កំពង់ធំ៖ វឌ្ឍនភាពគម្រោងសាងសង់ទំនប់អាងទឹកពាម គ្របដណ្ដប់លើភូមិចំនួន១១ នៃឃុំម្យាក្រង ស្រុកស្ទោង ខេត្តកំពង់ធំ សមត្ថភាពស្រោចស្រពបន្ថែមដល់ផ្ទៃដីបង្កបង្កើនផលរដូវវស្សាចំនួន ៦២៦ហិកតា និងរដូវប្រាំងចំនួន ១៩៤៩ហិកតា ព្រមទាំងដំណាំរួមផ្សំចំនួន ១៥ហិកតា សម្រេចបានប្រមាណ ៣៥%។
លោក ថាំង វីយុទ្ធដា ប្រធាននាយកដ្ឋានវិស្វកម្មនៃក្រសួងធនធានទឹក និងឧតុនិយម បានដឹកនាំមន្ត្រីជំនាញនាយកដ្ឋាន សហការជាមួយមន្ទីរធនធានទឹក និងឧតុនិយមខេត្តកំពង់ធំ ចុះពិនិត្យគម្រោងនេះ កាលពីថ្ងៃទី២៩ ខែមិថុនា ឆ្នាំ២០២៤។
លោក ថាំង វីយុទ្ធដា បានឱ្យដឹងថា គិតមកដល់ពេលនេះ វឌ្ឍនភាពនៃគម្រោងសាងសង់ទំនប់អាងទឹកពាម សម្រេចបានប្រមាណ ៣៥%។
ក្នុងឱកាសនោះដែរ លោក ក៏បានណែនាំដល់មន្ត្រីអនុវត្តការងារនៅតាមការដ្ឋានឱ្យបន្តយកចិត្តទុកដាក់លើគុណភាព និងបច្ចេកទេសឱ្យបានត្រឹមត្រូវតាមបទដ្ឋានបច្ចេកទេស។
លោក បានគូសបញ្ជាក់ថា គម្រោងនេះអាចបង្កើនសមត្ថភាពស្រោចស្រពបន្ថែមដល់ផ្ទៃដីបង្កបង្កើនផលរដូវវស្សាចំនួន ៦២៦ហិកតា និងរដូវប្រាំងចំនួន ១៩៤៩ហិកតា ព្រមទាំងដំណាំរួមផ្សំចំនួន ១៥ហិកតា និងមានប្រជាពលរដ្ឋទទួលផលប្រមាណ ២៤២៦គ្រួសារ។
គូសបញ្ជាក់ផងដែរថា គម្រោងសាងសង់ទំនប់អាងទឹកពាមគ្របដណ្ដប់លើភូមិចំនួន ១១ នៃឃុំម្យាក្រង ស្រុកស្ទោង ខេត្តកំពង់ធំ។ ការងារសំខាន់ៗ របស់គម្រោងមានដូចជា៖ ១-សាងសង់ទំនប់ប្រវែង ២០០០ម៉ែត្រ ២-សាងសង់សំណង់បង្ហៀរចំនួន ១កន្លែង និង ៣-សាងសង់សំណង់ទ្វារទឹក ចំនួន ១កន្លែង៕
ដោយ៖ មឿន ឌីណា (Moeun Dyna)
