សៀមរាប៖ គម្រោងជួសជុលទំនប់អាងទឹកសួង៧៨ បានចាប់ផ្ដើមអនុវត្តនៅក្នុងខែមីនា ឆ្នាំ២០២៤ ស្ថិតនៅក្នុងភូមិស្ដៅ ឃុំអន្លង់សំណរ ស្រុកជីក្រែង ខេត្តសៀមរាប វឌ្ឍនភាពការងារសម្រេចបានប្រមាណជាង ៩០%។ បើតាមកាបញ្ជាក់ លោក ប៉ុន ថន ប្រធានគ្រប់គ្រងការដ្ឋាន។

ទំនប់អាងទឹកសួង៧៨ បានកសាងឡើងតាំងពីឆ្នាំ១៩៧៨ ដែលមានតួនាទីទទួលទឹកពីផ្ទៃរងទឹកភ្លៀងក្នុងតំបន់ និងពីស្ទឹងជីក្រែង ដើម្បីស្រោចស្រពបន្ថែមលើផ្ទៃបង្កបង្កើនផលកសិកម្មប្រមាណជាង ១០០០ហិកតា និងសម្រាប់ការប្រើប្រាស់ក្នុងជីវភាពរស់នៅប្រចាំថ្ងៃ។

កន្លងមក ទំនប់អាងទឹកសួង៧៨ បានជួបនូវស្ថានភាពទឹកជំនន់រដូវវស្សាហូរច្រោះដាច់តួទំនប់ស្ទើរតែទាំងស្រុង ខណៈសំណង់នៅលើទំនប់មិនអាចគ្រប់គ្រងនិងបញ្ជាទឹកបាន ដែលបណ្តាលឱ្យមានការខ្វះខាតទឹកសម្រាប់ការងារបង្កបង្កើនផល និងការប្រើប្រាស់ប្រចាំថ្ងៃរបស់ប្រជាពលរដ្ឋក្នុងតំបន់។

នៅក្នុងឆ្នាំ២០២៤នេះ នាយកដ្ឋានវិស្វកម្មនៃក្រសួងធនធានទឹក និងឧតុនិយម បានអនុវត្តគម្រោងជួសជុលទំនប់អាងទឹកសួង៧៨ ឡើងវិញក្នុងគោលបំណងដើម្បីជួយដោះស្រាយកង្វល់របស់បងប្អូនប្រជាកសិករ ដែលកំពុងជួបការលំបាកខ្វះទឹកសម្រាប់ការងារបង្កបង្កើនផល និងការប្រើប្រាស់ក្នុងជីវភាពរស់ប្រចាំថ្ងៃ។

បើតាមលោក ប៉ុន ថន ប្រធានគ្រប់គ្រងការដ្ឋាន បានបញ្ជាក់ឱ្យដឹងថា គម្រោងជួសជុលទំនប់អាងទឹកសួង៧៨ បានចាប់ផ្ដើមអនុវត្តនៅក្នុងខែមីនា ឆ្នាំ២០២៤ ហើយការងារសំខាន់ៗរួមមាន៖ ជួសជុលទំនប់ប្រវែង ៤២០០ម៉ែត្រ និងសាងសង់សំណង់សិល្បការ្យលើទំនប់ចំនួន ៨កន្លែង ក្នុងនោះសំណង់ទ្វារទឹក (ទ្វារ១) ចំនួន ២កន្លែង សំណង់ទ្វារទឹក (ទ្វារ២) ចំនួន ៥កន្លែង និងសំណង់ទ្វារទឹក(ទ្វារ៤) ចំនួន ១កន្លែង។ បើគិតមកដល់ពេលនេះ វឌ្ឍនភាពការងារសម្រេចបានជាង ៩០%។

ប្រធានក្រុមប្រឹក្សាឃុំអន្លង់សំណរ លោក កង ស៊ីជឿន បានលើកឡើងថា កន្លងមកប្រជាកសិករបានជួបការលំបាកដោយសារទំនប់បាក់ តែពេលនេះបានទទួលសមិទ្ធផលថ្មីដែលធ្វើឱ្យពួកគាត់មានសេចកី្ដសប្បាយរីករាយត្រេកអរ និងបានថ្លែងអំណរគុណដល់រាជរដ្ឋាភិបាល ដែលតែងតែយកចិត្តទុកដាក់គិតគូរដល់សុខទុក្ខប្រជាពលរដ្ឋនៅតាមជនបទដាច់ស្រយាល ដែលជួបប្រទះនឹងការលំបាក។

គួរបញ្ជាក់ថា បន្ទាប់ពីការជួសជុលទំនប់អាងទឹក និងការសាងសង់សំណង់សិល្បការ្យនានាបានបញ្ចប់រួចរាល់តាមលក្ខណៈបច្ចេកទេស ប្រជាពលរដ្ឋប្រមាណ ១១៩០គ្រួសារ ក្នុងភូមិចំនួន៦ នៃឃុំអន្លង់សំណរ ស្រុកជីក្រែង ខេត្តសៀមរាប នឹងមានប្រភពទឹកទុកស្រោចស្រពបន្ថែមលើផ្ទៃដីបង្កបង្កើនផលកសិកម្មដែលមានស្រាប់ ដំណាំរួមផ្សំ និងការប្រើប្រាស់សម្រាប់ជីវភាពរស់នៅប្រចាំថ្ងៃ។

ជាមួយគ្នានេះ ខ្នងទំនប់នឹងក្លាយជាផ្លូវគមនាគមន៍ដ៏សំខាន់សម្រាប់ចរាចរណ៍ដឹកកសិផលទៅកាន់ទីផ្សារ ព្រមទាំងជារមណីយដ្ឋានអេកូទេសចរណ៍ដ៏ទាក់ទាញមួយនៅក្នុងតំបន់ផងដែរ៕

ដោយ៖ មឿន ឌីណា (Moeun Dyna)