ភ្នំពេញ៖ អន្តរក្រសួងបានគាំទ្រទៅលើគម្រោង ស្ថាបនាផ្លូវជាតិលេខ ៧១C ប្រវែង ១១៤,៦២គ.ម នៅក្នុងភូមិសាស្រ្តក្រុងសួង ស្រុកត្បូងឃ្មុំ ស្រុកក្រូចឆ្មារ ខេត្តត្បូងឃ្មុំ និងស្រុក ស្ទឹងត្រង់ ស្រុកចំការលើ ខេត្តកំពង់ចាម របស់ក្រសួងសាធារណការ និងដឹកជញ្ជូន ដែលសិក្សា និងរៀបចំរបាយការណ៍ ដោយក្រុមហ៊ុនទីប្រឹក្សា PPIC CO., LTD.។

ក្នុងកិច្ចប្រជុំអន្តរក្រសួង ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) សម្រាប់គម្រោងផ្លូវជាតិលេខ ៧១C ដឹកនាំដោយ លោក សាបូ អូហ្សាណូ រដ្ឋលេខាធិការក្រសួងបរិស្ថាន កាលពីថ្ងៃទី១៧ ខែតុលា ឆ្នាំ២០១៩។

កិច្ចប្រជុំខាងនេះដែរ​ ដែលមានការចូលរួមពីតំណាងអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ ដោយចីរភាព អគ្គនាយកដ្ឋានពាក់ព័ន្ធនៃក្រសួងបរិស្ថាន អន្តរក្រសួង​ពាក់ព័ន្ធ​ ក្រសួងសាធារណការ និងដឹកជញ្ជូន (ម្ចាស់គម្រោង) ក្រុមប្រឹក្សា អភិវឌ្ឍន៍កម្ពុជា រដ្ឋបាលខេត្តត្បូងឃ្មុំ មន្ទីរបរិស្ថានខេត្តត្បូងឃ្មុំ មន្ទីរបរិស្ថានខេត្តកំពង់ចាម នាយកដ្ឋានវាយតម្លៃ ហេតុប៉ះពាល់បរិស្ថាន និងក្រុមហ៊ុនទីប្រឹក្សា។

កិច្ចប្រជុំ​អន្តរក្រសួងបានសម្រេច ​និងគាំទ្រគម្រោងចេញជាលទ្ធផល​ដូចខាងក្រោម​៖

ទី១-អង្គប្រជុំគាំទ្រគម្រោងផ្លូវជាតិលេខ៧១C។ ទី២-ម្ចាស់គម្រោងត្រូវសហការជាមួយក្រុមហ៊ុនម៉ៅការសាងសង់ ដើម្បីសិក្សា និងរចនាផ្លូវឡើងវិញឱ្យបានត្រឹមត្រូវ ចៀសវាងការប៉ះពាល់លើទីតាំងកប់សពរបស់ប្រជាពលរដ្ឋ ដោយសហការជាមួយអាជ្ញាធរមូលដ្ឋាន។

ទី៣-ម្ចាស់គម្រោង​ ត្រូវសហការជាមួយក្រុមហ៊ុនម៉ៅការសាងសង់ក្នុងការរចនាផ្លូវឱ្យទៅតាមលក្ខណៈបច្ចេកទេស ដើម្បីឱ្យមានភាពធន់នឹងការប្រែប្រួលអាកាសធាតុ។ ទី៤-ម្ចាស់គម្រោងត្រូវរចនាប្រព័ន្ធដោះទឹកភ្លៀងនៅតាមផ្លូវមេ និងផ្លូវរងនីមួយៗ​ឱ្យបានត្រឹមត្រូវ ចៀសវាងការហូរច្រោះ ការជន់លិចដីស្រែ-ចម្ការ និងផ្ទះសម្បែងរបស់ប្រជាពលរដ្ឋ។

ទី៥-ម្ចាស់គម្រោង​ ត្រូវសហការជាមួយក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការដោះស្រាយផលប៉ះពាល់ដោយសារសកម្មភាពគម្រោងឱ្យបានរួចរាល់ មុននឹងអនុវត្តគម្រោង។ ៦-ម្ចាស់គម្រោងត្រូវស្រោចទឹក ជាប្រចាំ ដើម្បីកាត់បន្ថយ ការហុយធូលី ព្រមទាំងកាត់បន្ថយសំឡេង និងរំញ័រនៅតាមទីប្រជុំជនសាលារៀន មណ្ឌលសុខភាព វត្តអារាមជាដើម។

