ពោធិ៍សាត់៖ សមិទ្ធផលថ្មី «សួនពោធិ៍សាត់» ដែលជាអតីតសួនច្បារ១៤មករា ព្រមទាំងហេដ្ឋារចនាសម្ព័ន្ធបំពេញបន្ថែមមួយចំនួនទៀត មានទីតាំងជាប់ស្ពានថ្ម ឆ្លងស្ទឹងពោធិ៍សាត់ ប្រសព្វផ្លូវលេខ១០១ និងផ្លូវជាតិលេខ៥ ស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ នឹងត្រូវលេចចេញរូបរៀងឡើង ដើម្បីលើកកំពស់សោភ័ណភាពក្រុងពោធិ៍សាត់ និងដើម្បីបង្កើនសក្ដនុពលផងដែរ។

«សួនពោធិ៍សាត់» ដែលត្រូវបាននឹងកំពុងស្ថាបនានោះ ស្ពានអាកាសថ្មើរជើងថ្មី ឆ្លងកាត់ផ្លូវជាតិលេខ៥ ត្រង់ចំណុចសារមន្ទីរខេត្តពោធិ៍សាត់ ក៏នឹងត្រូវបានធ្វើឡើងជាបន្តបន្ទាប់ ពីលើសមិទ្ធផលដែលបានធ្វើរួច មានដូចជាសួនច្បារផ្លូវលេខ១០១ ទល់មុខសាលាខេត្ត អគាររដ្ឋបាលសាលាខេត្ត ភ្លើងស្តុប ផ្លូវក្រាលកៅស៊ូ ប៉េតុង ភ្លើងបំភ្លឺផ្លូវ ប្រព័ន្ធលូបង្ហូរទឹក ដំបូលផ្សារថ្មី ទំនប់បង្ហៀរក្បាលហុង ។ល។ បើតាមការថ្លែងឱ្យដឹងពី លោក ឃុត ឧសភា នាយករដ្ឋបាលខេត្តពោធិ៍សាត់។

លោកនាយករដ្ឋបាលបានបន្តថា សួនច្បារនេះ មិនត្រឹមតែលើកកម្ពស់សោភ័ណភាព និងមុខមាត់ខេត្តពោធិ៍សាត់ ក្នុងការទាក់ទាញនូវភ្ញៀវជាតិ អន្តរជាតិ សម្រាប់ប្រជាពលរដ្ឋ បានហាត់ប្រាណប៉ុណ្ណោះទេ ប៉ុន្តែវាក៏បង្ហាញពីសក្ដានុពលផងដែរ។ ទាំងនេះយើងធ្វើបាន គឺដោយសារប្រទេសជាតិ មានសុខសន្តិភាព។

សួនច្បារ១៤មករា ពីមុនត្រូវបានស្ថាបនាឡើងក្នុងអំឡុងអាណត្តិដឹកនាំ របស់ លោក អ៊ុង សាមី អតីត អភិបាលខេត្តពោធិ៍សាត់ ហើយត្រូវបានដាក់សម្ពោធឱ្យប្រើប្រាស់ជាផ្លូវការ ក្រោមអធិបតីភាពសម្តេច ស ខេង, ដោយបច្ចុប្បន្នសួនច្បារនេះ មានសភាពចាស់ទ្រុឌទ្រោម និងស្មៅដុះទ្រុពនោះ លោក ម៉ៅ ធនិន អភិបាលខេត្តពោធិ៍សាត់ បានស្ថាបនាឡើងវិញ ដោយបែងចែកជាទីធ្លាការ៉ូឡា សួនច្បារ បង្គោលភ្លើង និងបង់អង្គុយ សម្រាប់ប្រជាពលរដ្ឋលំហែកម្សាន្ត និងហាត់ប្រាណផងដែរ៕

ដោយ៖ Moeun Dyna