្ឋាភិបាលក្នុងការប្រយុទ្ធប្រឆាំងនឹងជំងឺកូវីដ-១៩។
ជាមួយការវិនិយោគទឹកប្រាក់ ៣០លានដុល្លារ ក្នុងសញ្ញាបណ្ណអាកាសយានដ្ឋានអន្តរជាតិតេជោ ធនាគារ ABA សូមបង្ហាញជាថ្មីនូវការប្ដេជ្ញាចិត្តរបស់ខ្លួនក្នុងការចូលរួមបន្ថែមដល់ការអភិវឌ្ឍសេដ្ឋកិច្ច និងសុខុមាលភាពសង្គមស្របតាមយុទ្ធសាស្ត្រអភិវឌ្ឍរបស់រាជរដ្ឋាភិបាលកម្ពុជា៕
ដោយ៖ មឿន ឌីណា (Moeun Dyna)
