កណ្ដាល៖ គិតមកដល់ពេលនេះ រដ្ឋបាលខេត្តកណ្ដាល បានចេញវិញ្ញាបនបត្រសម្គាល់ម្ចាស់អចលនវត្ថុចំនួន ៣៦២,៩៤៥បណ្ណ និងបានចែកបណ្ណជូនដល់​ប្រជាពលរដ្ឋសរុបចំនួន ២១៤លើក ស្មើនឹង ២៩៤,១៤៣បណ្ណ។ បើតាមរដ្ឋបាលខេត្តកណ្ដាល។

លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញអធិបតីភាព ក្នុងពិធីចែកវិញ្ញាបនបត្រសម្គាល់អចលនវត្ថុជូនប្រជាពលរដ្ឋចំនួន ៤,៩៥១បណ្ណ មកពីឃុំទំនប់ធំ និងឃុំឈ្វាំង កាលពីរសៀលថ្ងៃទី៧ ខែមិថុនា ឆ្នាំ២០២៤។

នាពិធីនេះ ក៏មានការចូលរួម លោក នូ សាខន ប្រធានក្រុមប្រឹក្សាខេត្ត និងលោក គង់ សោភ័ណ្ឌ អភិបាលខេត្តកណ្តាល។

ពិធីចែក​វិញ្ញាបនបត្រ​សម្គាល់ម្ចាស់អចលវត្ថុនេះ គឺជាលើកទី២១៥ ដែលត្រូវផ្តល់ជូនប្រជាពលរដ្ឋ មកពីភូមិបែកថ្លាង ភូមិដំបូកមានលក្ខណ៍ ភូមិកំណប់ ឃុំទំនប់ធំ ភូមិកាកាប ភូមិតាអោក ភូមិស្លែងមានជ័យ ភូមិស្ដុកតាចាន់ ភូមិទន្សាស្វិត និងភូមិពង្រ ឃុំឈ្វាំង ស្រុកពញាឮ ខេត្តកណ្ដាល សរុបចំនួន ៤,៩៥១បណ្ណ។

បើតាម រដ្ឋបាលខេត្តកណ្ដាលដដែល កាលពីព្រឹកថ្ងៃទី៦ ខែមិថុនា ឆ្នាំ២០២៤ លោក គ្រុយ ម៉ាឡែន អភិបាលរងខេត្តកណ្ដាល តំណាង គង់ សោភ័ណ បានចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋចំនួន ៤ភូមិ ក្នុងឃុំកោះខែល និងឃុំព្រែកអំបិល ស្រុកស្អាង ខេត្តកណ្តាល ក្បាលដីចំនួន ២,៤៨៨បណ្ណ។

ការចុះបញ្ជីដីធ្លីមានលក្ខណៈជាប្រព័ន្ធនេះ មានសារៈប្រយោជន៍ណាស់សម្រាប់ប្រជាពលរដ្ឋ ក៏ដូចជាសង្គមជាតិទាំងមូល ព្រោះការចុះបញ្ជីដីធ្លីនេះ បានផ្តល់នូវ ការធានាបាននូវឋានពេញលេញជាកម្មសិទ្ធិករស្របច្បាប់លើដីធ្លីតាមរយៈការផ្តល់ ជូននូវវិញ្ញាបនបតសម្គាល់ម្ចាស់អចលនវត្ថុ(ប្លង់រឹង)។ ជាការគូសបញ្ជាក់ លោក គ្រុយ ម៉ាឡែន។

លោក បានបន្តថា ជាវត្ថុតាងស្របច្បាប់សម្រាប់ផ្ដល់នូវទំនុកចិត្តដល់ម្ចាស់ដី និងសម្រាប់អ្នកដែលត្រូវបន្តវេន យកទៅប្រើប្រាស់តាមតម្រូវការប្រកបដោយសុវត្ថភាព និងទំនុកចិត្ត។ ទីផ្សាប្រកបដោយទំនុកចិត្ត ការវិនិយោគនឹងកើនឡើង ជាពិសេស បានផ្ដល់ជាកម្លាំង ជំរុញដល់កំណើនសេដ្ឋកិច្ច កាត់បន្ថយភាពក្រីក្ររបស់ប្រជាពលរដ្ឋបានមួយកម្រិត ថែមទៀត។

នាពិធីនេះដែរ លោក ទៀង កុស្យារៈ អនុប្រធានមន្ទីររៀបចំដែនដី នគររូបនីយកម្មសំណង់ និងសូរិយោដីខេត្តកណ្ដាល បានឱ្យដឹងថា គិតមកដល់ពេលនេះ រដ្ឋបាលខេត្តបានធ្វើការចែកបណ្ណជូនប្រជាពលរដ្ឋសរុបចំនួន ២១៣លើក ស្មើនឹង ២៩០,២៥៨បណ្ណ ហើយថ្ងៃនេះគឺជាលើកទី២១៤ នៃការចែកវិញ្ញាបនបត្រសម្គាល់ម្ចាស់អចលវត្ថុ ដែលនឹងត្រូវផ្តល់ជូនប្រជាពលរដ្ឋមកនៅភូមិដើមព្រីង ឃុំកោះខែល ចំនួន ៥៥២បណ្ណ, ភូមិពាមប្រជុំ ចំនួន ៧៦១បណ្ណ, ភូមិត្រើយត្រឹង្ស ចំនួន៥១០បណ្ណ និងភូមិព្រែកថ្មីចំនួន ៦៦៥បណ្ណ ឃុំព្រែកអំបិល ស្រុកស្អាង ខេត្តកណ្តាល៕

ដោយ៖ មឿន ឌីណា (Moeun Dyna)