ភ្នំពេញ៖ ការនាំចេញរបស់កម្ពុជា​ទៅទីផ្សារអាមេរិក ៨,២៣ពាន់លានដុល្លារ កើនប្រមាណ ៩,៨% រយៈពេល១០ខែ ឆ្នាំ២០២៤ បើធៀបនឹងគ្រាដូចគ្នាឆ្នាំ២០២៣។ យោងតាមទិន្នន័យ​របស់អគ្គនាយកដ្ឋានគយ និងរដ្ឋាករ បានបន្តថា ការនាំចូលពីអាមេរិកមានទំហំ ២១៧លានដុល្លារ កើន ៧,៥%។

សហរដ្ឋអាមេរិកនៅតែជាទីផ្សារ​នាំចេញចម្បងរបស់កម្ពុជា កត្តានេះបានធ្វើឱ្យសហរដ្ឋ​អាមេរិកឈរលេខ១ លើទីផ្សារកម្ពុជា ខណៈវៀតណាមឈរ​នៅលេខរៀងទី២ និងចិនឈរនៅលេខ៣។ បើតាមទិន្នន័យខាងលើ។

វៀតណាម គឺជាទីផ្សារធំទី២របស់កម្ពុជា ជាមួយ​នឹងការនាំចេញចំនួន ២.៩ពាន់លានដុល្លារ កើនឡើង ៣១.២% និង ៣.៤ពាន់លានដុល្លារ នៃការនាំចូលកើនឡើង១៤.៥%។ តាមទិន្នន័យដដែល បានបន្តថា ប្រទេសចិនជាទីផ្សារធំទី៣ ដោយការនាំចេញរបស់​កម្ពុជាទៅកាន់​ប្រទេសចិនសម្រេចបាន ១.៤ពាន់លានដុល្លារ កើនឡើង ១២% ខណៈការនាំចូលឈានដល់ ១០.៩ពាន់លានដុល្លារ កើនឡើង ២៣.២%។

ខណៈ ប្រទេសជប៉ុនគឺជាទីផ្សារធំទី៤ របស់កម្ពុជា ជាមួយ​នឹងការនាំចេញឈានដល់ ១.១ពាន់លានដុល្លារ កើនឡើង ១៨% រីឯការនាំចូលមានតម្លៃ ៦០០លានដុល្លារ កើនឡើង ១៥.៦%។ ប្រទេសកាណាដា ជាទីផ្សារ​ធំទី៥ របស់កម្ពុជាដោយនាំចេញមានលើសពី ៩០០លានដុល្លារ កើនឡើងជិត ៣០% ការនាំចូលមកកម្ពុជាវិញ​មាន​ ៤៨លានដុល្លារ ធ្លាក់ចុះជាង ១០%៕

ដោយ៖ មឿន ឌីណា (Moeun Dyna)