ទី៧-ត្រូវរៀបចំស្លាកសញ្ញាចរាចរណ៍ និងភ្លើងបំភ្លឺនៅតាមដងផ្លូវឱ្យបានត្រឹមត្រូវ ដើម្បីកាត់បន្ថយគ្រោះថ្នាក់ចរាចរណ៍។ ទី៨-ម្ចាស់គម្រោងត្រូវមានផែនការដាំឈើ និងដាំស្មៅតាមជើងទេរ ដើម្បីបន្សាំទៅនឹងការប្រែប្រួលអាកាសធាតុ។ ៩-ក្រុមហ៊ុនទីប្រឹក្សាត្រូវសហការជាមួយម្ចាស់គម្រោង ដើម្បីបញ្ចូលនូវអនុសាសន៍ដែលអង្គប្រជុំបានលើកឡើងនូវចំណុចវិជ្ជមានទៅក្នុងរបាយការណ៍ ESIA ឱ្យបានត្រឹមត្រូវ។ ទី១០-ម្ចាស់គម្រោង និងក្រុមហ៊ុនទីប្រឹក្សា​ ត្រូវអនុវត្តឱ្យបានត្រឹមត្រូវដូចបានរៀបរាប់នៅក្នុងរបាយការណ៍ ESIA នេះ។

សូមរម្លឹកថា តាមគម្រោង​ការសាងសង់​ផ្លូវជាតិ​លេខ៧១​C នៅដំណាច់ឆ្នាំ២០១៩នេះ នឹង​ត្រូវ​ចំណាយរយៈពេលជាង ៣ឆ្នាំ​ ហើយទឹកប្រាក់​ចំណាយ​សរុប​​ជាង ១០០លាន​ដុល្លារ​។ នៅក្នុង​គម្រោង​នៃ​ការសាងសង់​ផ្លូវជាតិ​៧១​C ​ នឹង​ត្រូវ​ស្ថាបនា​ទ្រូងផ្លូវ​ទំហំ ១២ម៉ែត្រ។​ ចំណែកឯ ផ្លូវបំបែក​ចូល​ភូមិ​ ឃុំ​នឹង​ត្រូវធ្វើ​ទំហំ៩ម៉ែត្រ​។ បើតាមការឱ្យដឹងពីមន្រ្តីដឹកជញ្ជូន ខេត្ត​ត្បូងឃ្មុំ និងបានបន្តថា ទីតាំង​គោល​នៃ​ផ្លូវ​ដែល​ត្រូវ​បំបែកចេញ​ពី​ផ្សារ​ចំការលើ​ខេត្ត​កំពង់ចាម​ ​នឹង​ត្រូវ​មក​បញ្ចប់​នៅ​តំបន់​សាលាខេត្ត​ត្បូងឃ្មុំ​ ស្ថិតនៅ​ក្នុង​ភូមិ​ត្រពាំង​ជូរ​ ឃុំ​ស្រឡប់​ ស្រុក/ខេត្ត​ត្បូងឃ្មុំ​ និង​មានផ្លូវ​ខ្នែង​មួយ​ខ្សែ​ទៀត​ឆ្ពោះទៅ​តភ្ជាប់​ជាមួយ​ផ្លូវជាតិ​លេខ៧៣​។

ផ្លូវនេះ មានប្រវែងសរុបចំនួន១១០គីឡូម៉ែត្រ បែកចេញពីផ្លូវជាតិលេខ៧១ ត្រង់ចំណុចផ្សារចំការលើ ស្រុកចំការលើ ខេត្តកំពង់ចាម ឆ្លងស្ពានស្ទឹងត្រង់ ទៅកាន់ភូមិសាស្ត្រខេត្តត្បូងឃ្មុំ។ បើតាមការឱ្យដឹងពី លោក ស៊ុន ចាន់ថុល និងបានបន្តថា គម្រោងសាងសង់ផ្លូវនេះ ត្រូវបានសិក្សាដោយក្រុមហ៊ុនសៀងហៃ ត្រង់ចំណុច ដែលទទួលរងដោយគ្រោះទឹកជំនន់ ដើម្បីរកដំណោះស្រាយសមស្របសំដៅធានាគម្រោងសាងសង់ផ្លូវជាតិលេខ៧១C តភ្ជាប់ពីខេត្តកំពង់ចាម ទៅខេត្តត្បូងឃ្មុំ បើកការដ្ឋាននៅដំណាចឆ្នាំ២០១៩នេះ ឱ្យបានគុណភាពខ្ពស់។

លោក បានបញ្ជាក់ថា «ឆ្នាំនេះ អាចនឹងមានគម្រោង២ ដែលបើកការដ្ឋាន គឺគម្រោងផ្លូវ៧១Cនេះ និងគម្រោងផ្លូវលេខ១០ ពីសំឡូត ចុះទៅវាលវែង និងឆ្ពោះទៅខេត្តកោះកុង ហើយកិច្ចព្រមព្រៀងសាងសង់គម្រោងទាំង២នេះ បានចុះហត្ថលេខារួចហើយ នៅឡើយតែប្រាក់កម្ចីធ្វើផ្លូវទាំង២នេះ នៅមិនទាន់បានចុះហត្ថលេខានោះទេ»៕

ដោយ៖ ឌីណា