ភ្នំពេញ៖ គណៈប្រតិភូធុរកិច្ចហុងកុង មានចំណាប់អារម្មណ៍ខ្ពស់ក្នុងការស្វែងរកកាលានុវត្តភាព និងដៃគូសហការជាមួយធុរកិច្ចកម្ពុជា រួមមានមកពីវិស័យ៖ ពាណិជ្ជកម្ម សុខាភិបាល ថាមពល សេវាកម្មផ្នែកច្បាប់ អចលនទ្រព្យ និងទេសចរណ៍។ នេះបើតាមជំនួប អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងគណៈប្រតិភូធុរកិច្ចហុងកុងដឹកនាំដោយ លោក Dewan Saiful Alam។

ជំនួបនេះ អ្នកឧកញ៉ា គិត ម៉េង ស្វាគមន៍យ៉ាងកក់ក្តៅចំពោះ ដំណើរទស្សនកិច្ចរបស់គណៈប្រតិភូធុរកិច្ចហុងកុងនាពេលនេះ ដែលបានឆ្លុះបញ្ចាំងពីការប្តេជ្ញារបស់សភាពាណិជ្ជកម្មទាំងពីរក្នុងការជំរុញពាណិជ្ជកម្មនិងវិនិយោគរវាងហុងកុងនិងកម្ពុជា ធ្វើឡើងកាលពីថ្ងៃទី២៨ ខែតុលា ឆ្នាំ២០២៤។

លោក Dewan Saiful Alam ប្រធានគណៈកម្មាធិការអាស៊ីអាហ្វ្រិក និងមជ្ឈិមបូព៌ានៃសភាពាណិជ្ជកម្មហុង បានគូសបញ្ជាក់ថា ទស្សនកិច្ចនេះ គឺជាផ្នែកមួយនៃកិច្ចប្រឹងប្រឹងរួមគ្នារបស់សភាពាណិជ្ជកម្មទាំងពីរក្នុងការជំរុញទំនាក់ទំនងសេដ្ឋកិច្ចរវាងកម្ពុជានិងហុងកុង។

លោកប្រធាន បានមានប្រសាសន៍ឱ្យដឹងថា គណៈប្រតិភូហុងកុង ដែលអញ្ជើញចូលរួមក្នុងកិច្ចប្រជុំនេះរួមមានមកពីវិស័យ៖ ពាណិជ្ជកម្ម សុខាភិបាល ថាមពល សេវាកម្មផ្នែកច្បាប់ អចលនទ្រព្យ និងទេសចរណ៍។

អ្នកឧកញ៉ា បានគូសបញ្ជាក់អំពីទំនាក់ទំនងល្អប្រសើររវាងកម្ពុជា-ហុងកុង និងបានជំរុញលើកទឹកចិត្តវិនិយោគិនចិនហុងកុង ទាញយកប្រយោជន៍ពីជាអតិបរមាពីទំនាក់ទំនងនេះ ដើម្បីបណ្តាក់ទុនវិនិយោគនៅកម្ពុជាដោយប្រើប្រាស់នូវក្របខណ្ឌកិច្ចសហប្រតិបត្តិការសំខាន់ៗ។

អ្នកឧកញ៉ាប្រធាន បានមានប្រសាសន៍បន្តថា គំនិតផ្តួចផ្តើមខ្សែក្រវាត់និងផ្លូវ កិច្ចសហប្រតិបត្តិការឡាងឆាងមេគង្គ កិច្ចព្រមព្រៀងពាណិជ្ជកម្មសេរីចិនអាស៊ាន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងកិច្ចព្រមព្រៀងពាណិជ្ជកម្មសេរីកម្ពុជាចិន។ អ្នកឧកញ៉ា បានសង្កត់ធ្ងន់អំពីគោលនយោបាយលើកទឹកចិត្តខ្ពស់ចំពោះវិនិយោគិន និងទីផ្សារដ៏ទូលំទូលាយរបស់កម្ពុជា។

នាឱកាសនោះ លោក Dewan Saiful Alam បានថ្លែងអំណរគុណយ៉ាងជ្រាលជ្រៅចំពោះ អ្នកឧកញ៉ា គិត ម៉េង ដែលបានទទួលជួបពិភាក្សាការងារជាមួយ គណៈប្រតិភូធុរកិច្ចហុងកុង និងបានជួយសម្របសម្រួលកិច្ចប្រជុំជាមួយក្រសួងស្ថាប័ននានា សម្រាប់គណៈប្រតិភូធុរកចិ្ចហុងកុងដែលកំពុងបំពេញទស្សនកិច្ចនៅកម្ពុជា។

លោក ក៏បានគូសបញ្ជាក់អំពីសក្តានុពលនៃកិច្ចសហប្រតិបត្តិការរវាងកម្ពុជា-ហុងកុង លើគ្រប់វិស័យ ពិសេស ទេសចរណ៍ ថាមពល ពាណិជ្ជកម្ម និងវិនិយោគ។ គណៈប្រតិភូធុរកិច្ចហុងកុង មានចំណាប់អារម្មណ៍ខ្ពស់ ក្នុងការស្វែងរកកាលានុវត្តភាព និងដៃគូសហការជាមួយធុរកិច្ចកម្ពុជា។

សភាពាណិជ្ជកម្មហុងកុង នឹងសហការជិតស្និទ្ធជាមួយសភាពាណិជ្ជកម្មកម្ពុជា ក្នុងការកំណត់និងអភិវឌ្ឍន៍គម្រោងរួមគ្នា ដែលផ្តល់ផលប្រយោជន៍ទៅវិញទៅមក។ សភាពាណិជ្ជកម្មហុងកុង គឺជាសភាពាណិជ្ជកម្មដ៏ចំណាស់ជាងគេមួយ និងមានសមាជិកច្រើនជាងគេនៅហុងកុង រាប់បញ្ចូលទាំង សហគ្រាសធុនតូចនិងមធ្យម សាជីវកម្មពហុជាតិ និង ក្រុមហ៊ុនភាគច្រើនដែលចុះបញ្ជីនៅទីផ្សារមូលបត្រហុងកុង។ បើតាមការបន្ថែម លោក Dewan Saiful Alam៕

ដោយ៖ មឿន ឌីណា (Moeun Dyna)