![](https://s9.kh1.co/4f/4f79160454b5a27ffef582155dd60941a752d5f4.png)
ត្បូងឃ្មុំ-កំពង់ចាម៖ ផ្លូវជាតិលេខ៧១C ភ្ជាប់ខេត្តត្បូងឃ្មុំ និងខេត្តកំពង់ចាម ដែលមានប្រវែង ១១៤,៦២គីឡូម៉ែត្រ បានសាងសង់រួចរាល់ ១០០%។
ផ្លូវជាតិលេខ៧១C ប្រវែង ១១៤,៦២គីឡូម៉ែត្រ (ចាប់ពីផ្លូវជាតិលេខ៧ ចំណុច PK150+700 ក្នុងខេត្តត្បូងឃ្មុំ ទៅដល់ផ្លូវជាតិលេខ៧១ ចំណុច PK30+400 ខេត្តកំពង់ចាម) សម្រេចបានលទ្ធផល១០០% ហើយ។
![](https://s9.kh1.co/0e/0e97e6fcd54f6398b54812361d922314669ac23b.jpg)
រដ្ឋមន្ត្រីក្រសួងសាធារណការ និងដឹកជញ្ជូន តែងបានគិតគូរ និងបានចង្អុលបង្ហាញឱ្យ រដ្ឋលេខាធិការក្រសួង ដែលជានាយកគម្រោងសាងសង់ផ្លូវនេះ ប្រឹងប្រែងធ្វើឱ្យកាន់ប្រសើរឡើង និងបំពេញចន្លោះខ្វះខាតដែលនៅសេសសល់តិចតួច ដើម្បីឈានទៅដល់ការសម្រេចលទ្ធផលជារួម និងត្រៀមសម្ពោធដាក់ឱ្យដំណើរការជាផ្លូវការនាពេលបន្ទាប់។
![](https://s9.kh1.co/69/694af80fea6ef88252e2a3476929c029a9864c6c.jpg)
ផ្លូវជាតិលេខ៧១C ត្រូវបានសាងសង់ដោយក្រុមហ៊ុនសាងសង់សៀងហៃគ្រុប( SCG) និងទីប្រឹក្សាបច្ចេកទេសដោយក្រុមហ៊ុន ក្វាងចូវ វ៉ាងអាន ប្រើប្រាស់ហិរញ្ញប្បទានថវិកាពីចិន។
![](https://s9.kh1.co/36/367afd198d2272696b119c42fca9eca2757f3c2d.jpg)
ផ្លូវជាតិដ៏សំខាន់នេះ ជាប្រភេទ AC/DBST ចុះកិច្ចសន្យាសាងសង់ នៅថ្ងៃទី២០ ខែឧសភា ឆ្នាំ២០២០ ហើយចាប់ផ្តើមសាងសង់នៅថ្ងៃទី០២ ខែមេសា ឆ្នាំ២០២១ និងកាលបរិច្ឆេទបញ្ចប់ការសាងសង់ ត្រឹមថ្ងៃទី២ ខែតុលា ឆ្នាំ២០២៤ ដែលមានរយៈពេលសាងសង់៤២ខែ និងរយៈពេលថែទាំ (ក្នុងកិច្ចសន្យា) ២៤ខែ។
![](https://s9.kh1.co/8d/8df15aef869f59885abbc088739b7db9ea6a26ce.jpg)
គួរបញ្ជាក់ថា ក្រុមការងារបានបន្តតាមដានយ៉ាងយកចិត្តទុកដាក់លើដំណើរបញ្ចប់ការគូសសំនូសចរាចរណ៍លើដងផ្លូវ ការងារបំពាក់ផ្លាកសញ្ញាចរាចរណ៍ ការងារដាំបង្គោលគីឡូម៉ែត្រ និងកិច្ចការដាំស្មៅការពារការហូរច្រោះជើងទេរផ្លូវ។ ផ្លូវជាតិលេខ៧១C ជាផ្លូវដែលពោរពេញដោយទេសភាពខៀវស្រងាត់ត្រជាក់ភ្នែក មានសភាពធន់ រឹងមាំ ដែលផ្តល់ភាពងាយស្រួល និងចរាចរណ៍ដោយរលូន៕
![](https://s9.kh1.co/b7/b73aefef6ca2ba1aa9924da26b3f3429bb1bbce5.jpg)
![](https://s9.kh1.co/da/dadebd70aab5f1a21adf828f6bd59dbae8345b1d.jpg)
![](https://s9.kh1.co/57/57db1f0ebdccb40e75bee84f4e133ade384e506e.jpg)
![](https://s9.kh1.co/2d/2d39f147dee78774a0f152a07a97cb71d235a846.jpg)
![](https://s9.kh1.co/17/17e8c7be06499d0c1cf2bcf3c56f9a0930590b9a.jpg)
![](https://s9.kh1.co/c3/c3fe6704d0f2d0432216d9c127c151e1ad76068a.jpg)
ដោយ៖ មឿន ឌីណា (Moeun Dyna)