កំពត៖ លោក ថោង ខុន រដ្ឋមន្ត្រីក្រសួងទេសចរណ៍ បានប្រតិកម្មទៅនឹងម្ចាស់សណ្ឋាគារ និងផ្ទះសំណាក់ដែលមិនព្រមទទួលការកក់បន្ទប់ពីភ្ញៀវ ហើយថែមទាំងបានតំឡើងថ្លៃលើសពីថ្ងៃធម្មតា នៅក្នុងពិធីបុណ្យសមុទ្រលើកទី៨ ជុំទី២ នៅខេត្តកំពត នឹងប្រារព្ធធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ ខែធ្នូ ឆ្នាំ២០១៩។

ក្រោយមានការរិះគន់ពីបញ្ហាខ្វះបន្ទប់ស្នាក់នៅ សម្រាប់ពិធីបុណ្យសមុទ្រ លោក ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យរដ្ឋបាលខេត្តកំពត និងមន្ទីរទេសចរណ៍ខេត្ត ត្រូវចុះផ្សព្វផ្សាយឱ្យម្ចាស់សណ្ឋាគារ ផ្ទះសំណាក់ទាំងអស់ក្នុងខេត្ត ត្រូវទទួលការកក់បន្ទប់ស្នាក់របស់ភ្ញៀវឡើងវិញ និងសូមកុំដំឡើងថ្លៃហួសហេតុពេក ដើម្បីធានាសេវាស្នាក់នៅឱ្យបានល្អប្រសើរក្នុងពិធីបុណ្យសមុទ្រ នាចុងឆ្នាំ២០១៩។

ការរិះគន់ចំៗលើបញ្ហាស្នាក់នៅខាងលើនេះ ត្រូវបានលោក ថោង ខុន សង្កត់ធ្ងន់នៅក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី៨ ជុំទី២ នៅសាលាខេត្តកំពត កាលថ្ងៃទី១៤ ខែវិច្ឆិកា ខណៈក្រុមមន្ត្រីរាជការ ក្រុមសិល្បករ ប្រជាពលរដ្ឋ និងភ្ញៀវទេសចរមួយចំនួន ក៏កំពុងជួបប្រទះ និងព្រួយបារម្ភពីការខ្វះកន្លែងស្នាក់នៅនេះផងដែរ។

ក្នុងកិច្ចប្រជុំខាងលើ លោក ថោង ខុន បានលើកលើងថា បញ្ហានេះក៏ព្រោះតែម្ចាស់សណ្ឋាគារ និងផ្ទះសំណាក់មួយចំនួន មិនព្រមទទួលការកក់បន្ទប់ស្នាក់នៅពីភ្ញៀវទាល់តែសោះ ដោយបញ្ជាក់ទាំងមិនសមហេតុផលមកវិញថា ទុកជួលភ្លាមៗនៅពេលពិធីបុណ្យមកដល់ (ក្នុងបំណងដើម្បីទទួលបានតម្លៃថ្លៃជាងការកក់)។ លោករដ្ឋមន្ត្រីសង្កត់ធ្ងន់បន្តទៀតថា «បញ្ហានេះត្រូវតែដោះស្រាយឱ្យបានជាដាច់ខាត»។ ក្នុងនោះដែរ លោក ក៏បានស្នើឱ្យ លោក ជាវ តាយ អភិបាលខេត្តកំពត ត្រូវជួយជំរុញការដោះស្រាយបញ្ហានេះឱ្យបានល្អឡើងវិញផងដែរ។ ជាមួយគ្នានេះដែរ លោក ក៏បានជំរុញឱ្យអនុគណៈកម្មការ ត្រូវសហការជាមួយក្រុមហ៊ុនណាមួយ ដើម្បីផ្ដល់សេវាស្នាក់នៅក្នុងតង់ ជួយសម្រួលដល់ការស្នាក់នៅរបស់ភ្ញៀវទេសចរ ពីព្រោះបន្ទប់ស្នាក់នៅតាមសណ្ឋាគារ ផ្ទះសំណាក់ គឺមិនគ្រប់គ្រាន់នោះឡើយ។

លោករដ្ឋមន្ត្រីបានពន្យល់ថា នៅពេលមានពិធីបុណ្យម្ដងៗ ម្ចាស់សេវាស្នាក់នៅ សណ្ឋាគារ ផ្ទះសំណាក់នានា គួរតែសប្បាយចិត្តក្នុងការទទួលការកក់បន្ទប់ស្នាក់នៅរបស់ភ្ញៀវ មិនមែនមិនទទួលការកក់បន្ទប់ស្នាក់នៅដូច្នេះទេ។ ម្យ៉ាងទៀត ម្ចាស់សណ្ឋាគារលើភ្នំបូកគោ គួរពិចារណាក្នុងការបញ្ចុះតម្លៃខ្លះ ដើម្បីទាក់ទាញទេសចរទៅទីនោះអោយបានច្រើន។

ពិធីបុណ្យសមុទ្រលើកទី៨ ជុំទី២ នៅខេត្តកំពត នឹងប្រារព្ធធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ ខែធ្នូ ឆ្នាំ២០១៩ ខាងមុខ ខណៈរដ្ឋមន្ត្រីក្រសួងទេសចរណ៍បានបង្ហាញការរំពឹងទុកថា នឹងមានភ្ញៀវទេសចរ និងប្រជាពលរដ្ឋចូលរួមទស្សនាលេងកម្សាន្តច្រើនកុះករ៕

ដោយ៖ ឌីណា