ភ្នំពេញ៖ រយៈពេល ២ខែដើមឆ្នាំ២០២៥ កម្ពុជាទទួលបានចំណូលពីការនាំចេញឈើកៅស៊ូបានចំនួន ៩៦៨.៥៣០ ដុល្លារ ខណៈ ការនាំចេញជ័រ​កៅស៊ូ​ជាង ១០៥.១២លានដុល្លារ។ យោង​តាម​របាយការណ៍អគ្គនាយក​ដ្ឋានកៅស៊ូនៃ​ក្រសួងកសិកម្ម រុក្ខាប្រមាញ់ និងនេសាទ។

តម្លៃកៅស៊ូនៅដើមឆ្នាំ២០២៥នេះ មានភាពល្អ​ប្រសើរ តម្លៃ ១ ៩២៦ដុល្លារក្នុង​មួយតោន ​កើនឡើង ៤៧៥ដុល្លារក្នុងមួយតោន ឬ ៣២,៧% បើធៀបនឹងរយៈពេលដូច​គ្នា​កាលពីឆ្នាំ២០២៤ ខណៈ ​តម្លៃឈើ​កៅស៊ូជាមធ្យមក្នុងរង្វង់ ៣៣០ដុល្លារ​ក្នុងមួយម៉ែត្រគូប។ បើតាមរបាយការណ៍ អគ្គនាយកដ្ឋានកៅស៊ូដដែល។

នៅក្នុងខែកុម្ភៈ ឆ្នាំ២០២៥ តម្លៃកៅស៊ូលក់ជាមធ្យម ១ ៩០៧ដុល្លារក្នុងមួយតោន ធ្លាក់ចុះ ២៦ដុល្លារក្នុងមួយតោន (១,៣៤%) ធៀបនឹងខែមករា ឆ្នាំ២០២៥។ បើតាម លោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូ។

លោក បានបន្តថា អគ្គនាយកដ្ឋាននឹងបន្តធ្វើការដើម្បីសម្រេចបាននូវ​គោលដៅដែលបានគ្រោងទុក និងផ្តល់លទ្ធផលវិជ្ជមាន បន្តសហការជាមួយសមាគមកៅស៊ូជាតិ និងអន្តរជាតិលើគំនិតផ្តួច​ផ្តើមស្រាវជ្រាវ និងអភិវឌ្ឍន៍ក្នុង​ឧស្សាហកម្ម​កៅស៊ូ។ រក្សា​កិច្ចសហប្រតិបត្តិការជាមួយមន្ទីរកសិកម្ម រុក្ខាប្រ​មាញ់ និងនេសាទ ក្រុមហ៊ុនចម្ការកៅស៊ូ ចម្ការកៅស៊ូជាលក្ខណៈគ្រួសារ រោងចក្រកែច្នៃ និងអ្នកពាក់ព័ន្ធផ្សេងទៀត ដើម្បីកែលម្អបច្ចេកទេសដាំដុះកៅស៊ូ និងបង្កើនការប្រមូលទិន្នន័យ។

បច្ចុប្បន្ន​ កម្ពុជាមាន​រោងចក្រ និងរោងសិប្បកម្មកែច្នៃកៅស៊ូ និងឈើកៅស៊ូចំនួន១៧៩ កើនចំនួន៦ ធៀបនឹងឆ្នាំ២០២៣។ បើតាមការលើកឡើង ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបន្តថា ឧស្សាហកម្មកៅស៊ូបាន​បង្កើតកា​រងារចំនួន ១៤ម៉ឺនកន្លែង និងបានគាំទ្រដល់សុខុមាលភាព​សេដ្ឋកិច្ចរបស់ប្រជាពលរដ្ឋចំនួន ៤២ម៉ឺនគ្រួសារ ខណៈ រោងចក្រ​ផលិតសម្បកកង់រថយន្តខ្នាតធំមានចំនួន ៣កំពុងដំណើរការ និងរង់​ចាំទទួលទិញ​ជ័រកៅស៊ូ​ក្នុងស្រុក ស្ថិតនៅក្នុងខេត្តស្វាយរៀង ក្រចេះ និងក្រុងព្រះសីហនុ។

គួរបញ្ជាក់ថា បច្ចុប្បន្ន កម្ពុជាផ្ទៃដីដាំកៅស៊ូសរុបរបស់កម្ពុជាមានទំហំ ៤២៥,៤៤៣ហិកតា ក្នុងនោះ ៣៣០,២៥៩ហិកតា (៧៨%) កំពុងប្រមូល​ផល ខណៈ ចំនួន ៩៥,១៨៤ហិកតា (២២%) កំពុងស្ថិតក្នុង​ដំណាក់កាល​ដាំដុះ។ ផ្ទៃដីកៅស៊ូកសិឧស្សាហកម្ម ២២៦ ៨៤០​ហិកតា ស្មើ៥៥% និងផ្ទៃដីកៅស៊ូគ្រួសារ ១៨០ ៣៣២​ហិកតា ស្មើនឹង៤៤%។

គួររម្លឹកថា កាលពីឆ្នាំ២០២៤ ប្រាក់ចំណូលពីការនាំ​ចេញផលិ​តផលកៅស៊ូចំនួន ៦៧១,៧លានដុល្លារ កើនជាង១៥០លាន​ដុល្លារ បើធៀបនឹងឆ្នាំ២០២៣។ ចំណែក រោងចក្រផលិតសំបកកង់​ក្នុងស្រុកចំនួន៣ បានកែច្នៃកៅស៊ូ​ផលិតក្នុងស្រុកចំនួន ៥៨,០០០តោន មានតម្លៃប្រមាណ ៩៦,៤លានដុល្លារ កើនជាង ៥០លានដុល្លារ​ពីឆ្នាំ២០២៣៕

ដោយ៖ មឿន ឌីណា​ (Moeun Dyna)