ភ្នំពេញ៖ រោងចក្រផលិតទឹកស្អាតនៅខេត្តកំពត ដែលមានតម្លៃប្រមាណ៣០លានដុល្លារនឹងសម្ពោធដាក់ឱ្យដំណើរការជាផ្លូវការក៏នៅថ្ងៃទី២ ខែមេសា ឆ្នាំ ២០១៩ ខាងមុខនេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រីនៃប្រទេសកម្ពុជា។
រោងចក្រផលិតទឹកស្អាតនៅខេត្តកំពតដែលត្រូវបានសាងសង់កាលពីឆ្នាំ ២០១៨កន្លងមកនេះ ជាជំនួយឥតសំណងទំហំ ៣២៨៤លានយ៉េន ដែលមានតម្លៃជិត ២៧លានដុល្លារ នឹងត្រូវផ្តល់ឱ្យរដ្ឋាភិបាលកម្ពុជាដើម្បីផលិតទឹកស្អាតនៅក្នុងខេត្តកំពត និងការបណ្តុះបណ្តាលធនធានមនុស្ស។
ប្រទេសជប៉ុនបាននាំមុខគេក្នុងចំណោមដៃគូអភិវឌ្ឍន៍ ដែលជួយកម្ពុជាក្នុងវិស័យទឹកស្អាតតាំងដើមទស្សវត្ស១៩៩០ ។
ការរៀបចំប្រព័ន្ធផ្គត់ផ្គង់ទឹកស្អាតនៅក្នុងរាជធានីភ្នំពេញ នៅខេត្តសៀមរាប នៅកំពង់ចាម និងបច្ចុប្បន្នក្នុងខេត្តកំពត សុទ្ធតែបានប្រើប្រាស់ជំនួយរបស់ជប៉ុន។
រាជរដ្ឋាភិបាលកម្ពុជាបាននឹងកំពុងយកចិត្តទុកដាក់ក្នុងការអភិវឌ្ឍវិស័យផ្គត់ផ្គង់ទឹកស្អាត ហើយជាផែនការយុទ្ធសាស្រ្តជាតិបានកំណត់យកឆ្នាំ២០២៥ ប្រជាជនកម្ពុជានឹងទទួលបានទឹកស្អាតប្រើប្រាស់១០០%។
អជ្ជាធរខេត្តខេត្តកំពត ដែលដឹកនាំដោយ លោក ជាវ តាយ អភិបាលនៃគណៈអភិបាលខេត្ត នៅថ្ងៃទី៣០ ខែមីនា ឆ្នាំ២០១៩ បានបើកិច្ចប្រជុំក្រុមការងារត្រៀមរៀបចំបដិសណ្ឋារកិច្ច សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងឱកាសសម្ពោធដាក់ឱ្យដំណើរការប្រព័ន្ធផ្គត់ផ្គង់ទឹកស្អាតទីរួមខេត្តកំពត៕
ប្រភព : www.propertyarea.asia
