ភ្នំពេញ៖ កម្ពុជា ជាប្រទេសទី៥ នៅលើសកលលោក និងជាប្រទេសដំបូងគេបង្អស់នៅអាស៊ីដែលធ្វើជាប្រធាន និងជាម្ចាស់ផ្ទះកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន។

ប្រទេសកម្ពុជា នឹងធ្វើម្ចាស់​ផ្ទះនៃ​កិច្ចប្រជុំត្រួតពិនិត្យឡើងវិញលើក​ទី៥ នៃអនុសញ្ញាស្តីពី​ការហាម​ការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) ឬកិច្ចប្រជុំកំពូលសៀមរាប-អង្គរស្តីពីពិភពលោកមួយ​ដែល​គ្មានមីន​នៅក្រុងសៀមរាប ខេត្តសៀមរាប ចាប់ពីថ្ងៃទី២៤-២៩ ខែវិច្ឆិកា ឆ្នាំ២០២៤។

កម្ពុជា ជា​ប្រទេសទី៥នៅលើសកលលោក និងជា​ប្រទេសដំបូងគេបង្អស់​ក្នុង​តំបន់អាស៊ីដែលធ្វើជាប្រធាន និងជាម្ចាស់ផ្ទះដឹកនាំកិច្ចប្រជុំកំពូល​មួយនេះ។ គណៈប្រតិភូមកពី ១៦៤​ប្រទេស និងស្ថាប័នអន្តរជាតិ​ដទៃទៀត នឹងអញ្ជើញចូលរួមក្នុងព្រឹត្តិការណ៍ដ៏ធំនេះ។

អាជ្ញាធរមីន ក៏នឹងរៀបចំសន្និសីទសារព័ត៌មានស្ដីពី «វឌ្ឍនភាព​ឆ្ពោះទៅកិច្ចប្រជុំត្រួតពិនិត្យឡើងវិញលើកទី៥ ឬកិច្ចប្រជុំ​កំពូល​សៀមរាប-អង្គរ ស្ដីពីពិភពលោកមួយដែលគ្មានមីន» នៅថ្ងៃទី២០ ខែវិច្ឆិកានេះ នាទីស្នាក់ការកណ្ដាល។ បើតាមប្រសាសន៍ លោក លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន។

គិតត្រឹមថ្ងៃទី១១ ខែវិច្ឆិកា មានគណៈប្រតិភូមកពីជុំវិញពិភពលោកចំនួន ៥២៣នាក់ បានបញ្ជាក់​ពីការចូលរួមរបស់ខ្លួនក្នុងកិច្ចប្រជុំកំពូល និង​ព្រឹត្តិការណ៍ពិសេសៗ​ដែល​កម្ពុជាបានរៀបចំ។ ជាបន្ត លោក លី ធុជ បានបន្តទៀតថា ជាមួយគ្នានេះ ស្ថានទូតនិងកុងស៊ុល​កិត្តិយស​ចំនួន១៥ ព្រមទាំងដៃគូអភិវឌ្ឍន៍​ប្រចាំនៅកម្ពុជាជាច្រើន ក៏បានបញ្ជាក់ពីការចូលរួមផងដែរ។

ក្នុងរយៈពេល១ឆ្នាំ​នេះ កម្ពុជាបានដើរតួនាទីយ៉ាងសំខាន់ជាមួយគ្រប់ភាគីពាក់ព័ន្ធ​នៃ​អនុសញ្ញាអូតាវ៉ា ព្រមទាំងបានដឹកនាំ និងចូលរួមក្នុងកិច្ចប្រជុំ​ប្រមាណ ​៦០លើក។ ជាការបន្ថែម លោក លី ធុជ។

គួរបញ្ជាក់ថា កិច្ចប្រជុំត្រួតពិនិត្យឡើងវិញនៃអនុសញ្ញាអូតាវ៉ាត្រូវបានប្រព្រឹត្តទៅរៀងរាល់៥ឆ្នាំម្តង។ កម្ពុជា គឺជាប្រទេសទី៥ នៅលើសកលលោក និងជា​ប្រទេសដំបូងគេបង្អស់ក្នុងតំបន់អាស៊ីដែលធ្វើជាប្រធាន និងជាម្ចាស់​ផ្ទះដឹកនាំកិច្ចប្រជុំនេះ ។ កិច្ចប្រជុំលើកទី១ នៅ​កេនយ៉ាឆ្នាំ២០០៤ លើកទី២ កូឡុំប៊ីឆ្នាំ២០០៩ លើកទី៣ ម៉ូសំប៊ិកឆ្នាំ២០១៤ លើកទី៤ ​ន័រវែស ឆ្នាំ២០១៩ និងលើកទី៥ នៅកម្ពុជាឆ្នាំ២០២៤។

សម្រាប់កិច្ចប្រជុំនេះ កម្ពុជាក្នុងនាមជាម្ចាស់ផ្ទះគ្រោងនឹងដាក់​ចេញនូវការងារអាទិភាពចំនួន៣ រួម មាន៖ ១-ជំរុញសកល​ភាវូបនីយកម្មនៃអនុសញ្ញា, ជំរុញប្រទេសមិនមែនរដ្ឋភាគីឱ្យចូលរួម​ជារដ្ឋភាគី ឬចូលរួមកិច្ចប្រជុំ ឬអនុវត្តទិដ្ឋភាពនានានៃ​អនុសញ្ញា​ ២-ពង្រឹងការអនុវត្តមាត្រា៥ នៃអនុសញ្ញា, បោសសម្អាតមីន​ប្រឆាំង​មនុស្ស និង ៣-ជួយជនរងគ្រោះដោយសារមីន និងសំណល់​ជាតិផ្ទុះ​ពីសង្រ្គាម៕

ដោយ៖ មឿន ឌីណា (Moeun Dyna)