ភ្នំពេញ៖ រយៈពេល ៧ខែ ក្នុងឆ្នាំ២០២៤ ទំហំពាណិជ្ជកម្មកម្ពុជា-អន្តរជាតិ គិតជាទឹកប្រាក់សរុបមានចំនួនជាង ៣១ពាន់លានដុល្លារ កើន ១៥% បើធៀបគ្រាដូចគ្នាឆ្នំា២០២៣។ បើតាមរបាយការណ៍ អគ្គនាយកដ្ឋានគយ និងរដ្ឋាករកម្ពុជា បានបន្តថា កម្ពុជានាំចេញទំនិញក្នុងទំហំទឹកប្រាក់ជាង ១៤ពាន់លានដុល្លារ ខណៈ ការនាំចូលពីបរទេសមានចំនួនជាង ១៦ពាន់លានដុល្លារ ក្នុងនោះ ការធ្វើការធ្វើពាណិជ្ជកម្មជាមួយប្រទេសដៃគូរសំខាន់ៗ របស់កម្ពុជាមានចំនួន២០ និងបណ្តាប្រទេសមួយចំនួនផ្សេងទៀត។
ការនាំចេញទំនិញរបស់កម្ពុជា មានទំហំទឹកជាង ១៤ពាន់លានដុល្លារ កើនជាង ១៤% បើធៀបរយៈពេលដូចគ្នាឆ្នំា២០២៣។ បើតាមរបាយការណ៍ខាងលើ។
ក្នុងនោះ កម្ពុជាបាននាំទៅកាន់ប្រទេសសំខាន់ៗរួមមាន៖ អាមេរិកជាង ៥ ៥០០លានដុល្លារ, វៀតណាម ជាង ២ ២០០ លានដុល្លារ, ប្រទេសចិនជិត ១ ០០០លានដុល្លារ, ថៃជិត ៥០០លានដុល្លារ, ជប៉ុនជាង ៧៦៤លានដុល្លារ, អាល្លឺម៉ង់ ជាង ៥១៦លានដុល្លារ, អេស្ប៉ាញ ៥៦០លានដុល្លារ, កាណាដា ៦០៥លានដុល្លារ, អង់គ្លេស ៥៣០លានដុល្លារ, ហូឡង់ ៤២៧លានដុល្លារ, បានរាំង ២២៩លានដុល្លារ, កូរ៉េខាងត្បូង ១៨៧លានដុល្លារ និងការនាំចេញ ទៅកាន់ប្រទេសផ្សេងៗជាច្រើនទៀត។
ការនាំចូលវិញ កម្ពុជាបាននាំចូលទំនិញមានទំហំទឹកប្រាក់សរុបប្រមាណជាង ១៦ពាន់លានដុល្លារ កើនជិត ១៦% ក្នុងនោះ ការនាំចូលពីប្រទេសចិន មានទឹកប្រាក់ជិត ៧ ៧០០លានដុល្លារ, វៀតណាមជាង ២ ៤០០លានដុល្លារ, ថៃជាង ២ ០០០លានដុល្លារ, សឹង្ហបុរី ៥១១លានដុល្លារ, ឥណ្ឌូនស៊ី ៦០០លានដុល្លារ, តៃវ៉ាន់ ៤០៥លានដុល្លារ, កូរ៉េខាងត្បូង ២៩១លានដុល្លារ, ម៉ាឡេស៊ី ៤៦០លានដុល្លារ, ហុងកុង ២៣១លានដុល្លារ ក្រៅពីនេះកម្ពុជាក៏បាននាំចូលទំនិញផ្សេងៗ ពីបណ្តាប្រទេសជាច្រើនទៀត។
កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) កំពុងជំរុញកំណើនពាណិជ្ជកម្មនេះ។ បើតាមការលើកឡើង លោក ប៉ែន សុវិជាតិ រដ្ឋលេខាធិការនិងជាអ្នកនាំពាក្យក្រសួងពាណិជ្ជកម្ម បានគូសបញ្ជាក់ថា ជាមួយនឹងសម្បទានពន្ធដែលផ្តល់ដោយ RCEP និង CCFTA ការនាំចេញរបស់យើងនឹងបន្តកើនឡើងក្នុងប៉ុន្មានខែ និងឆ្នាំខាងមុខ។
គួរបញ្ជាក់ផងដែរថា RCEP មានប្រទេសចំនួន ១៥ ក្នុងតំបន់អាស៊ីប៉ាស៊ីហ្វិក រួមទាំងប្រទេសសមាជិកអាស៊ានចំនួន ១០ រួមមាន ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ហើយដៃគូពាណិជ្ជកម្មចំនួន ៥ របស់ពួកគេរួមមាន ចិន ជប៉ុន កូរ៉េខាងត្បូង អូស្ត្រាលី និង នូវែលសេឡង់៕
ដោយ៖ មឿន ឌីណា (Moeun Dyna)
