ភ្នំពេញ៖ គម្រោងដោះទឹក និងពង្វាងទឹកជំនន់ចេញពីរាជធានីភ្នំពេញ ក្នុងភូមិសាស្ត្រខេត្តកំពង់ស្ពឺ និងខេត្តកណ្តាល វឌ្ឍនភាព សម្រេចបានប្រមាណ ៧០%។ តាមការចុះពិនិត្យ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម។

តាមការពិនិត្យវឌ្ឍនភាពគម្រោងនេះ អមដំណើរ ដោយមន្ត្រីបច្ចេកទេសក្រសួង និងមន្ទីរ នៅថ្ងៃទី៨ ខែមិថុនា ឆ្នាំ២០២៤ ក៏មានការចូលរួម ក្រុមការងាររបស់ សម្តេចធិបតី នាយករដ្ឋមន្ត្រី ដឹកនាំដោយ លោក យូ ស៊ុនឡុង។

លោក រដ្ឋមន្ត្រី និងក្រុមការងារបានចុះពិនិត្យវឌ្ឍនភាពការងារសាងសង់ទ្វារទឹកស្ទឹងតូច និងស្តារស្ទឹងតូចប្រវែង ៥១គីឡូម៉ែត្រ ចាប់ពីស្ទឹងព្រែកត្នោតក្នុងភូមិស្រែកក់ ឃុំរលាំងចក ស្រុកសំរោងទង ខេត្តកំពង់ស្ពឺ ទៅដល់ភូមិត្រស់ ឃុំទ្រា ស្រុកកណ្តាលស្ទឹង ខេត្តកណ្តាល ដែលមានលទ្ធភាពដោះទឹកពីស្ទឹងព្រែកត្នោតបានប្រមាណ ៣០០ម៉ែត្រគូបក្នុង១វិនាទី។

បើតាមរបាយការណ៍ គិតមករហូតមកដល់ពេលនេះ វឌ្ឍនភាពការងារនៃអនុគម្រោងសំណង់ទ្វារទឹក និងប្រព័ន្ធដោះទឹកជំនន់ស្ទឹងតូចសម្រេចបានប្រមាណ ៧០%។

ជាមួយគ្នានេះ លោក រដ្ឋមន្ត្រី និងក្រុមការងារបានចុះពិនិត្យសំណង់ស្ថានីយបូមទឹកសាក់សំពៅ ក្នុងភូមិសាស្ត្ររាជធានីភ្នំពេញ ដែលមានអគារកម្ពស់ ៨ម៉ែត្រ មានទទឹងខាង ២៧ម៉ែត្រ និងបណ្តោយទាំងថ្មការពារជើងទេរមុខក្រោយ ១៥០ម៉ែត្រ មានក្បាលបូម ៦គ្រឿង អាចបូមបាន ៣០ម៉ែត្រគូប ក្នុង១វិនាទី ក្នុង១គ្រឿង។

ឆ្លៀតក្នុងឱកាសនោះដែរ លោក ថោ ជេដ្ឋា និងក្រុមការងារក៏បានចុះពិនិត្យវឌ្ឍនភាពការងារស្តារប្រឡាយព្រែកហូរ នៃគម្រោងប្រព័ន្ធស្រោចស្រព និងការពារទឹកជំនន់ស្ទឹងព្រែកត្នោត ក្នុងខេត្តកណ្តាល ដែលធ្វើការស្តារស្ទឹងព្រែកត្នោតនៅផ្នែកខាងក្រោមចាប់ពីខាងកើតផ្លូវជាតិលេខ៣។

គិតមកដល់ពេលនេះ វឌ្ឍនភាពគម្រោងសម្រេចបានប្រមាណ ៩៥% ហើយគ្រោងបញ្ចប់ក្នុងខែកក្កដា ឆ្នាំ២០២៤ ខាងមុខ៕

ដោយ៖ មឿន ឌីណា (Moeun Dyna)