ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគក្នុងត្រីមាសទី១ ឆ្នាំ២០២៥ ចំនួន ១៧២គម្រោង ទុនវិនិយោគសរុបប្រមាណ ២,៥ពាន់លានដុល្លារ ដោយខេត្តកំពង់ស្ពឺទទួលបានច្រើនជាងគេ ៤៣គម្រោង តាមពីក្រោយស្វាយរៀងទទួលបាន ៣៤គម្រោង ខណៈ ខេត្តកោះកុងដែលនៅឆ្ងាយទទួលបាន ២២គម្រោង ស្របពេលដែលភ្នំពេញទទួលបាន ២១គម្រោង។ បើតាមសេចក្ដីប្រកាសព័ត៌មាន ក្រុមប្រឹក្សាអភិវឌ្ឍន៍កម្ពុជា។

ក្នុងត្រីមាសទី១ ឆ្នាំ២០២៥នេះ គម្រោងវិនិយោគចំនួន ១៧២គម្រោង វិនិយោគសរុបប្រមាណ ២,៥ពាន់លានដុល្លារ ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា ក្នុងនោះ គម្រោងវិនិយោគស្ថិតនៅក្រៅតំបន់សេដ្ឋកិច្ចពិសេសមានចំនួន ៩៩គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ៧៣គម្រោង។

តាមការបញ្ជាក់ ក្រុមប្រឹក្សាអភិវឌ្ឍន៍កម្ពុជា ខេត្តកំពង់ស្ពឺ ៤៣គម្រោង, ស្វាយរៀង ៣៤គម្រោង, កោះកុង ២២គម្រោង, រាជធានីភ្នំពេញ ២១គម្រោង, ព្រះសីហនុ ១៦គម្រោង, កណ្ដាល ១២គម្រោង, កំពង់ឆ្នាំ ៧គម្រោង ខណៈ ត្បូងឃ្មុំ ពោធិ៍សាត់ និងបន្ទាយមានជ័យ ១គម្រោងរៀងគ្នាផងដែរ។

ក្រុមប្រឹក្សាអភិវឌ្ឍន៍កម្ពុជា បានបញ្ជាក់ទៀតថា ប្រភពទុនវិនិយោគឈានមុខ វិនិយោគិនចិនបានឈរលើគេគ្របដណ្ដប់ ៥៦,២៣% កម្ពុជា៣,៤០% សិង្ហបុរី២,៩១% កោះ British Virgin២,៤០% វៀតណាម១,៦៥%  កោះ Cayman០,៩៨ អង់គ្លេស០,៥៥ កោះ Samoa០,២៥១ សហរដ្ឋអាម៉េរិក០,១៨ និងកាណាដា០,១៥%៕

ដោយ៖ មឿន ឌីណា (Moeun Dyna)